A Rare Woman……………………………………….
ఆస్తిపాస్తులు … డబ్బు పుష్కలంగా ఉన్నప్పటికీ చాలామంది సామాజిక సమస్యల పట్ల స్పందించరు. కనీసం చిన్న చిన్న దానాలు కూడా చేయరు. కానీ మెకంజీ స్కాట్ అలాంటి వ్యక్తి కాదు. తనకున్న కోట్లకొలది సొమ్మును దానం గా ఇస్తున్నారు.
సామాజిక సమస్యల పరిష్కారానికి తనవంతు సహాయం చేస్తున్నారు. మెకంజీ స్కాట్ లాంటి వాళ్ళు దేశానికి ఒకరు ఉంటే చాలు. ఆ దేశంలో అవిద్య, పేదరికం కొద్దిగా నైనా తగ్గుముఖం పడతాయి.
జూలై 10, 2025 నాటికి, ఫోర్బ్స్ రియల్ టైమ్ బిలియనీర్ల జాబితాలో మెకెంజీ స్కాట్ 60వ స్థానంలో ఉన్నారు. ఆమె యునైటెడ్ స్టేట్స్‌లో 3వ అత్యంత సంపన్న మహిళ కూడా. ఆమె నికర విలువ $41.4 బిలియన్లుగా అంచనా వేశారు. గత ఐదు సంవత్సరాలలో మెకంజీ స్కాట్ $19 బిలియన్లను దానం చేశారంటే అదేమీ చిన్న విషయం కాదు.
ఆమె కీర్తిప్రతిష్టలు ఆశించి ఇలాంటి దానాలు చేయడం లేదు. మనసున్న మనిషిగా,బాధ్యత గల రచయిత్రి గా, సమాజం లో మార్పు కోరే మనిషిగా తనకు సంక్రమించిన ఆస్తులను దానం చేస్తున్నారు. మెకంజీ స్కాట్ లాంటి వ్యక్తులు అరుదుగా ఉంటారు.లక్షకో,కోటికో కొద్దిమంది పుడుతుంటారు.
అసలు ఎవరీ మెకంజీ స్కాట్ ?
మెకంజీ స్కాట్ అమెజాన్ వ్యవస్థాపకుడు జెఫ్ బెజోస్ మొదటి భార్య. అతను జల్సా పురుషుడని గ్రహించి విడాకులు ఇచ్చింది. కాలిఫోర్నియాలోని శాన్ ఫ్రాన్సిస్కో పుట్టి పెరిగిన మెకంజీ స్కాట్ 1992 లో ప్రిన్స్టన్ విశ్వవిద్యాలయం లో డిగ్రీ వరకు చదువుకుంది.
మెకంజీ .. జెఫ్ 1992 లో మొదటిసారిగా కలుసుకున్నారు, ఇద్దరూ హెడ్జ్ ఫండ్ డిఇ షా లో పనిచేశారు.93 లో వివాహం చేసుకున్నారు. 1994 లో సీటెల్కు వెళ్లారు. జెఫ్ బెజోస్ 1994 లో తమ సీటెల్ గ్యారేజీలో ‘అమెజాన్’ను స్థాపించారు.ఆ వ్యాపారం అనూహ్యమైన వృద్ధి సాధించి … బహుముఖంగా విస్తరించింది.
దీంతో బెజోస్ మల్టీ బిలియనీర్ అయ్యారు. బెజోస్ తో వివాహం అయిన ఇరవై అయిదు ఏళ్ళ తరువాత మెకంజీ దంపతులు 2019 జనవరిలో విడాకులు తీసుకున్నారు. వీరిద్దరికి ముగ్గురు అబ్బాయిలు. ఒక అమ్మాయి (దత్తు తీసుకున్నారు) బెజోస్ మామూలు విలాస పురుషుడు కాదు.. ఈ క్రమంలోనే కొత్త స్నేహాల మోజులో పడ్డాడు. అమెరికన్ న్యూస్ యాంకర్ లారెన్ శాంచెజ్‌ తో పరిచయాలు పెరిగి ఆమె తో తిరగడం మొదలెట్టాడు .
