Crime thriller……..
‘గజబ్ రాత్’ (Gajab Raat) ఇదొక పొలిటికల్ అండ్ క్రైమ్ డ్రామా.. ప్రముఖ దర్శకుడు నీరజ్ పాండే నిర్మించిన ఈ చిత్రానికి రితేష్ షా దర్శకత్వం వహించారు. ‘ది ఫ్యామిలీ మ్యాన్’ స్టార్ మనోజ్ బాజ్‌పేయ్ ప్రధాన పాత్రలో నటించారు. నెట్‌ఫ్లిక్స్ (Netflix) లో తెలుగు వెర్షన్‌తో స్ట్రీమింగ్ అవుతోంది.
కథాంశం
సబ్‌ఇన్‌స్పెక్టర్ అజయ్ నిర్విత్ (మనోజ్ బాజ్‌పేయి) ఢిల్లీ పోలీస్ డిపార్ట్‌మెంట్‌లో ఒక అవినీతిపరుడైన, తెలివైన అధికారి. కేవలం లంచాలు, డబ్బు సంపాదన పైనే శ్రద్ధ పెట్టే అతనికి ఒక రాత్రి కదులుతున్న కారు నుండి రోడ్డు మీద పడిన యువతి కేసు అప్పగిస్తారు.మానవత్వంతో ఆమెను కాపాడటానికి అతను ప్రయత్నిస్తాడు.
కానీ ఆ ఒక్క సంఘటన అతన్ని దేశ భద్రతకే ముప్పు తెచ్చే ఒక అంతర్జాతీయ కుట్ర, రాజకీయ నాయకుల డ్రామా, సీబీఐ (CBI), ఎన్ఐఏ (NIA) అధికారుల మధ్య జరిగే పవర్ గేమ్‌లోకి లాగుతుంది. ఆ ఒక్క రాత్రిలో అజయ్ ఆ యువతిని ఎలా కాపాడాడు అనేదే మిగతా కథ.
అవినీతి అధికారిగా , మనస్సాక్షి చావని ఒక పోలీస్ పాత్రలో మనోజ్ బాజ్‌పేయ్ తన నటనతో సినిమాను నిలబెట్టారు. ఆయన బాడీ లాంగ్వేజ్, డైలాగ్ డెలివరీ అద్భుతంగా ఉన్నాయి. మొదటి భాగంలో కథనం ఎంతో వేగంగా ఒక రేసీ సస్పెన్స్ థ్రిల్లర్‌లా సాగుతుంది వ్యవస్థ లోపాలను ఎండగట్టిన తీరు ఆకట్టుకుంటుంది.
నెగెటివ్ షేడ్స్ లో అక్షయ్ ఒబెరాయ్, సోషల్ యాక్టివిస్ట్‌గా శ్రద్ధా దాస్, ఎస్‌హెచ్‌ఓ రాణాగా రాజీవ్ గుప్తా తమ పాత్రలకు పూర్తి న్యాయం చేశారు.
సినిమా ప్రారంభమైన తీరు, కేవలం ఒకే రాత్రి బ్యాక్‌డ్రాప్‌లో కథను నడిపిన విధానం, ఇంటర్వెల్ వరకు వచ్చే సస్పెన్స్ ఎలిమెంట్స్ ప్రేక్షకుడిని ఆకట్టుకుంటాయి. సోషల్ యాక్టివిస్ట్‌గా నటించిన శ్రద్ధా దాస్, మనోజ్ బాజ్‌పేయి మధ్య వచ్చే సంభాషణలు చాలా గ్రిప్పింగ్‌గా ఉంటాయి. గాయ పడిన అమ్మాయి అసలు గుర్తింపు చుట్టూ ఉన్న రహస్యం, చివరకు అది రివీల్ అయ్యే విధానం ప్రేక్షకులలో ఉత్సుకతను కలిగిస్తాయి.
సినిమా ద్వితీయార్థంలోకి వచ్చేసరికి కథనం కాస్త నెమ్మదిస్తుంది.కొన్ని ట్విస్టులు బాగానే ఉంటాయి. సినిమా ముగింపులో గాయపడిన అమ్మాయిని కాపాడటానికి హాస్పిటల్ బ్యాక్‌డ్రాప్‌లో జరిగే హై-స్టేక్స్ డ్రామా ఉత్కంఠను రేకెత్తిస్తుంది.ముగింపు కొంతమందికి అంతగా సాటిస్ఫాక్షన్ ఇవ్వదు..
