Blockbuster Movie…
“ఉరి: ది సర్జికల్ స్ట్రైక్” (Uri: The Surgical Strike – 2019) భారత సైన్యం 2016లో పాక్ ఆక్రమిత కాశ్మీర్‌లో జరిపిన సర్జికల్ స్ట్రైక్స్ ఆధారంగా తెరకెక్కిన ఒక అత్యంత ఉత్కంఠభరితమైన వార్ యాక్షన్ డ్రామా. ఆదిత్య ధర్ దర్శకత్వంలో విక్కీ కౌశల్ ప్రధాన పాత్రలో నటించిన ఈ చిత్రం బాక్సాఫీస్ వద్ద బ్లాక్‌బస్టర్ విజయాన్ని సాధించడమే కాకుండా జాతీయ అవార్డులను కూడా గెలుచుకుంది. ఈ సినిమా ZEE5 లో హిందీతో పాటు తెలుగు డబ్బింగ్ వెర్షన్ కూడా అందుబాటులో ఉంది.
కథాంశం
2016 సెప్టెంబర్‌లో జమ్మూ కాశ్మీర్‌లోని ఉరి (Uri) ప్రాంతంలో ఉన్న భారత సైనిక స్థావరంపై ఉగ్రవాదులు దాడి చేస్తారు. ఈ దాడిలో 19 మంది భారత జవాన్లు వీరమరణం పొందుతారు. ఈ దాడికి ప్రతీకారంగా, సరిహద్దు దాటి పాక్ ఆక్రమిత కాశ్మీర్‌లోని ఉగ్రవాద శిబిరాలను ధ్వంసం చేయడానికి భారత ప్రభుత్వం ఒక రహస్య ఆపరేషన్ (సర్జికల్ స్ట్రైక్) కు ప్రణాళిక రచిస్తుంది.
ఈ ప్రమాదకరమైన మిషన్‌కు పారా స్పెషల్ ఫోర్సెస్ కమాండో మేజర్ విహాన్ సింగ్ షెర్గిల్ (విక్కీ కౌశల్) నాయకత్వం వహిస్తాడు. ఈ ఆపరేషన్‌ను విహాన్ బృందం ప్రాణాలకు తెగించి ఎలా విజయవంతం చేసింది అనేదే ఈ చిత్ర కథ.
ఆర్మీ ఆఫీసర్ విహాన్ పాత్రలో విక్కీ కౌశల్ జీవించారు.పలు సన్నివేశాల్లో ఆయన బాగా నటించారు.జాతీయ భద్రతా సలహాదారు గోవింద్ భరద్వాజ్ పాత్రలో పరేష్ రావల్, యామీ గౌతమ్, మోహిత్ రైనా, కీర్తి కుల్హారి తమ పాత్రలకు పూర్తి న్యాయం చేశారు.
హాలీవుడ్ స్థాయికి ఏమాత్రం తగ్గకుండా యుద్ధ సన్నివేశాలను, ముఖ్యంగా సింగిల్-షాట్ యాక్షన్ సీన్లను చాలా సహజంగా, గ్రిప్పింగ్‌గా చిత్రీకరించారు.
ఇది అందరికీ తెలిసిన నిజ జీవిత సంఘటన కావడంతో, క్లైమాక్స్‌లో ఏం జరుగుతుందో ప్రేక్షకులకు ముందే తెలుసు. వాస్తవ కథకు సినిమాటిక్ హంగులు అద్దడానికి జోడించిన కొన్ని సన్నివేశాలు (ఉదాహరణకు గరుడ డ్రోన్ ఎపిసోడ్) కొంచెం అతిగా అనిపిస్తాయి.
ఇది కేవలం ఒక వార్ యాక్షన్ సినిమా మాత్రమే కాదు, ఇందులో సైనికుల కుటుంబాలు అనుభవించే వేదన, త్యాగం, దేశభక్తితో కూడిన అత్యంత భావోద్వేగభరితమైన సన్నివేశాలు ప్రేక్షకుల కళ్లను చెమర్చేలా చేస్తాయి.
మేజర్ విహాన్ తల్లి అల్జీమర్స్ (మతిమరుపు) వ్యాధితో బాధపడుతుంటుంది. కొడుకు దేశ సరిహద్దుల్లో ప్రాణాలకు తెగించి పోరాడుతుంటే, తల్లి మాత్రం గత జ్ఞాపకాల్లో ఉండిపోవడం, కొడుకును గుర్తుపట్టలేకపోవడం చూసేవారికి ఎంతో బాధ కలిగిస్తుంది. ఈ సన్నివేశాలన్నీ ప్రేక్షకులను ఆకట్టుకుంటాయి.
భారత సైనికులపై ఉగ్రవాదులు అత్యంత క్రూరంగా దాడి చేసి కాల్చి చంపే సన్నివేశం ప్రేక్షకులలో తీవ్రమైన ఆవేదనను, ఆగ్రహాన్ని రగిలిస్తుంది. ఆ మరణాలు సినిమాకు బలమైన ఎమోషనల్ డ్రైవ్‌గా మారుతాయి.యుద్ధంలో భర్తలను కోల్పోయిన భార్యలు, తండ్రులను కోల్పోయిన పిల్లల నిశ్శబ్ద రోదనను దర్శకుడు ఎక్కడా అతి లేకుండా చాలా సహజంగా, హృదయానికి హత్తుకునేలా చూపించారు.
