అక్కడ ఆయనకు వరుస విజయాలే !!

strong hold………

తమిళనాడు ముఖ్యమంత్రి ఎం.కె. స్టాలిన్  కొళత్తూర్ నియోజకవర్గం నుండి నాలుగోసారి పోటీ చేస్తున్నారు. ఎం.కె. స్టాలిన్ ఇక్కడ నుంచి వరుసగా మూడుసార్లు విజయం సాధించారు. నియోజకవర్గంలో చేసిన అభివృద్ధి పనుల పుస్తకాన్ని విడుదల చేసి, గతంలో కంటే భారీ మెజారిటీతో  గెలుస్తానని ధీమా వ్యక్తం చేస్తున్నారు.  

అన్నాడీఎంకే తరపున మాజీ కార్పొరేటర్ పి. సంతానకృష్ణన్ బరిలో ఉన్నారు. ఈయన మాజీ కార్పొరేటర్ కావడంతో క్షేత్రస్థాయిలో ఓటర్లతో మంచి సంబంధాలు ఉన్నాయి. అన్నాడీఎంకేకు ఈ నియోజకవర్గంలో గట్టి ఓటు బ్యాంకు ఉంది. ముఖ్యంగా స్టాలిన్ వ్యతిరేక ఓట్లను రాబట్టుకోగలరు.  

నటుడు విజయ్ స్థాపించిన తమిళగ వెట్రి కళగం (TVK) తరపున వి.ఎస్. బాబు పోటీ చేస్తున్నారు. విజయ్ పట్ల  యువతలో విపరీతమైన క్రేజ్ ఉంది. మార్పు కోరుకునే కొత్త ఓటర్లు ఈయన వైపు మొగ్గు చూపే అవకాశం ఉంది. అటు డీఎంకే, ఇటు అన్నాడీఎంకే వద్దు అనుకునే తటస్థ ఓటర్లు బాబుకు ఓటు వేసే ఛాన్స్ ఉంది. పార్టీకి బలమైన క్షేత్రస్థాయి యంత్రాంగం (Booth level workers) లేకపోవడం పెద్ద మైనస్ పాయింట్.  

కొళత్తూర్ నియోజకవర్గం ఏర్పడినప్పటి (2011) నుండి స్టాలిన్ ఇక్కడ ఓడిపోలేదు. 2021లో ఆయన సుమారు 70,384 ఓట్ల భారీ మెజారిటీతో గెలుపొందారు. 2011లో 1.9% ఉన్న మెజారిటీ శాతం, 2021 నాటికి 40.6%కి పెరిగింది, ఇది ఆ నియోజకవర్గంలో ఆయనకు ఉన్న పట్టును తెలియజేస్తుంది.

ముఖ్యమంత్రిగా స్టాలిన్ తన నియోజకవర్గంపై ప్రత్యేక దృష్టి సారించారు. మౌలిక సదుపాయాలు, విద్య, వైద్య రంగాల్లో చేసిన పనులు ఆయనకు ప్లస్ అవుతాయి.రాష్ట్రవ్యాప్తంగా అమలు చేస్తున్న ‘సంక్షేమ పథకాలు ఓటర్లపై ప్రభావం చూపుతున్నాయి.

కొళత్తూర్ పూర్తిస్థాయి పట్టణ (Urban) నియోజకవర్గం. ఇక్కడ ఎక్కువ శాతం మంది ప్రభుత్వ, ప్రైవేట్ ఉద్యోగులు, చిన్న తరహా వ్యాపారస్తులు నివసిస్తున్నారు .. నియోజకవర్గంలో అక్షరాస్యత శాతం చాలా ఎక్కువ (సుమారు 92% కి పైగా), దీనివల్ల ఇక్కడ ఓటర్లు పార్టీల అభివృద్ధి పనులు, అభ్యర్థుల పనితీరును బట్టి ఓటు వేస్తుంటారు.

సీఎం స్టాలిన్ ఇక్కడ నిరంతరం పర్యటించడం, మౌలిక సదుపాయాల మెరుగుదల, సంక్షేమ పథకాలు అన్ని సామాజిక వర్గాల ఓటర్లను ఆకట్టుకునేలా ఉన్నాయని రాజకీయ వర్గాల అంచనా.కొన్ని ప్రాంతాల్లో వర్షా కాలంలో వచ్చే వరద సమస్యలు, ట్రాఫిక్ ఇబ్బందులపై స్థానికుల్లో కొంత అసంతృప్తి ఉంది.

స్టాలిన్ స్వయంగా నియోజకవర్గంలో పర్యటిస్తున్నారు. ఇటీవల చెన్నై మెట్రోలో ప్రయాణిస్తూ ప్రయాణికులతో నేరుగా ముచ్చటించి ఓట్లు అభ్యర్థించారు. మార్నింగ్ వాక్ చేస్తూ స్థానిక ప్రజలతో టీ తాగుతూ వారి సమస్యలను అడిగి తెలుసుకుంటున్నారు.

తెరవెనుక రాజకీయ వ్యూహకర్తగా ఉండే స్టాలిన్ అల్లుడు వి. శబరీశన్ ఈసారి ప్రత్యక్షంగా ఎన్నికల మీటింగ్‌లలో పాల్గొంటున్నారు. పార్టీ కార్యకర్తలతో సమావేశమై ప్రచార సరళిని పర్యవేక్షిస్తున్నారు. మహిళా ఓటర్ల మద్దతు కోసం కనిమొళి కూడా నియోజకవర్గంలో ప్రత్యేక ప్రచార కార్యక్రమాల్లో పాల్గొంటున్నారు. 

ప్రస్తుతానికి  స్టాలిన్ తన వ్యక్తిగత చరిష్మా,అభివృద్ధి పనుల వల్ల ముందంజలో ఉన్నారు. అయితే, విజయ్ పార్టీ (TVK) చీల్చే ఓట్లు ఆయన మెజారిటీని ఏ మేరకు తగ్గిస్తాయనేది ఆసక్తికరంగా మారింది.