ఎవరీ నీమ్ కరోలి బాబా ?

Spiritual teacher ………

నీమ్ కరోలి బాబా 20వ శతాబ్దానికి చెందిన ఆధ్యాత్మిక గురువు.. హనుమంతుని పరమ భక్తుడు. ఉత్తర భారతదేశంలో ఆయనను ఒక మహిమాన్వితమైన “చమత్కారి బాబా”గా, మహా యోగిగా భావిస్తారు. ఆయన బోధనలు చాలా సరళంగా ఉండేవి—”అందరినీ ప్రేమించు, అందరికీ సేవ చేయి, దేవుడిని స్మరించు, సత్యాన్నే పలకాలి” అని ఆయన ప్రబోధించేవారు. 

బాబా అసలు పేరు లక్ష్మణ్ నారాయణ్ శర్మ (కొన్ని చోట్ల లక్ష్మీ నారాయణ్ శర్మ అని కూడా పిలుస్తారు). ఆయన ఉత్తరప్రదేశ్‌లోని ఒక సంపన్న బ్రాహ్మణ కుటుంబంలో జన్మించారు. భక్తులు ఆయనను ప్రేమగా “మహారాజ్-జీ” అని పిలుచుకుంటారు. సాధన చేసే రోజుల్లో ఆయనను లక్ష్మణ్ దాస్, హండీ వాలా బాబా, తలైయా బాబా అని కూడా పిలిచేవారు.బాబా ఉత్తరప్రదేశ్‌లోని ఫిరోజాబాద్ జిల్లాకు చెందిన ‘అక్బర్‌పూర్’ గ్రామంలో 1900 సంవత్సరంలో జన్మించారు. 

 “నీమ్ కరోలి” అనే పేరు ఎలా వచ్చింది?
ఆయనకు ఈ పేరు రావడం వెనుక ఒక ఆసక్తికరమైన కథ ఉంది. ఒకసారి బాబా టికెట్ లేకుండా రైలులో మొదటి తరగతి పెట్టెలో ప్రయాణిస్తుండగా, టికెట్ కలెక్టర్ఆయనను చూసి, ఉత్తరప్రదేశ్‌లోని ‘నీమ్ కరోలి’ (లేదా నీబ్ కరోరి) అనే స్టేషన్ దగ్గర రైలు నుండి కిందకు దించేశాడు. 

బాబాను దించేసిన తర్వాత, డ్రైవర్ ఎంత ప్రయత్నించినా రైలు ముందుకు కదల్లేదు. ఇంజిన్‌లో ఎలాంటి లోపం లేకపోయినా రైలు కదలకపోవడంతో, అక్కడి స్థానికులు ఆ సాధువును అవమానించడం వల్లే ఇలా జరిగిందని రైల్వే అధికారులకు చెప్పారు. అధికారులు బాబాను క్షమాపణలు కోరి, గౌరవంగా తిరిగి రైలు ఎక్కించగానే రైలు వెంటనే కదిలింది. ఈ సంఘటన జరిగిన నాటి నుండి ఆయనకు ‘నీమ్ కరోలి బాబా’ అనే పేరు స్థిరపడిపోయింది. 

కేవలం భారతదేశంలోనే కాకుండా ప్రపంచవ్యాప్తంగా ఎందరో భక్తులు ఉన్నారు. వారిలో ప్రముఖ టెక్ దిగ్గజాలు, సెలబ్రిటీలు కూడా ఉన్నారు.  స్టీవ్ జాబ్స్ (ఆపిల్ వ్యవస్థాపకుడు) తన జీవితంలో కష్టకాలంలో ఉన్నప్పుడు ఆధ్యాత్మిక స్పష్టత కోసం భారతదేశం వచ్చి, ఉత్తరాఖండ్‌లోని బాబా కైంచీ ధామ్ ఆశ్రమాన్ని సందర్శించారు. 

మార్క్ జుకర్బర్గ్ (ఫేస్‌బుక్ / మెటా అధినేత) కూడా స్టీవ్ జాబ్స్ సలహా మేరకు 2015లో ఈ ఆశ్రమాన్ని సందర్శించి, తన కంపెనీ కష్టాల్లో ఉన్నప్పుడు మానసిక ప్రశాంతతను పొందానని స్వయంగా చెప్పారు.
హాలీవుడ్ నటి జూలియా రాబర్ట్స్, భారత క్రికెటర్ విరాట్ కోహ్లీ, ఆయన భార్య అనుష్క శర్మ కూడా నీమ్ కరోలి బాబాను  విశ్వసిస్తారు. 

బాబా సెప్టెంబర్ 11, 1973న బృందావనంలో మహాసమాధి చెందారు. బాబా దేశవ్యాప్తంగా దాదాపు 100కు పైగా హనుమాన్ ఆలయాలను, ఆశ్రమాలను నిర్మించారు.