‘సాకిబ్ సలీమ్, అక్షయ్ ఒబెరాయ్, శ్రద్ధా దాస్, నుష్రత్ భరుచ్చా వంటి మంచి నటులు ఉన్నప్పటికీ, వారి పాత్రల పరిధి చాలా తక్కువగా ఉండటం వల్ల వారు పెద్దగా ఇంపాక్ట్ చూపించలేకపోయారు.
మనోజ్ బాజ్‌పేయ్ ఎంట్రీ సీన్,కేస్‌ను డీల్ చేసే విధానం ప్రేక్షకులను కథలోకి లాగుతుంది. కేవలం ఒక యాక్సిడెంట్ అనుకున్న కేస్… మెల్లమెల్లగా పొలిటికల్ లీడర్స్, సీబీఐ , ఎన్ఐఏ ల మధ్య జరిగే పెద్ద పవర్ గేమ్‌గా మారే ఇన్వెస్టిగేషన్ సీన్లు చాలా గ్రిప్పింగ్‌గా ఉంటాయి.
మనోజ్ బాజ్‌పేయ్ – దివ్యా దత్తా మధ్య వచ్చే సంభాషణలు, మైండ్ గేమ్స్ ఈ సినిమాకే అతిపెద్ద హైలైట్. ఆ రాత్రి జరుగుతున్న కుట్ర వెనుక అసలు మాస్టర్ మైండ్ ఎవరు? అది దేశ భద్రతకు ఎలా ముప్పుగా మారబోతోంది? అని రివీల్ చేసే సీన్ సెకండ్ హాఫ్‌పై విపరీతమైన క్యూరియాసిటీని పెంచుతుంది.ఢిల్లీ రాత్రి వాతావరణంలో రహస్యంగా సాగే కొన్ని కార్ చేజింగ్ సీన్లు, అలాగే క్లైమాక్స్ వైపు వెళ్లే కొద్దీ వచ్చే యాక్షన్ ఎపిసోడ్స్ థ్రిల్లర్ ప్రియులను బాగా ఆకట్టుకుంటాయి.
‘గజబ్ రాత్’ సినిమాకు సినిమాటోగ్రఫీ, నేపథ్య సంగీతం కథలోని ఉత్కంఠను నిలబెట్టడానికి సహాయపడ్డాయి. ఢిల్లీ నగరంలోని నిర్మానుష్యమైన రోడ్లు, ఫ్లైఓవర్లు, చీకటి సందులను కెమెరాలో చాలా రియలిస్టిక్‌గా క్యాప్చర్ చేశారు.రాత్రి పూట షూటింగ్ కావడం వల్ల స్ట్రీట్ లైట్లు, కారు హెడ్‌లైట్లు, నియాన్ కలర్ లైటింగ్‌ను వాడుకుంటూ విజువల్స్ డిజైన్ చేశారు. ఇది సినిమాకు థ్రిల్లర్ లుక్‌ను తెచ్చింది.
విచారణ జరిగే సీన్లు, అలాగే మైండ్ గేమ్స్ ఆడేటప్పుడు మనోజ్ బాజ్‌పేయ్, దివ్యా దత్తా ముఖాల్లోని హావభావాలను, టెన్షన్‌ను చూపించడానికి వాడిన క్లోజప్ షాట్స్ ప్రేక్షకులను కథలో లీనమయ్యేలా చేస్తాయి.ఒక క్రైమ్ ఇన్వెస్టిగేషన్ థ్రిల్లర్‌కు ఎలాంటి బ్యాక్‌గ్రౌండ్ మ్యూజిక్ (BGM) కావాలో సరిగ్గా అలాంటిదే ఇచ్చారు. సీన్ సీన్‌కు మారుతున్న సస్పెన్స్‌ను మ్యూజిక్ బాగా ఎలివేట్ చేసింది.
కొన్ని కీలకమైన మైండ్ గేమ్ సీన్లలో భారీ శబ్దాలు లేకుండా, కేవలం తక్కువ సౌండ్ బేస్‌తో కూడిన టోన్స్ వాడటం వల్ల సన్నివేశంలో గాఢత పెరిగింది. కొన్ని లోపాలు ఉన్నప్పటికీ, మనోజ్ బాజ్‌పేయ్ నటన కోసం ఒకసారి తప్పకుండా చూడదగ్గ క్రైమ్ థ్రిల్లర్. క్రైమ్, సస్పెన్స్ జానర్లను ఇష్టపడే వారికి ఈ సినిమా నెట్‌ఫ్లిక్స్‌లో మంచి వాచ్ అవుతుంది.
