ఈ తెగలో ప్రేమపెళ్లిళ్లే ఎక్కువ !!

Nicobarese tribe…….

‘నికోబారీస్’ తెగ అండమాన్, నికోబార్ దీవులలోని అత్యధిక జనాభా కలిగిన ప్రధాన గిరిజన సమూహం. బాహ్య ప్రపంచానికి పూర్తిగా దూరంగా ఉండే షోంపెన్ లేదా సెంటినలీస్ తెగలతో పోలిస్తే, నికోబారీస్ ప్రజలు ఆధునిక సమాజంతో, వలసవాద సంస్కృతితో చాలా వరకు కలిసిపోయారు.

ప్రస్తుతం వీరి జనాభా 29,000 పైగా ఉంది. వీరు తమను తాము ‘హోల్చు’ (Holchu) అని పిలుచుకుంటారు, దీని అర్థం ‘స్నేహితుడు’. ప్రకృతే సర్వస్వంగా సాగే వీరి జీవన శైలి, సంస్కృతి విలక్షణంగా ఉంటుంది.  

నికోబారీస్ సమాజంలో అత్యంత ఆసక్తికరమైన అంశం వీరి కుటుంబ నిర్మాణం. వీరు ‘తుహెట్’ (Tuhet) అని పిలవబడే భారీ ఉమ్మడి కుటుంబాలుగా నివసిస్తారు. ఒకే ఇంట్లో దాదాపు 20 నుండి 30 మంది సభ్యులు కలిసి ఉంటారు.

వీరి సమాజంలో ఆస్తులపై వ్యక్తులకు వ్యక్తిగత హక్కులు ఉండవు. భూమి, కొబ్బరి తోటలు, పందులను కుటుంబం లేదా గ్రామం మొత్తం సమిష్టిగా అనుభవిస్తుంది. ప్రతి గ్రామానికి ఒక సాంప్రదాయక విలేజ్ కౌన్సిల్ ఉంటుంది, ఇది అంతర్గత సమస్యలను,తగాదాలను పరిష్కరిస్తుంది.

సముద్ర తీరాలకు సమీపంలో వీరు శాశ్వత గ్రామాలను నిర్మించుకుంటారు. వరదలు, కీటకాల నుండి రక్షణ కోసం భూమికి 5 నుండి 7 అడుగుల ఎత్తున కర్రలపై  గుండ్రని ఆకారంలో, గడ్డి కప్పులతో కూడిన పెద్ద ఇళ్లను నిర్మించుకుంటారు. పైకి వెళ్లడానికి కదిలే నిచ్చెనలను వాడుకుంటారు. 

పూర్వం వీరు సాంప్రదాయ దుస్తులు ధరించినప్పటికీ, ప్రస్తుత తరుణంలో వీరు పూర్తిగా జీన్స్, టీ-షర్టులు వంటి ఆధునిక వస్త్రధారణకు అలవాటు పడ్డారు. మోటార్ బైకులు నడపడం, ప్రభుత్వం కల్పించే రేషన్ సదుపాయాలను వాడుకోవడం వంటివి చేస్తున్నారు.

వీరు అడవిని నరకకుండా, తోటల పెంపకంలో నైపుణ్యం కలిగి ఉన్నారు. కొబ్బరి,పోకక్కాయ, అరటిపండ్లు వంటి తోటలను భారీగా సాగు చేస్తారు.పందుల పెంపకం వీరి సంపదకు, సామాజిక హోదాకు ప్రతీక. అలాగే సముద్రంతో బలమైన బంధం ఉన్నందున వీరు అద్భుతమైన జాలరులుగా పేరుపొందారు. కొబ్బరి గుజ్జు, పాండనస్ పండు, చేపలు వీరి ప్రధాన ఆహారం.

బ్రిటీష్ కాలంలో మిషనరీల ప్రభావం వల్ల దాదాపు 95% నికోబారీస్ ప్రజలు క్రైస్తవ మతాన్ని అనుసరిస్తున్నారు.
క్రైస్తవులుగా మారినప్పటికీ, వీరు తమ పూర్వీకుల నాటి ప్రకృతి శక్తులను, ఆత్మలను (Spirits) నమ్మే ఆచారాలను ఇప్పటికీ కొనసాగిస్తున్నారు.

