అసలు హిమాలయాల్లో ఏముంది?

Sheik Sadiq Ali……………………       

కొన్ని విషయాలు …అనుభవంలోకి వస్తే కానీ అర్ధం కావు. ఆ అనుభవాల తాలూకు అనుభూతులు నిరంతరం వెంటాడుతూ ఉంటే కలిగే అలౌకిక ఆనందమే వేరు.అలాంటి అద్భుతమైన అనుభూతుల సమాహారమే నా హిమాలయ యాత్ర. గత కొన్నేళ్ళుగా హిమాలయాల యాత్ర చేస్తూనే ఉన్నాను. ప్రతీ యాత్ర దేనికదే ప్రత్యేకం.

వెళ్ళిన ప్రతీసారి అమ్మ ఒడిలోకి పయనించిన అనుభూతి. అసలు హిమాలయాల్లో ఏముంది? ప్రపంచవ్యాప్తంగా ఉన్న అనేకానేక పర్వతాల్లాగే అవి కూడా ఒక రకమైన ప్రకృతి సహజంగా ఏర్పడిన పర్వతాలేకదా! కాకపొతే మంచుకొండలు. అలాంటివి చాలా దేశాల్లో ఉన్నాయి కదా! మరి హిమాలయాల ప్రత్యేకత ఏమిటి? ఎందుకు అంత ఆకర్షణ? ఎందుకు అవి పదేపదే పిలుస్తుంటాయి?

వాటి గురించి విశ్లేషించే అంతటి శాస్త్రీయ పరిజ్ఞానం నాకు లేదు.కొన్ని తర్కానికీ,హేతువుకీ అందని అంశాలూ ఉన్నాయి. గ్లేసియర్లు కరిగి ప్రవహించే హిమానీ నదాలు ఉన్నాయి. ఆకాశం నుంచి నేలకు జారిపడే శ్వేత వర్ణపు జలపాతాలు.. ఎలా ఏర్పడ్డాయో? అంతుచిక్కని సరస్సులు కన్పిస్తాయి. మేఘాలతో దోబూచులాడే నిట్టనిలువు హిమ శిఖరాలు అబ్బురపరుస్తాయి.  

సూర్య కిరణాలు తాకి ఎప్పటికప్పుడు రంగులు మారే మంచుకొండలు మెస్మరైజ్ చేస్తుంటాయి.ఎలాంటి రోగాన్నైనా నయం చేయగలిగే వనమూలికలు ఉంటాయి.స్థానికులు చెప్పిన  దాని ప్రకారం ఒకరకమైన చెట్టు వేర్లు కేజీ 50 లక్షలు విలువ చేస్తాయట.చైనా మార్కెట్ లో వాటి విలువ కోట్లకు చేరుతుంది. జరామరణాలు దరిచేరనివ్వని అపురూపమైన ప్రకృతి సంపద అక్కడ నిక్షిప్తమై ఉంది.

కాలుష్యానికి దూరంగా ,స్వచ్చమైన ఆక్సీజన్ అక్కడ దొరుకుతుంది. కొండకోనల్లో ప్రవహించే అమృత సమానమైన నీరు లభిస్తుంది.అక్కడ కొంతకాలం ఉంటే టాక్సిన్స్ తో నిండిన మన దేహం శుద్ధి చేయబడుతుంది.

మెదడును ఆవరించిన కాలుష్యపు ఆలోచనల పొరలు కరిగిపోతాయి. మనం రోజూ చెప్పుకునే ఆర్గానిక్ ఆహార పదార్దాలే నిత్యం అక్కడ లభిస్తాయి.పూర్ణాయుష్కులు, దీర్గాయుష్కులకు అక్కడ కొదవలేదు.

అన్నింటికీ మించి ధ్యానం,తపస్సు,సాధన చేసుకోవటానికి సానుకూలమైన అన్ని రకాల పరిస్థితులు అక్కడ నెలకొని ఉంటాయి. సహజ సిద్ధంగా ఏర్పడిన అనేక గుహలు,ఏకాంత ప్రదేశాలు లెక్కకు మిక్కిలిగా ఉంటాయి. అదేమిటో కానీ,ఒకసారి వెళ్లి వస్తే హిమాలయాలు మళ్ళీ మళ్ళీ పిలుస్తుంటాయి.

ఆ పిలుపు మన మెదడుకు చేరుతూనే ఉంటుంది. ఎప్పుడెప్పుడు వెళ్దామా అని మనసు కొట్టుకుంటూనే ఉంటుంది. అక్కడి ప్రతీ అనుభవం ఒక యునీక్. చిత్రం ఏమిటీ అంటే అనుక్షణం మరణం దోబూచులాడుతూనే ఉంటుంది.అది ఎప్పటికప్పుడు మనమేమిటో గుర్తు చేస్తూనే ఉంటుంది.

ఇక హిమాలయాల ప్రత్యేకత ఏమంటే ?

ప్రపంచంలోని ఎత్తైన పది శిఖరాలలో తొమ్మిది హిమాలయాలలో ఉన్నాయి. వాటిలో ప్రపంచంలోని ఎత్తైన పర్వతం ఎవరెస్ట్ కూడా ఉంది.. 29,029 అడుగులు (8,848 మీ) ఎత్తులో ఉన్న ఎవరెస్ట్ పర్వతం హిమాలయాలలోనే ఎత్తైన శిఖరం మాత్రమే కాదు, మొత్తం గ్రహం మీద ఎత్తైన శిఖరం. అలాగే కారకోర (K2), కైలాష్, కాంచన్‌జంగ, నంగా పర్బత్, అన్నపూర్ణ వంటి  ప్రసిద్ధ శిఖరాలున్నాయి.  

హిమాలయాలు సింధు, యాంగ్జీ, గంగా-బ్రహ్మపుత్ర నదులకు మూలం. ఈ మూడు ఆసియా ఖండానికి ప్రధాన నదీ వ్యవస్థలు.హిమాలయాలలో ఉద్భవించే ప్రధాన నదులు గంగా, సింధు, యార్లుంగ్, యాంగ్జీ, ఎల్లో, మెకాంగ్, నుజియాంగ్.

అంటార్కిటికా, ఆర్కిటిక్ తర్వాత హిమాలయాలు ప్రపంచంలోనే మూడవ అతిపెద్ద మంచు, మంచు నిక్షేపాలున్న పర్వతాలు.  పర్వత  శ్రేణి అంతటా దాదాపు 15,000 హిమానీనదాలు ఉన్నాయి. 48 మైళ్ళు (72 కి.మీ) పొడవునా, సియాచిన్ హిమానీనదం ధ్రువాల వెలుపల అతిపెద్ద హిమానీనదం.

హిమాలయాలలో ఉన్న ఇతర ముఖ్యమైన హిమానీనదాలలో బాల్టోరో, బియాఫో, నుబ్రా, హిస్పూర్ ఉన్నాయి. ఇండియా, టిబెట్‌ భూభాగాల్లోని  టెక్టోనిక్ ప్లేట్స్ ఢీకొన్న క్రమంలో హిమాలయాలు ఏర్పడ్డాయి.

అక్కడ ఇప్పటికీ పెద్ద మొత్తంలో టెక్టోనిక్ కదలికలు ఉన్నాయి. అందుకే  హిమాలయాలలో భూకంపాలు ..  ప్రకంపనలు దామాషా ప్రకారం అధిక సంఖ్యలో సంభవిస్తాయి.ఇక్కడ అనేక రకాల వృక్షజాలం .. జంతుజాలం ఉన్నాయి, వాటిలో అంతరించిపోతున్న జాతులు కూడా ఉన్నాయి.