గమ్యం, వేదం, కృష్ణం వందే జగద్గురుమ్ వంటి విభిన్న సినిమాలు తీసిన దర్శకుడు క్రిష్ డైరెక్షన్లో రూపొందిన సినిమా కంచె. ఆరేళ్ళ క్రితం ఈ చిత్రం విడుదలైంది . రెండో ప్రపంచ యుద్ధం బ్యాక్ డ్రాప్ లో తెరకెక్కిన సినిమా ఇది. 1936 నాటి ప్రేమకథను ఇందులో మిక్స్ చేశారు. ప్రేమ కథలో కుల వ్యవస్థ సమాజంలో ఎంత బలంగా నాటుకు పోయిందో చూపించే యత్నం క్రిష్ చేసారు.
కథ రెండు టైం జోన్స్ లో నడుస్తుంది. మధ్యలో ఫ్లాష్ బ్యాక్ సన్నివేశాలు వస్తుంటాయి. ఒకే ఊరికి చెందిన ఇండియన్ ఆర్మీ కల్నల్ ఈశ్వర్ ప్రసాద్ .. మేజర్ హరిబాబులు వరల్డ్ వార్ 2లో ఇటలీ తరపున జర్మనీతో పోరాడేందుకు యుద్ధంలోకి దిగుతారు. ఒక్క సారిగా జర్మనీ సైనికులు వీరి స్థావరం మీద దాడి చేసి సైనికులను చంపేస్తారు. ఆర్మీకెప్టెన్ ,, కల్నల్ లను బంధించి తీసుకెళతారు.
సైనికుల బారి నుంచి హరిబాబు (వరుణ్ తేజ్ )మరో నలుగురు తప్పించుకుంటారు. వీరంతా వెళ్లి కెప్టెన్ ను.. కల్నల్ ను ఎలా కాపాడతారు అనేది కథ. ఇక ప్రేమ కథలో కల్నల్ చెల్లెలిని (ప్రగ్యా ) హరిబాబు ప్రేమిస్తాడు. హరిబాబు కులం తక్కువ వాడని అంగీకరించరు. కానీ పెద్ద మనసున్న వాడని గుర్తించరు. సినిమాలో యుద్ధ సన్నివేశాలను బాగా చిత్రీకరించారు. ప్రేక్షకులను యుద్ధ సన్నివేశాలు సినిమాలో ఇన్వాల్వ్ అయ్యేలా చేస్తాయి. లవ్ ట్రాక్ కూడా ఆసక్తికరంగానే తీశారు.
అయితే మధ్యలో అక్కడక్కడా కొంత బోర్ అనిపిస్తుంది.కెప్టెన్ ను కల్నల్ ను రక్షించే క్రమంలో సైనికుల ప్రాణాలు కాపాడటానికి తన అభిమానాన్నిఅడ్డు పెట్టిన జర్మన్‌ యువతి ఎపిసోడ్ ఆకట్టు కుంటుంది.అవసరాల శ్రీనివాస్ పిరికి సైనికుడుగా తనదైన శైలిలో నటించాడు. గొల్లపూడి మారుతీ రావు, సింగీతం శ్రీనివాసరావు, పోసాని లు తమ పాత్రలకు న్యాయం చేసారు. నటీనటుల నుంచి క్రిష్ మంచి నటననే రాబట్టారు.
సినిమాను మరింత ఎఫెక్టివ్ గా తీయవచ్చు. క్రిష్ మరింత కసరత్తు చేస్తే బాగుండేది. అలాగే క్లైమాక్స్ సీన్లు అన్ని బాగానే ఉన్నాయి. సినిమాను సుఖాంతం కూడా చేయవచ్చు.ముగింపు అందరికి నచ్చదు. ‘మనుషులు కలిసి బతకాలి ..కంచెలు వేసుకొని కాదు’ అన్న సందేశం కోసం కథను విషాదాంతం చేయనక్కర్లేదు.
సాయి మాధవ్ బుర్రా రాసిన సంభాషణలు సినిమా కు బలాన్నిచ్చాయి. చిరంతన్ భట్ అందించిన సంగీతం బాగుంది. ముఖ్యంగా యుద్ధ సన్నివేశాలకు సమకూర్చిన సంగీతం ఆకట్టుకుంటుంది. సిరివెన్నెల గీతాలు బాగున్నాయి. జ్ఞానశేఖర్ సినిమాటోగ్రఫీ సినిమాకు హైలెట్ అని చెప్పుకోవాలి. క్రిష్ మనసులో ఉన్నదాన్ని ఆయన అద్భుతంగా తెరకెక్కించారు. హాట్ స్టార్ లో స్ట్రీమ్ అవుతోంది.. చూడని వారు చూడవచ్చు.