ఇది తెల్సి.. సహించలేని మెకంజీ విడాకులకు దరఖాస్తు చేసింది. కోర్టు బయట ఒప్పందం కుదిరింది. 38 బిలియన్ డాలర్ల కు ఒప్పందం ఖరారు అయింది. అమెజాన్ షేర్లలో అనూహ్యంగా పెరుగుదల రావడంతో ఆమె ఆస్తి 60 బిలియన్ డాలర్లకు వృద్ధి చెందింది. విడాకుల ఒప్పందం ప్రకారం, 49 ఏళ్ల స్కాట్ కు సుమారు 19.7 మిలియన్ అమెజాన్.కామ్ షేర్లు లభించాయి. 38.3 బిలియన్ డాలర్ల విలువైన కంపెనీలో ఆమెకు నాలుగు శాతం వాటా వచ్చింది.
ఒక్కసారిగా ఆమె స్టేటస్ మారిపోయింది. విడాకుల ద్వారా వచ్చిన సొమ్మును సద్వినియోగం చేయాలని భావించింది. కోవిడ్‌-19 బాధితులను ఆదుకునేందుకు మెకంజీ భారీ వితరణ కార్యక్రమాన్ని చేపట్టారు. యూఎస్‌లో ఆరోగ్యం, ఆహారం, ఆర్థికంగా సవాళ్లు ఎదుర్కొంటున్న ప్రజలకు సహాయంగా 384 సంస్థలకు పెద్దఎత్తున నిధులు అందజేశారు.
ఫుడ్‌ బ్యాంకులు, ఎమర్జెన్సీ రిలీఫ్ ఫండ్స్‌కు 4.1 బిలియన్ డాలర్లను ఇచ్చారు. దీర్ఘకాలిక రుణ బాధల నుంచి విముక్తి, ఉపాధి శిక్షణ, న్యాయ సంరక్షణ తదితర ఖర్చుల కోసం మరికొన్ని నిధులను అందించారు. జెఫ్ బెజోస్ నుంచి విడిపోయినప్పుడు తన సంపదలో అత్యధిక భాగాన్ని వితరణకు ఖర్చు పెడతానని ప్రకటించారు.
ఆ వితరణ కోసం 6,500 స్వచ్చంద సంస్థలను పరిశీలించాక 384 ఆర్గనైజేషన్స్‌ను ఎంపిక చేసారు. ఆహారం, జాతి వివక్ష, పేదరికం తదితర అంశాలకు ప్రాధాన్యత ఇస్తూ నిధులను విడుదల చేశారు. ఉన్నత విద్యా సంస్థలు, గిరిజన కళాశాలలు, ఆహార బ్యాంకులు, ప్రజారోగ్యం, పర్యావరణ పరిరక్షణ, సమానత్వం తదితర అంశాలపై దృష్టి పెట్టిన సంస్థలకు మెకంజీ ఆర్ధిక సహాయం చేశారు.
కాగా విలాస పురుషుడుగా పేరొందిన జెఫ్ బెజోస్.. గత కొంతకాలంగా తన జల్సాల కోసం పెద్ద మొత్తంలో ఖర్చు చేస్తున్నాడు.ప్రస్తుతం తన గర్ల్ ఫ్రెండ్ లారెన్ సాంచెజ్ తో తిరుగుతూ ఆ మధ్య బెవర్లీ హిల్స్ లో అత్యంత విలాసవంతమైన భవనాన్ని 165 మిలియన్ డాలర్లు (1150 కోట్లు) పెట్టి కొనుగోలు చేశాడు.దీంతో పాటు వాష్టింగ్టన్ డీసీ లాంటి అమెరికన్ తీర ప్రాంతాల్లో జెఫ్ బెజోస్ కు మరికొన్ని ఖరీదైన భవనాలున్నాయి.
జూన్ 27, 2025న ఇటలీలోని వెనిస్‌లో జెఫ్ బెజోస్ లారెన్ సాంచెజ్‌ను వివాహం చేసుకున్నాడు. భారీ ఎత్తున జరిగిన ఈ వివాహానికి $50 మిలియన్లు ఖర్చయినట్లు సమాచారం.జెఫ్ బెజోస్ నుండి విడాకులు తీసుకున్న తర్వాత మెకెంజీ స్కాట్ మార్చి 2021లో డాన్ జ్యువెట్‌ను వివాహం చేసుకుంది.అయితే, వారి వివాహం 2023లో విడాకులతో ముగిసింది.