1. కైంచీ ధామ్ ఆశ్రమం (ఉత్తరాఖండ్): ఇది నైనిటాల్‌కు సమీపంలో కొండల మధ్య అత్యంత ప్రశాంతమైన వాతావరణంలో ఉంది. 1960లలో బాబా దీనిని స్థాపించారు.ప్రపంచవ్యాప్తంగా ఈ ఆశ్రమానికి గుర్తింపు ఉంది. స్టీవ్ జాబ్స్, మార్క్ జుకర్బర్గ్ దిగ్గజాలు మానసిక ప్రశాంతత కోసం సందర్శించింది ఈ ఆశ్రమాన్నే. ప్రతి సంవత్సరం జూన్ 15న ఇక్కడ జరిగే ప్రతిష్ఠా దినోత్సవానికి (భండారా) లక్షలాది మంది భక్తులు వస్తారు.

2. బృందావన ఆశ్రమం (ఉత్తరప్రదేశ్):మథురకు సమీపంలోని పవిత్రమైన బృందావనంలో ఈ ఆశ్రమం ఉంది. బాబా తన జీవిత చివరి రోజులను ఇక్కడే గడిపారు.సెప్టెంబర్ 11, 1973న బాబా ఇక్కడే మహాసమాధి చెందారు. అందుకే ఇక్కడ ఆయన “మహాసమాధి మందిరం” నిర్మించబడింది. ఇక్కడికి వచ్చే భక్తులకు బాబా సజీవంగా ఉన్నారనే అనుభూతి కలుగుతుందని నమ్ముతారు. 

3. నీబ్ కరోరి గ్రామం (ఫరూఖాబాద్, ఉత్తరప్రదేశ్): బాబాకు “నీమ్ కరోలి బాబా” అనే పేరు రావడానికి కారణమైన రైలు సంఘటన జరిగిన ప్రదేశం ఇదే.ఇక్కడ బాబా సాధన చేసిన ఒక ప్రాచీనమైన గుహ, హనుమాన్ ఆలయం ఉన్నాయి. బాబా తొలి నాళ్లలో ఇక్కడే ఎక్కువగా ఉండేవారు. 

4. హనుమాన్ గఢి (ఉత్తరాఖండ్):నైనిటాల్ కొండలపై బాబా 1950 ప్రాంతంలో నిర్మించిన అత్యంత అందమైన హనుమాన్ దేవాలయం ఇది. ఇక్కడి నుండి సూర్యాస్తమయం చూడటం ఒక అద్భుతమైన అనుభూతిని ఇస్తుంది.

5. ఢిల్లీ, లక్నో ఆశ్రమాలు: ఢిల్లీలోని మెహ్రౌలీ ప్రాంతంలో, లక్నోలోని హజ్రత్‌గంజ్ (సంకట్ మోచన్ హనుమాన్ ఆలయం) లో కూడా బాబా స్థాపించిన పెద్ద ఆశ్రమాలు ఉన్నాయి.

బాబా భౌతికంగా మన మధ్య లేకపోయినా, ఆయన ఆశ్రమాల్లోని సానుకూల శక్తి (Positive Energy) ఇప్పటికీ ఎంతోమంది జీవితాలను మారుస్తోందని నమ్ముతారు.

ఆయన అమెరికన్ భక్తుడు రామ్ దాస్ (అసలు పేరు రిచర్డ్ ఆల్పెర్ట్) బి హియర్ నౌ, మిరాకిల్ ఆఫ్ లవ్ , బి లవ్ నౌ వంటి పుస్తకాలు రాశారు.

ఇటీవల విడుదలైన “హనుమాన్ అంశ” (Hanuman Ansh) సినిమా బాబా జీవిత చరిత్ర ఆధారం గానే తెరకెక్కింది. చాలా మంది భక్తులు హనుమంతుని స్వరూపంగా (అంశగా) భావిస్తారు, అందుకే ఈ సినిమాకు ఆ పేరు పెట్టారు. 

డాక్టర్ విశాల్ చతుర్వేది రాసిన “Divine Detour: That Changed My Life” అనే పుస్తకం ఆధారంగా ఈ సినిమాను రూపొందించారు. బాబా చిన్న వయసులోనే తల్లిని కోల్పోయి, దేవుడి కోసం ఇల్లు వదిలి వెళ్లి, ఉత్తర భారతదేశంలో ఆధ్యాత్మిక ప్రయాణం చేసి ఎలా నీమ్ కరోలి బాబాగా మారారు అనేది ఈ సినిమాలో చూపించారు. 

ఈ సినిమా కేవలం ₹2 కోట్ల అతి తక్కువ బడ్జెట్‌తో రూపొందింది. ఎలాంటి అంచనాలు, పెద్ద స్టార్ కాస్ట్ లేకుండా విడుదలైన ఈ చిత్రం, కేవలం ప్రేక్షకుల మౌత్ టాక్  ద్వారా బాలీవుడ్‌లో ఊహించని రేంజ్‌లో వసూళ్ల సునామీ సృష్టించి ₹150 కోట్లకు పైగా రాబట్టింది. హిందీలో సంచలన విజయం సాధించిన ఈ డివోషనల్ బ్లాక్‌బస్టర్ సినిమాను, టాలీవుడ్ స్టార్ డైరెక్టర్ త్రివిక్రమ్ శ్రీనివాస్ సమర్పణలో  తెలుగులో గ్రాండ్‌గా థియేటర్లలో విడుదల చేస్తున్నారు.