Subramanyam Dogiparthi ……………………
గొప్ప సందేశాత్మక ప్రేమకావ్యం . సప్తపది సినిమాలో బ్రాహ్మణ యువతి , దళిత యువకుడి ప్రేమ కధ . అయితే ఈ సినిమాలో వాళ్ళకు వాళ్ళుగా ఎలాంటి సాహసం చేయరు . బొంబాయి సినిమాలో బ్రాహ్మణ యువకుడు , ముస్లిం అమ్మాయి . సామాజిక కట్టుబాట్ల సంకెళ్ళను వదిలించుకుని లేచిపోతారు.
ఈ ‘సీతాకోకచిలుక’ సినిమాలో బ్రాహ్మణ యువకుడు , క్రైస్తవ యువతి. యువతి అన్న డేవిడ్ గ్రామంలో మోతుబరి,షైలాక్ లాంటి వడ్డీ వ్యాపారి, మత ఛాందసుడు. యువకుడి తల్లి పేద సంగీత టీచర్. బలహీనురాలు. యువతీ యువకులు పారిపోతారు. క్లైమాక్స్ లో క్రిస్టియన్ ఫాదర్ జగ్గయ్య మత ఛాందసుడయిన డేవిడ్ కు మతం కన్నా మానవత్వం, ప్రేమ గొప్పదని కన్విన్స్ చేయటానికి ప్రయత్నిస్తాడు.
సప్తపది సినిమాలో యాజులు పాత్రను ఈ సీతాకోకచిలుక సినిమాలో క్రిస్టియన్ ఫాదర్ పోషిస్తాడు. ఇద్దరూ మతం కన్నా ప్రేమ, మానవత్వం గొప్ప అని ఉద్బోధిస్తారు. అయితే సీతాకోకచిలుక సినిమాలో గొప్ప ముగింపు ఏమిటంటే హీరో హీరోయిన్లు తమ మతాలకు గుర్తులయిన క్రాసుని, జంధ్యాన్నితీసేసి ముందుకు సాగిపోతారు. వీళ్ళను చంపటానికి వెతుక్కుంటూ వచ్చిన గ్రామస్తులు నిశ్చేష్టులయి చూస్తూ ఉండిపోతారు.
ఈ సినిమా అఖండ విజయానికి కారణాలలో ఒకటి ఇళయరాజా సంగీతం, వేటూరి సాహిత్యం, వాణీ జయరాం , సుశీలమ్మ , బాలసుబ్రమణ్యంల గాత్ర మహిమ. ‘మాటే మంత్రము మనసే బంధము ఈ మమతే ఈ సమతే మంగళ వాద్యము’ పాట ఎంత శ్రావ్యంగా ఉంటుందో చెప్పలేం. మరో గొప్ప పాట.
సినిమాకు ఐకానిక్ సాంగ్’ సాగరసంగమమే ప్రణయ సాగర సంగమమే’. ఒకసారి డ్యూయెట్టుగా , మరోసారి హీరోయిన్ ఒక్కతే టీచర్ దగ్గర పాడుతుంది. ఇక్కడ పాడినప్పుడు’ సాగరసంగమమే ప్రణవ సాగరసంగమమే జానకి కన్నుల జలధితరంగం’ అని పాడుతుంది. అద్భుతమైన పాట . ఈ పాటలో ముచ్చెర్ల అరుణ శాస్త్రీయ నృత్యం కూడా చాలా అందంగా ఉంటుంది.
నృత్య దర్శకుడు శేషుని అభినందించకుండా ఉండలేరు. మరో శ్రావ్యమైన పాట ‘అలలు కలలు’. మరో చక్కటి డ్యూయెట్ ‘మిన్నేటి సూరీడు వచ్చెనమ్మా’ పాట చాలా బాగుంటుంది . ఇంకొకటి హీరోయిన్ని టీజ్ చేసే పాట పాడింది పాడింది ‘పట్నాల కాకి’ రొటీనే అనుకోండి.
సినిమా అంతా ఇళయరాజా బ్యాక్ గ్రౌండ్ మ్యూజిక్ చెవుల్లో గింగురుమంటూనే ఉంటుంది. ఈతరం బోయపాటి శీను వంటి ఢాంఢాం దర్శకులకు పనిచేసే ఢాంఢాం సంగీత దర్శకులు ఇలాంటి సినిమాలను చూస్తే బ్యాక్ గ్రౌండ్ మ్యూజిక్ గురించి కాస్తయినా తెలుస్తుంది.
