China Masta Devi……………………………………….
పై ఫొటోలో కనిపించే ‘తల లేని దేవత’ ను ఛిన్నమస్తా దేవి అంటారు. ఈ దేవత ఆలయం జార్ఖండ్‌ లోని రామ్‌గఢ్ జిల్లాలో ఉంది. దుర్గాదేవీ రూపాల్లో ఛిన్నమస్తా దేవి రూపం ఒకటి. అమ్మవారి రూపం భయంకరంగా ఉంటుంది. ఈమెను దిగంబర దేవత గా కొలుస్తారు. ఈమెనే తలలేని దేవతగా కూడా పూజిస్తారు.
ఈ దేవికి ఇద్దరు సహచారిణులు ఉన్నారు.వారు ఢాకిని, వర్నిని. వీరు చిన్నమస్తా దేవి శరీరం నుంచి పుట్టినట్లు చెబుతారు. ఈ దిగంబర దేవత శృంగారంలో ఉన్న ఒక జంట మీద నిలబడి ఉంటుంది. తలను నరుక్కుని ఒక చేతిలో తలను పట్టుకుని దర్శనమిస్తుంది.
ఆమె మొండెం నుంచి మూడు రక్తధారలు వెలువడుతుంటాయి. వాటిలో ఒక రక్త ధార ఆమె చేతిలో ఉన్న నోట్లో పడుతున్నట్టు కనిపిస్తుంది..మిగిలిన రెండు ధారలను ఇరువైపులా ఉన్న ఢాకిని, వర్నినిలు తాగుతుంటాయి. చూసేందుకు ఆ రూపం భయంకరంగా ఉంటుంది.
కామం అనే కోరికను అణచివేసే శక్తిరూపం కాబట్టి దేవి ఇక్కడ దిగంబరంగా దర్శనమిస్తుందని అంటారు. ఈ ఆలయానికి సంబంధించి పలు కథనాలు ప్రచారంలో ఉన్నాయి. ఇక్కడ తాంత్రిక పూజలు కూడా జరుగుతాయి.ప్రతి సంవత్సరం వై శాఖ మాసంలోని శుక్ల పక్ష చతుర్దశి నాడు ఛిన్నమస్తా దేవి ఉత్సవాలు జరుగుతాయి.
ఈ ఆలయాన్ని ఏడాది పొడవునా భక్తులు సందర్శిస్తుంటారు. ఈ ఆలయ వైభవాన్ని చూడటానికి అక్టోబర్– మార్చి మధ్య వెళితే బాగుంటుంది. మకర సంక్రాంతి,మహా శివరాత్రి వంటి అనేక హిందూ పండుగలను ఇక్కడ ఉత్సాహంగా జరుపుకుంటారు.
అమ్మ వారి ఫోటోలు బయట ఎక్కువగా కనబడవు. దేవి చిత్రాలు ఇళ్లలో పెట్టుకోరాదని .. అశుభాలు జరుగుతాయని అంటారు. అందుకే దేవి చిత్రాలు అరుదుగా కనిపిస్తుంటాయి. కానీ అది అసత్య ప్రచారమే అని స్థానికులు చెబుతారు.రామ్‌గఢ్ జిల్లా రాఙరప్ప పట్టణంలోని రామ్‌గఢ్ కంటోన్మెంట్ నుండి 28 కిలోమీటర్ల దూరంలో ఛిన్నమస్తా దేవి ఆలయం ఉంది.
దామోదర్ .. భేరా అనే రెండు నదుల సంగమం వద్ద ఒక చిన్న కొండపై ఆలయం ఉంది.ఈ ఆలయానికి సమీప విమానాశ్రయం రాంచీ. విమానాశ్రయం వెలుపల నుండి బస్సులు.. టాక్సీలు అందుబాటులో ఉంటాయి. రైలులో ప్రయాణించే వారు దేవాలయం నుండి 28 కి.మీ దూరంలో ఉన్న రామ్‌గఢ్ రైల్వే స్టేషన్ వరకు టిక్కెట్లను బుక్ చేసుకోవచ్చు. స్టేషన్ నుంచి టాక్సీ… బస్సులు దొరుకుతాయి.
ఈ ఆలయం కాకుండా అస్సాం లోని గౌహతి సమీపంలో మా ఛిన్నమస్తా మందిర్ ఇక్కడ కామాఖ్య దేవి మందిర్ దగ్గర ఉంది. ఈ ఆలయం గౌహతి రైల్వే స్టేషన్ నుండి కేవలం 9 కిలోమీటర్ల దూరంలో ఉంది.
పశ్చిమ బెంగాల్ లోని బంకురా జిల్లాలోని బిష్ణుపూర్ లో కూడ ఛిన్నమస్తా ఆలయం ఉంది. ఈ ఆలయం బిష్ణుపూర్ రైల్వే స్టేషన్ నుండి కేవలం 4 కిలోమీటర్ల దూరంలోఉంది. 
బిష్ణుపూర్ బంకురా నుండి 36 కిలోమీటర్లు.. కోల్‌కతా నుండి 140 కిలోమీటర్ల దూరంలో ఉంది.
పశ్చిమ బెంగాల్ రాష్ట్రంలో బంకురా జిల్లా ప్రధాన కేంద్రం బంకురా లో మా ఛిన్నమస్తా దేవాలయం సతీ ఘాట్ దగ్గర ఉంది. ఈ ఆలయం బంకురా రైల్వే స్టేషన్ నుండి 2 కిలోమీటర్ల దూరంలో ఉంది. బంకురా అసన్సోల్ నుండి 70 కిలోమీటర్లు… బర్ధమాన్ నుండి 95 కిలోమీటర్ల దూరంలో ఉంది.
పశ్చిమ బెంగాల్ రాష్ట్రంలోని బర్ధమాన్ జిల్లా డిషెర్‌గఢ్ పట్టణం లో మా ఛిన్నమస్తా కాళీ మందిరం దామోదర్ నది ఒడ్డున ఉంది. ఈ ఆలయం డిషెర్‌గఢ్ బస్ స్టేషన్ నుండి కేవలం 200 మీటర్ల దూరంలో ఉంది. డిషెర్‌గఢ్ అసన్సోల్ నుండి 19 కిలోమీటర్ల దూరంలో ఉంది.
