“దశమహావిద్యలకు అధి దేవతలు వారేనా ?

supreme deities…………

తంత్ర శాస్త్రం (Tantra Shastra) లో ప్రప్రథమంగా చెప్పుకోదగినవి, అత్యంత శక్తివంతమైనవి “దశమహావిద్యలు” మాత్రమే.ఈ పది విశిష్టమైన మంత్ర విద్యలకు పది మంది వేర్వేరు దేవతలు అధిదేవతలుగా ఉన్నారు.

ఆ దేవతలు కాళీ, తారా, త్రిపురసుందరి (షోడశి), భువనేశ్వరి, భైరవి, ఛిన్నమస్తా, ధూమావతి, బగలాముఖి, మాతంగి, కమలా దేవి.. ఆదిపరాశక్తి  భక్తుల విభిన్న కోరికలను తీర్చడానికి ధరించిన పది రూపాలు ఇవి. 
తంత్ర శాస్త్రంలో సాధన చేసే ఏ మంత్రానికైనా, విద్యకైనా ఈ దశమహావిద్యలే మూలాధారం.

అందుకే ఆ దేవతలను ఉపాసించడం వల్ల ఐశ్వర్యం, జ్ఞానం, శత్రునాశనం, అంతిమంగా మోక్షం లభిస్తుందని నమ్ముతారు. తాంత్రిక సాధనలో విశ్వాన్ని నియంత్రించే పది శక్తులుగా ఈ దేవతలను పూజిస్తారు. ప్రతి రూపానికి ఒక ప్రత్యేక విశిష్టత, మంత్రం , సాధనా విధానం ఉంటాయి. 

 కాళీ  – కాలానికి అధిదేవత….నల్లని శరీరం, విరబోసిన జుట్టు, ముండమాలతో రుద్ర రూపంలో ఉంటుంది.ఈమె కాలానికి, మార్పునకు  సర్వవినాశనానికి అధిపతి. మనిషిలోని అహంకారాన్ని నాశనం చేస్తుంది.
తారా– రక్షకురాలు…..నీలి రంగు శరీరం, శివుని రొమ్ముపై నిలబడి ఉన్న రూపం. కాళీ మాతలాగే కనిపిస్తుంది. ఈమె భక్తులను సంసార సాగరం (కష్టాల) నుండి తరింపజేస్తుంది. వాక్‌చాతుర్యాన్ని, జ్ఞానాన్ని ప్రసాదిస్తుంది.

 త్రిపురసుందరి / షోడశి – లలితా దేవి……పదహారేళ్ల ప్రాయం గల అత్యంత సౌందర్యవతి అయిన దేవి.ఈమె ముల్లోకాలకు రాణి. ఐశ్వర్యాన్ని, మోక్షాన్ని, సకల భోగాలను ఇస్తుంది.

భువనేశ్వరి  – విశ్వమాత………చేతుల్లో పాశం, అంకుశం ధరించి, ప్రసన్న ముఖంతో వెలిగిపోయే రూపం.
ఈమె భౌతిక విశ్వాన్ని (సృష్టిని) సృష్టించి, పోషించే జగన్మాత. అంతర్గత శక్తిని ఇస్తుంది.

 భైరవి  – రుద్ర స్వరూపిణి……… రక్తాంబరాలు (ఎరుపు వస్త్రాలు) ధరించి, మెడలో నర కపాల మాల కలిగి ఉంటుంది.వినాశనానికి, భయానికి ప్రతీక. మనసులోని చెడు ఆలోచనలను, శత్రు భయాన్ని నాశనం చేస్తుంది.

ఛిన్నమస్తా – త్యాగ స్వరూపిణి………..తన సొంత తలను తానే నరుక్కుని, చేతిలో పట్టుకుని, మెడ నుండి వచ్చే రక్తాన్ని తాగుతున్న భయానక రూపం.  లైంగిక శక్తిని ఆధ్యాత్మిక శక్తిగా మార్చడానికి,  స్వార్థ త్యాగానికి (అహాన్ని చంపుకోవడానికి) ప్రతీక.

 ధూమావతి  – విధవ స్వరూపం…………..ముసలి వయస్సు, చిరిగిన బట్టలు, కాకి వాహనంపై ఉండే అమంగళకరమైన రూపం.ఈమె ఒంటరితనానికి, దరిద్రానికి, శోకానికి అధిదేవత. కష్ట సమయాల్లో ఓర్పుగా ఎలా ఉండాలో నేర్పుతుంది.

బగలాముఖి – స్తంభన శక్తి …….పసుపు రంగు వస్త్రాలు, ఆభరణాలు ధరించి, శత్రువు నాలుకను పట్టుకుని కొడుతున్న రూపం. ఈమె శత్రువుల వాక్కును, కదలికలను స్తంభింపజేస్తుంది (నిలిపివేస్తుంది). కోర్టు కేసులు, శత్రు బాధల నివారణకు ఈమెను పూజిస్తారు.

మాతంగి  – కళల దేవత…..ముదురు ఆకుపచ్చ రంగు శరీరం, చేతిలో వీణ పట్టుకుని ఉంటుంది (తాంత్రిక సరస్వతి). సకల విద్యలు, సంగీతం, కళలు,  లౌకిక విజ్ఞానాన్ని ప్రసాదిస్తుంది.

కమలా దేవి  – సంపద ప్రదాత…..తామరపువ్వుపై కూర్చుని, ఏనుగుల అభిషేకమందుకునే రూపం (తాంత్రిక లక్ష్మి). ఈమె సంపద, వైభవం  ఆనందాన్ని ఇస్తుంది.

పరమ శివుని భార్య అయిన సతీదేవి తండ్రి దక్షప్రజాపతి తలపెట్టిన యజ్ఙంకు  వెళ్ళడానికి  నిర్ణయించుకుని ఆ విషయం పరమ శివునితో చెప్పగా, శివుడు దక్షప్రజాపతి ఆంతర్యము ఎరిగినవాడై పిలుపు లేని చోటుకు వెళ్ళరాదని వారించాడు. వెంటనే సతీదేవి కోపంతో  తన నిజరూపమైన ఆదిపరాశక్తి అవతారం దాల్చి తన శక్తితో 10 అవతారాలతో 10 వైపులా శివుని అడ్డుకుందని పురాణ కథనం.