సర్జికల్ స్ట్రైక్ విజయవంతంగా ముగించుకుని తిరిగి వచ్చాక, ప్రాణాలతో బయటపడిన సైనికులు జరుపుకునే ఆనందం వెనుక.. తాము కోల్పోయిన సహచరులను తలుచుకుంటూ విహాన్ పడే భావోద్వేగం గర్వంతో పాటు కన్నీళ్లను తెప్పిస్తుంది.ఈ సెంటిమెంట్ సన్నివేశాలే “ఉరి” సినిమాను కేవలం ఒక యాక్షన్ థ్రిల్లర్‌గా కాకుండా, ప్రతి భారతీయుడి గుండెను తాకే ఎమోషనల్ చిత్రంగా నిలబెట్టాయి
సినిమాలోని యాక్షన్ సన్నివేశాలను హ్యాండ్‌హెల్డ్ కెమెరా (Handheld camera) లాంగ్ సింగిల్ టేక్స్‌తో చిత్రీకరించారు. దీనివల్ల ప్రేక్షకుడు కూడా సైనికులతో పాటు యుద్ధ భూమిలో నడుస్తున్నట్లుగా అనిపిస్తుంది. సర్జికల్ స్ట్రైక్ అంతా చీకటిలో జరుగుతుంది. ఆ చీకటి వాతావరణాన్ని, నైట్ విజన్ గాగుల్స్ వ్యూని, అడవిలోని సహజ వెలుతురును మితేష్ మిర్చందానీ అత్యంత స్పష్టంగా, వాస్తవికంగా బంధించారు.
శాశ్వత్ సచ్‌దేవ్ అందించిన బ్యాక్‌గ్రౌండ్ స్కోర్ ఈ సినిమాకు ఆత్మ లాంటిది. సాధారణ రొటీన్ మ్యూజిక్ కాకుండా, హెలికాప్టర్ శబ్దాలు, గుండె చప్పుడు, మెటాలిక్ సౌండ్స్‌తో కలిపి చేసిన BGM గూస్‌బంప్స్ తెప్పిస్తుంది. ఈ అద్భుతమైన పనితనానికి ఆయనకు జాతీయ అవార్డు కూడా లభించింది. తుపాకీ కాల్పుల శబ్దాలు, బాంబు పేలుళ్లు, నిశ్శబ్దంగా అడవిలో అడుగులు వేసే చప్పుళ్లను అత్యంత సూక్ష్మంగా డిజైన్ చేశారు. సౌండ్ డిజైనింగ్ విభాగంలో కూడా ఈ చిత్రం జాతీయ అవార్డును గెలుచుకుంది.
కళ్లకు కట్టినట్లు చూపించిన కెమెరా పనితనం, నరాల్లో ఉత్సాహాన్ని నింపే సంగీతం కలిసి “ఉరి” సినిమాను ఒక మాస్టర్‌పీస్‌గా మార్చాయి.దర్శకుడిగా ఆదిత్య ధర్ మొట్టమొదటి సినిమా ఇది. దర్శకుడిగా మారడానికి ముందు ఆయన బాలీవుడ్‌లో పలు విభాగాల్లో పనిచేశారు.
దర్శకుడిగా మారకముందు ఆదిత్య ధర్ పాటల రచయితగా కాబూల్ ఎక్స్‌ప్రెస్ (2006) వంటి సినిమాలకు పనిచేశారు. అలాగే అజయ్ దేవ్‌గణ్ నటించిన ఆక్రోష్ (2010) తేజ్ (2012) చిత్రాలకు డైలాగ్ రైటర్‌గా పనిచేశారు. నిజానికి “ఉరి” కంటే ముందే ఆయన ఫవాద్ ఖాన్, కత్రినా కైఫ్‌లతో రాత్ బాకీ (Raat Baaki) అనే సినిమాతో దర్శకుడిగా పరిచయం కావాల్సి ఉంది. కానీ 2016లో ఉరి ఉగ్రదాడి జరిగిన తర్వాత పాకిస్థానీ నటులపై నిషేధం రావడంతో ఆ సినిమా ఆగిపోయింది.
ఆ తర్వాత అదే ఉరి దాడి నేపథ్యంతో ఈ సినిమాను తెరకెక్కించారు.”ఉరి”తో జాతీయ అవార్డు గెలుచుకున్నతర్వాత, ఆయన రణ్‌వీర్ సింగ్ హీరోగా ధురంధర్, (2025), ధురంధర్: ది రివెంజ్ (2026) వంటి భారీ స్పై యాక్షన్ చిత్రాలకు దర్శకత్వం వహించారు. అలాగే నిర్మాతగా ఆర్టికల్ 370 (Article 370) వంటి విజయవంతమైన సినిమాలను నిర్మించారు.
దేశభక్తి, ఆర్మీ ఆపరేషన్లు, గూస్‌బంప్స్ తెప్పించే యాక్షన్ సినిమాలను ఇష్టపడే ప్రతి ఒక్కరూ తప్పకుండా చూడాల్సిన అద్భుతమైన చిత్రం ఇది.