ఈ తెగలో ఎక్కువ శాతం ప్రేమ వివాహాలే జరుగుతాయి. యువతీ యువకులు తమకు నచ్చిన భాగస్వామిని ఎన్నుకోవడానికి సమాజంలో పూర్తి స్వేచ్ఛ ఉంటుంది. ఒకవేళ ఎవరైనా ప్రేమలో పడితే, ఆ విషయం తెలిసిన వెంటనే పెద్దలు ఎలాంటి గొడవలు చేయకుండా, చాలా సహజంగా వారి పెళ్లి ఏర్పాట్లు చేస్తారు..

ఒకే ‘తుహెట్’ (వంశం) కి చెందిన అమ్మాయి, అబ్బాయి అన్నదమ్ములు, అక్కాచెల్లెళ్ల వరుస అవుతారు.కాబట్టి, తమ సొంత తుహెట్ లోపల పెళ్లి చేసుకోవడం నిషిద్ధం. ఎల్లప్పుడూ వేరే తుహెట్ కి చెందిన వారినే వివాహం చేసుకోవాలి.

సాధారణ సమాజంలో పెళ్లి తర్వాత అమ్మాయి అత్తారింటికి వెళ్తుంది. కానీ నికోబారీస్ తెగలో దీనికి పూర్తి రివర్స్ పద్ధతి ఉంటుంది. పెళ్లి తర్వాత వరుడు (పెళ్లికొడుకు) తన ఇల్లు వదిలి వధువు (పెళ్లికూతురు) ఇంటికి వెళ్లి కాపురం పెట్టాలి.

దీనికి గల కారణం ఏమిటంటే – ఏ కుటుంబంలో అయితే శ్రామిక శక్తి (పనిచేసే మనుషులు) తక్కువగా ఉంటారో, ఆ కుటుంబానికి అండగా ఉండటానికి పెళ్లికొడుకు అక్కడ స్థిరపడతాడు.వీరిలో కట్న కానుకల పట్టింపులు ఉండవు. పైగా అమ్మాయి కుటుంబానికి అబ్బాయి వైపు వారు కొంత మొత్తాన్ని లేదా బహుమతులను ఇస్తారు.

ఇక్కడ పెళ్లి అనేది ఇరు కుటుంబాల సమ్మతితో, గ్రామానికి చెందిన పెద్దల సమక్షంలో చాలా నిరాడంబరంగా ఖరారు అవుతుంది. పెళ్లి రోజు రాత్రి గ్రామంలోని ప్రజలంతా కలిసి సాంప్రదాయ నృత్యాలు చేస్తూ, పాటలు పాడుతూ రాత్రంతా ఎంతో ఉత్సాహంగా వేడుక జరుపుకుంటారు.

ఈ తెగలో స్త్రీలకు అత్యంత ఉన్నతమైన స్థానం, సమాన హక్కులు ఉంటాయి. పెళ్లికాని పిల్లలకు లేదా ఒకవేళ విడాకులు తీసుకున్నా కూడా సమాజంలో ఎలాంటి వివక్ష చూపించరు. అవసరమైతే విడాకులు తీసుకుని, చాలా సులభంగా వేరే పెళ్లి చేసుకునే స్వేచ్ఛ ఇరుపక్షాలకూ ఉంటుంది

పండుగల సమయంలో వీరు సంగీతం, సాంప్రదాయ డ్రమ్స్ దరువులకు అనుగుణంగా సామూహిక నృత్యాలు చేస్తారు. ఒకరికొకరు పందులను, కొబ్బరికాయలను బహుమతులుగా ఇచ్చుకుంటారు.

గ్రేట్ నికోబార్ ప్రాజెక్ట్ ప్రభావం

గ్రేట్ నికోబార్ దీవిలో దాదాపు 1,000 మందికి పైగా నికోబారీస్ ప్రజలు నివసిస్తున్నారు. అక్కడ రాబోతున్న భారీ మెగా పోర్ట్ ప్రాజెక్ట్ వల్ల వీరి తీరప్రాంత గ్రామాలు, కొబ్బరి తోటలు దెబ్బతినే అవకాశం ఉందని పర్యావరణ సంస్థలు ఆందోళన వ్యక్తం చేస్తున్నాయి.