రచయిత జంధ్యాల ఆకట్టుకునే సంభాషణలు సమకూర్చారు. శంకరాభరణం నిర్మాత ఏడిద నాగేశ్వరరావే ఈ సినిమాను తీశారు. టైటిల్సులో అల్లు అరవింద్ కు ఆర్ధికాభివందనలు అని వేస్తారు. అంటే ఫైనాన్సింగ్ చేసాడన్నమాట. హీరోహీరోయిన్లుగా కార్తీక్ , ముచ్చెర్ల అరుణ ఇద్దరూ కొత్తవారే.
తమిళ సినిమా ఆధారంగా మన తెలుగు సినిమాని తీసారు. తమిళంలో హీరోయిన్ పాత్రని రాధ వేసింది. తెలుగులో ముచ్చర్ల అరుణ బాగా నటించింది. ముగ్ధగా, పొగరుబోతుగా , పట్టుదలగల యువతిగా బాగా నటించింది. దర్శకుడు భారతీరాజా అలా నటింపచేసారు . ఈ సినిమాలో గుర్తుండిపోయే పాత్ర సిల్క్ స్మితది. వాంప్ పాత్రలకు, డాన్సర్ల పాత్రలకు పెట్టింది పేరయిన సిల్క్ స్మిత ఉదాత్తమైన పాత్రలో రాణించింది.
తర్వాత శరత్ బాబు . మోతుబరిగా , అహంకారిగా , మత ఛాందసుడిగా , క్రూరంగా బాగా నటించారు.జగ్గయ్యకు ఈ పాత్ర చిన్నదే అయినా ప్రేక్షకుడు మరచిపోలేడు. హీరో తల్లిగా డబ్బింగ్ జానకి పేదరాలిగా , ఒక్కగానొక్క కొడుకు కోసం తాపత్రయపడే తల్లిగా తన పాత్రలో లీనమైనారు.
ఇంక ఆలీ. ఈ సినిమాకు ముందే రెండు సినిమాల్లో కనిపించినా ఈ సీతాకోకచిలుక ద్వారానే పాపులర్ అయ్యాడు.దీనికి ముందు ప్రాణం ఖరీదు ,నిప్పులాంటి నిజం సినిమాల్లో నటించాడు.ఈ సినిమాలో నటనకు బెస్ట్ చైల్డ్ ఆర్టిస్ట్ అవార్డు కూడా గెలుచుకున్నాడు . కొత్త కుర్రపిల్లలతో తీసిన ఈ సినిమా పది సెంటర్లలో వంద రోజులు ఆడి రికార్డు నెలకొల్పింది.
మొత్తం క్రెడిట్ భారతీరాజాకే చెందాలి . స్క్రీన్ ప్లే ,దర్శకత్వం, పాటల చిత్రీకరణ అద్భుతంగా ఉంటాయి. జాతీయ స్థాయిలో ఉత్తమ ప్రాంతీయ చిత్రం అవార్డు వచ్చింది . ఉత్తమ చిత్రంగా నంది అవార్డు కూడా వచ్చింది. ఎవర్ గ్రీన్ మ్యూజికల్ మేజిక్. ఈ సినిమాలోని పాటలు నాకు బాగా ఇష్టం.
నా గుంటూరు సంసారం తొలిరోజుల్లో ఆరు వందల రూపాయలకు కొనుక్కున్న ఓ నేషనల్ పానాసోనిక్ రికార్డు ప్లేయర్ ఉండేది. కేసెట్ ప్లేయర్ అన్నమాట. ఈ పాటలతోనే నా డే ప్రారంభం అయ్యేది. అలా ఈ సినిమాతో ఓ ప్రత్యేక అనుబంధం కూడా ఉంది నాకు.
తొమ్మిదవ అంతర్జాతీయ ఫిలిం ఫెస్టివల్లో ప్రదర్శితమైంది. భారతీరాజాయే హిందీలో కుమార గౌరవ్ , పద్మినీ కొల్హాపురి,డేనీ తో తీసారు. టైటిల్సు నుండి శుభం దాకా ప్రతి ఫ్రేమ్ ను బి. కణ్ణన్ చక్కగా చిత్రీకరించారు. వంశీ ఈ చిత్రానికి అసోసియేట్ దర్శకుడిగా చేశారు. యు ట్యూబ్ లో సినిమా ఉంది .. చూడని వారు చూడవచ్చు.. చూసినవారు చూడవచ్చు. టీనేజ్ పిల్లల్లో ప్రేమను ప్రోత్సాహించేలా ఈ సినిమా ఉందని అప్పట్లో విమర్శలు వచ్చాయి.
