Mystery Temple………
హిమాచల్ ప్రదేశ్లోని కాంగ్రా లోయలో వెలసిన జ్వాలాజీ ఆలయం (జ్వాలాముఖి దేవాలయం) దేశంలోని అత్యంత అద్భుతమైన,రహస్యమయమైన పుణ్యక్షేత్రాలలో ఒకటి. ఈ ఆలయానికి కొన్ని ప్రత్యేకతలు ఉన్నాయి. సాధారణంగా హిందూ దేవాలయాలలో దేవుడి విగ్రహాలు లేదా చిత్రపటాలు ఉంటాయి. కానీ జ్వాలాజీ ఆలయంలో ఎలాంటి విగ్రహం ఉండదు.
ఇక్కడ రాతి పగుళ్ల నుండి సహజంగా వెలువడే అగ్ని జ్వాలలనే సాక్షాత్తు అమ్మవారి రూపంగా భావించి భక్తులు పూజిస్తారు.ఈ ఆలయంలోని రాతి గోడల మధ్య నుండి తొమ్మిది సహజమైన జ్వాలలు (నవ జ్వాలలు) నిరంతరం మండుతూనే ఉంటాయి.
వీటికి ఎలాంటి నూనె కానీ, వత్తి కానీ, ఇంధనం కానీ అవసరం లేదు. వేల సంవత్సరాలుగా, ఎలాంటి వాతావరణ పరిస్థితుల్లోనైనా (భారీ వర్షాలు, గాలులు వచ్చినా) ఈ జ్వాలలు అస్సలు ఆరిపోవు.
హిందూ పురాణాల ప్రకారం, ఇది అత్యంత పవిత్రమైన 51 శక్తిపీఠాలలో ఒకటి. శివుడు సతీదేవి పార్థివదేహాన్ని మోసుకెళ్తున్నప్పుడు, విష్ణుమూర్తి తన సుదర్శన చక్రంతో ఆమె శరీరాన్ని ఖండించగా.. సతీదేవి నాలుక తెగిపడిన ప్రదేశం ఇదేనని నమ్ముతారు.
అందుకే ఇక్కడ అమ్మవారు అగ్ని రూపంలో (జ్వాలాముఖిగా) వెలిశారు.ఇక్కడ వెలిగే 9 జ్వాలలను నవదుర్గల రూపాలకు ప్రతీకలుగా కొలుస్తారు. మహాకాళి, అన్నపూర్ణ, చండి, హింగ్లాజ్, వింధ్యవాసిని, మహాలక్ష్మి, సరస్వతి, అంబిక, అంజీ దేవిలుగా భావించి పూజలు చేస్తుంటారు.
మొఘల్ చక్రవర్తి అక్బర్ ఈ ఆలయ మహిమను పరీక్షించాలనుకున్నాడు. జ్వాలలను ఆర్పేయడానికి వాటిపైకి నీటి ధారలను మళ్లించాడు. కానీ అగ్ని జ్వాలలు నీటిని సైతం దాటుకుని పైకి లేచాయి. అమ్మవారి శక్తిని గ్రహించిన అక్బర్, తన తప్పును తెలుసుకుని ఆలయానికి వచ్చి దేవికి బంగారు ఛత్రాన్ని (గొడుగును) సమర్పించాడు.
అయితే అమ్మవారు ఆ అహంకార కానుకను స్వీకరించలేదని, ఆ గొడుగు తక్షణమే ఒక గుర్తుతెలియని లోహంగా మారిపోయిందని చెబుతారు.మొదట్లో శాస్త్రవేత్తలు ఇక్కడ భూగర్భంలో ఉన్న సహజ వాయువులు రాతి పగుళ్ల గుండా రావడం వల్ల ఈ మంటలు మండుతున్నాయని భావించారు.
అయితే, ఇక్కడ గ్యాస్ నిల్వలు ఎక్కడున్నాయో తెలుసుకోవడానికి చమురు, సహజవాయువు నిపుణులు దశాబ్దాల పాటు పరిశోధనలు చేసినా, ఖచ్చితమైన మూలాన్ని కనుగొనలేకపోయారు. కొన్ని వందల ఏళ్లుగా ఒకే తీవ్రతతో ఇంధనం లేకుండా మంటలు ఎలా వస్తున్నాయనేది ఇప్పటికీ ఒక రహస్యమే.
హిమాచల్ ప్రదేశ్లోని కాంగ్రా జిల్లాలో ఉన్న శ్రీ జ్వాలాజీ ఆలయానికి చేరుకోవడానికి విమాన, రైలు, రోడ్డు మార్గాలు ఉన్నాయి. కాంగ్రా విమానాశ్రయం… ఆలయానికి అత్యంత సమీపంలో ఉన్న విమానాశ్రయం (సుమారు 46 కిలోమీటర్లు). ఢిల్లీ లేదా చండీగఢ్ నుండి ఇక్కడికి నేరుగా విమానాలు ఉంటాయి. ఎయిర్పోర్ట్ నుండి టాక్సీ లేదా బస్సు ద్వారా 1 గంటలో జ్వాలాజీ ఆలయానికి చేరుకోవచ్చు.
చండీగఢ్ అంతర్జాతీయ విమానాశ్రయం నుండి ఆలయం సుమారు 200 కిలోమీటర్ల దూరంలో ఉంటుంది. చండీగఢ్ నుండి క్యాబ్ లేదా బస్సు ద్వారా ప్రయాణించవచ్చు. జ్వాలాముఖి రోడ్ రైల్వే స్టేషన్ (Ranital)ఇది ఆలయానికి కేవలం 20 కిలోమీటర్ల దూరంలో ఉన్న సమీప నారో-గేజ్ (చిన్న) రైల్వే స్టేషన్. పఠాన్కోట్ నుండి కాంగ్రా వ్యాలీ నారో-గేజ్ రైలు (టాయ్ ట్రెయిన్) ద్వారా ఇక్కడికి చేరుకోవచ్చు.
ఉనా హిమాచల్ రైల్వే స్టేషన్ (UHL) / అంబ్ అందౌరాస్టేషన్ నుండి ఆలయం సుమారు 60-80 కిలోమీటర్ల దూరంలో ఉంటుంది, స్టేషన్ నుండి నేరుగా టాక్సీలు దొరుకుతాయి.పఠాన్కోట్ జంక్షన్ నుండి ఆలయానికి దూరం సుమారు 120 కిలోమీటర్లు. జ్వాలాజీ ఆలయం నేషనల్ హైవే (NH 503) పై ఉండటం వల్ల రోడ్డు రవాణా చాలా బాగుంటుంది.
