Ravi Vanarasi………………..
గాస్టిలుగచ్… ఈ పేరు వినగానే మన కళ్ళ ముందు ఒక అద్భుతమైన దృశ్యం మెదులుతుంది. సముద్రంలోంచి పైకి లేచిన ఒక చిన్న ద్వీపం. దానిపై ఒక పురాతన హెర్మిటేజ్.. దాన్ని చేరుకోవడానికి సముద్రంపై నిర్మించన ఒక రాతి వంతెన.. ఇది చూడటానికి ఒక సినిమా సెట్టింగ్ లాగా కనిపిస్తుంది.. కానీ ప్రకృతి సృష్టించిన ఒక సజీవ చిత్రం.
ఈ ద్వీపం స్పెయిన్‌లోని బిస్కే తీరంలో ఉంది. ఇది కేవలం ఒక పర్యాటక ప్రదేశం మాత్రమే కాదు, అనేక శతాబ్దాల చరిత్రను, ఎన్నో కథలను, అంతులేని ఆధ్యాత్మిక అనుభూతిని తనలో ఇముడ్చుకున్న ఒక పవిత్ర స్థలం.గాస్టిలుగచ్ అంటే బాస్క్ భాషలో “కోటల సముదాయం” అని అర్థం. ఈ పేరుకు తగ్గట్టుగానే, ఈ ద్వీపం ఒక రక్షణ కోటలాగా, సముద్రపు ఒడిలో ఎత్తైన కొండపై గంభీరంగా నిలబడి ఉంటుంది.
ఇక్కడ ఉన్న సన్ జువాన్ డి గాస్టిలుగచ్ (San Juan de Gaztelugatxe) హెర్మిటేజ్ చరిత్ర 10వ శతాబ్దం నాటిది అంటారు. నిజానికి ఈ ప్రాంతం గురించి 11వ శతాబ్దంలో ఒక డాక్యుమెంటరీలో మొదటిసారి ప్రస్తావించారు.ఈ హెర్మిటేజ్ మొదట బెనడిక్టైన్ సన్యాసులకు చెందినది. కాలక్రమేణా, ఇది ఒక ప్రసిద్ధ పుణ్యక్షేత్రంగా మారింది.
సన్యాసుల తర్వాత ఈ గుడిని నైట్స్ టెంప్లర్ (Knights Templar) తమ ఆధీనంలోకి తీసుకున్నారు. ఆ కాలంలో ఇది ఒక రక్షణ దుర్గంగా కూడా ఉపయోగపడింది. 14వ శతాబ్దంలో ఈ ప్రాంతాన్ని దోపిడీ చేసేందుకు వచ్చిన సాయుధ దొంగలను ఎదిరించి, పోరాడిన గాస్టిలుగచ్ కథలు ఆ ప్రాంతంలో చాలా ప్రసిద్ధి చెందాయి.
ఎన్నో యుద్ధాలను, 
దాడులను, అగ్ని ప్రమాదాలను తట్టుకుని ఈ నిర్మాణం నిలబడింది. ఈ గుడి 1593లో ఆంగ్ల నావికుల దోపిడీకి గురైంది ఆ తర్వాత చాలా సార్లు మళ్ళీ నిర్మితమైంది. ప్రస్తుతం మనం చూస్తున్న హెర్మిటేజ్ పునఃనిర్మాణాలలో చివరిది. ఇది ఒక చిన్నపాటి, సుందరమైన కట్టడం. లోపల చాలా నిరాడంబరంగా ఉంటుంది.బయట నుండి చూసినప్పుడు సముద్రానికి, ఆకాశానికి మధ్యలో, ఒక ఎత్తైన శిఖరంపై ఉన్నట్లు కనిపిస్తుంది.గాస్టిలుగచ్ ద్వీపానికి వెళ్ళడానికి భూభాగం నుండి ఒక రాతి వంతెనను నిర్మించారు. ఈ వంతెన ఇరుకైనదిగా ఉంటుంది. సముద్రపు అలలు అటు ఇటు వంతెన గోడను తాకుతుంటాయి.
ఉదయాన్నే సముద్రం ప్రశాంతంగా ఉన్నప్పుడు ఈ వంతెనపై నడవడం ఒక మధురానుభూతిని ఇస్తుంది. అయితే, అలలు ఉవ్వెత్తున ఎగసిపడినప్పుడు ఈ వంతెనపై నడవడం ఒక సాహసమే. ఈ వంతెన దాటిన తర్వాత అసలైన సవాలు మొదలవుతుంది. హెర్మిటేజ్‌కు చేరుకోవడానికి సుమారు 230 మెట్లు ఎక్కాలి. ఈ మెట్లు కొండ ఆకృతికి అనుగుణంగా వంకర టింకరగా, పైకి పోతూ ఉంటాయి.
