Inspiration ........
ఒక సామాన్య మహిళ కలితా మాఝీ (Kalita Majhi), పశ్చిమ బెంగాల్లోని ఆస్గ్రామ్ (Ausgram) ఎస్సీ నియోజకవర్గం నుండి ఎమ్మెల్యేగా గెలిచి రికార్డు సృష్టించారు. కలితా మాఝీ రాజకీయాల్లోకి రాకముందు ఇళ్లలో పాత్రలు కడిగే పనిమనిషిగా పనిచేసేవారు. ఆమె నెలకు సుమారు ₹2,500 సంపాదిస్తూ సామాన్య జీవితం గడిపేవారు.
గుస్కరా మున్సిపాలిటీ నివాసి అయిన మాఝీ, క్షేత్రస్థాయి నుండి వచ్చిన సాధారణ వ్యక్తిగా ఆమె అభ్యర్థిత్వం అందరి దృష్టిని ఆకర్షించింది. ఎన్నికల ద్వారా సామాజిక-ఆర్థిక స్థితిగతుల్లో మార్పు సాధించవచ్చనే దానికి ఆమె విజయం ఒక అరుదైన ఉదాహరణగా నిలిచింది.
ఆమె అంతకుముందు 2021 అసెంబ్లీ ఎన్నికల్లో పోటీ చేసినప్పటికీ, తృణమూల్ కాంగ్రెస్ అభ్యర్థి అభేదానంద థాండర్ చేతిలో 11,815 ఓట్ల తేడాతో ఓడిపోయారు. అయినప్పటికీ, ఆమెకు స్థానికంగా పట్టు ఉందనే నమ్మకంతో బీజేపీ ఆమెకు మళ్ళీ అవకాశం ఇచ్చింది. ఆ నమ్మకమే ఈసారి ఆమె ఎన్నికల విజయంలో కీలక పాత్ర పోషించింది.
ఆమె గత ఐదు సంవత్సరాలుగా క్రియాశీలక రాజకీయాల్లో ఉన్నారు. తొలినాళ్లలో ఆమె పంచాయతీ ఎన్నికల్లో కూడా పోటీ చేశారు.తొలి ప్రయత్నం లో ఓడిపోయినప్పటికీ ఆమె నియోజకవర్గ ప్రజలతో నిరంతరం సంబంధాలు కలిగి ఉండేవారు. పనిమనిషిగా పనిచేస్తూనే సామాన్యుల కష్టాలను అర్థం చేసుకునే వారు.
ఈ అసెంబ్లీ ఎన్నికల్లో ఆమె 1,07,692 ఓట్లు సాధించి, తన సమీప ప్రత్యర్థి శ్యామ ప్రసన్న లోహర్ (TMC) పై 12,535 ఓట్ల మెజారిటీతో ఘనవిజయం సాధించారు.
ఇళ్లలో పనిమనిషిగా పనిచేసే ఈ సామాన్య మహిళ “మనలో ఒకరు” అనే భావన ఓటర్లలో ఆమె పట్ల సానుభూతిని, నమ్మకాన్ని పెంచింది.2021 ఎన్నికల్లో ఓడిపోయినప్పటికీ, ఆమె నియోజకవర్గాన్ని వదిలి వెళ్లలేదు. గత ఐదేళ్లుగా ప్రజల మధ్య ఉంటూ, వారి సమస్యలపై పోరాడటం ఆమెకు ప్లస్ అయ్యింది.
ఆమె భర్త ప్లంబర్గా, ఆమె గృహ కార్మికురాలిగా ఉండటంతో సామాన్య ప్రజల కష్టాలు ఆమెకు బాగా తెలుసు. ఎన్నికల ప్రచారంలో ఆమె ఎటువంటి ఆడంబరాలు లేకుండా ప్రజలతో మమేకమవ్వడం ఓటర్లను ఆకట్టుకుంది. అధికార పార్టీపై ఉన్న అసంతృప్తి, మార్పు కోరుకున్న ఓటర్లు ఆమెకు మద్దతుగా నిలిచారు. ముఖ్యంగా గ్రామీణ ప్రాంతాల్లోని పేద ఓటర్లు ఆమె వైపు మొగ్గు చూపారు.
ఒక సామాన్య మహిళకు మళ్ళీ టికెట్ ఇచ్చి ప్రోత్సహించడం ద్వారా బీజేపీ తన “అంత్యోదయ” (చివరి వరుసలో ఉన్న వ్యక్తికి కూడా అధికారం) సిద్ధాంతాన్ని బలంగా ప్రజల్లోకి తీసుకెళ్లగలిగింది. ఒక కష్టపడే మహిళగా ఆమె పట్ల మహిళా ఓటర్లలో విశేషమైన ఆదరణ లభించింది.
ఎమ్మెల్యేగా ఎన్నికైన తర్వాత ఆమె తన నియోజకవర్గంలో మెరుగైన వైద్య సదుపాయాల కోసం ఒక ఆసుపత్రి నిర్మించాలని, మౌలిక సదుపాయాలు, ఉపాధి అవకాశాలను కల్పించాలని లక్ష్యంగా పెట్టుకున్నారు.ఒక సామాన్య గృహ కార్మికురాలు శాసనసభలోకి అడుగుపెట్టడం క్షేత్రస్థాయి ప్రజాస్వామ్యానికి గొప్ప ఉదాహరణగా నిలిచింది.