ప్రతి మెట్టు ఎక్కుతున్నప్పుడు, చుట్టూ ఉన్న ప్రకృతి సౌందర్యం మన అలసటను మర్చిపోయేలా చేస్తుంది. ఒక వైపు సముద్రపు అంతులేని నీలి రంగు, మరోవైపు కొండల పచ్చదనం, ఆకాశం నీలి రంగులో కలిసిపోయే ఆ దృశ్యం వర్ణించలేనిది. మెట్ల దారిలో అక్కడక్కడా విశ్రాంతి తీసుకోవడానికి చిన్నపాటి రాతి బెంచీలు ఉంటాయి. అక్కడ కూర్చుని చుట్టూ ఉన్న ప్రకృతిని ఆస్వాదించడం ఒక అద్భుతమైన అనుభూతిని కలిగిస్తుంది.
ఈ ప్రదేశానికి కేవలం పర్యాటకులు మాత్రమే కాదు, భక్తులు కూడా వస్తుంటారు. ముఖ్యంగా సెయింట్ జాన్ స్నానాల సంప్రదాయంలో భాగంగా, ఇక్కడికి యాత్రికులు పెద్ద సంఖ్యలో వస్తారు. ఒకసారి హెర్మిటేజ్‌కు చేరుకున్నతర్వాత, ఒక ప్రత్యేక సంప్రదాయం ఉంది. అదేమిటంటే, గుడి గంటను మూడు సార్లు మోగించి, ఒక కోరిక కోరుకుంటారు. ఇలా చేయడం వల్ల ఆ కోరిక నెరవేరుతుందని ఇక్కడి ప్రజల నమ్మకం.
గంట మోగించే ప్రతిసారీ సముద్రం మీద, కొండల మీద దాని శబ్దం ప్రతిధ్వనిస్తుంది. ఇది ఒక ప్రత్యేకమైన ఆధ్యాత్మిక అనుభూతినిస్తుంది.ఈ ప్రదేశం గురించి అనేక కథలు ప్రచారంలో ఉన్నాయి. ఒక కథనం ప్రకారం, సెయింట్ జాన్ ది బాప్టిస్ట్ ఈ ప్రాంతాన్ని సందర్శించారని, ఆయన మెట్ల మార్గంలో ప్రతి అడుగులోనూ అద్భుతాలు సృష్టించారని చెబుతారు.
ఇటీవలి కాలంలో గాస్టిలుగచ్ ప్రపంచవ్యాప్తంగా మరింత ప్రాచుర్యం పొందింది. ‘గేమ్ ఆఫ్ థ్రోన్స్’ సిరీస్‌లో ఈ ప్రదేశాన్ని “డ్రాగన్‌స్టోన్” కోటగా చూపించారు. డ్రాగన్‌ స్టోన్ ఒక పురాతన కోట, ఇది ద్వీపంపై ఉంటుంది. కథలో ప్రధాన పాత్రధారులలో ఒకరైన డేనెరిస్ టార్గారియన్ పూర్వీకుల నివాసం. సిరీస్‌లో చూపించిన వంతెన, మెట్ల దారి నిజంగా గాస్టిలుగచ్‌లోనివే. సిరీస్ తర్వాత ప్రపంచం నలుమూలల నుండి పర్యాటకులు ఈ ప్రదేశాన్ని సందర్శించడం మొదలుపెట్టారు.
“గేమ్ ఆఫ్ థ్రోన్స్” అభిమానులకు ఇది ఒక పుణ్యక్షేత్రం లాంటిది. సిరీస్ చూసిన వారికి, గాస్టిలుగచ్ మరింత ప్రత్యేకం అనిపిస్తుంది.గాస్టిలుగచ్ ని సందర్శించడానికి సుమారు 2-3 గంటల సమయం పడుతుంది. ముఖ్యంగా మెట్లు ఎక్కడానికి, దిగడానికి సమయం పడుతుంది.పర్యాటకుల రద్దీ ఎక్కువగా ఉండే కాలంలో, ప్రవేశం కోసం ఆన్‌లైన్‌లో టిక్కెట్లు బుక్ చేసుకోవడం మంచిది. ఇది ఉచితమే అయినా, రద్దీని నియంత్రించడానికి ఈ వ్యవస్థను ఏర్పాటు చేశారు. ఒక మర్చిపోలేని అనుభూతి నిచ్చే ప్రయాణం ఇది.
