ఆ మాయా ద్వీపం కథేమిటి ?

 Siquijor Island………….

సిక్విజోర్ ద్వీపం  ఫిలిప్పీన్స్ దేశంలోని అత్యంత అందమైన, రహస్యాలతో కూడిన ద్వీపాలలో ఒకటి. ఇది ఫిలిప్పీన్స్ దేశంలో జనాభా, వైశాల్యం పరంగా మూడవ అత్యంత చిన్న ప్రావిన్స్. సెంట్రల్ విసయాస్ రీజియన్‌లోని ‘నెగ్రోస్ ఐలాండ్ రీజియన్’ పరిధిలో ఇది ఉంది.

1565లో స్పానిష్ అన్వేషకులు ఈ ద్వీపాన్ని కనుగొన్నారు. రాత్రి వేళల్లో ఈ ద్వీపంలో ఉన్న ‘మోలావ్’  చెట్లపై వేలాది మిణుగురు పురుగులు (Fireflies) గుంపులుగా చేరతాయి.దూరం నుండి చూసేవారికి ఈ ద్వీపం మంటలతో మెరుస్తున్నట్లు కనిపిస్తుంది.అందుకే స్పానిష్ వారు దీనిని “ఇస్లా డెల్ ఫ్యూగో” (Island of Fire) అని పిలుస్తారు. 

కొన్ని నిర్దిష్టమైన రక్షిత అటవీ ప్రాంతాలు, లోపలి గ్రామాల్లోని ‘మోలావ్’ చెట్లపై మిణుగురు పురుగులు ఇప్పటికీ గుంపులుగా చేరుతూ పర్యాటకులను ఆకట్టుకుంటున్నాయి. అయితే కాలక్రమేణా పెరిగిన ఆధునికత వల్ల వీటి సంఖ్య పాత రోజులతో పోలిస్తే చాలా వరకు తగ్గింది.

మిణుగురు పురుగులు అంతరించిపోకుండా కాపాడటానికి, పర్యాటకులు వాటిని సురక్షితంగా చూడటానికి ద్వీపంలో ప్రత్యేక ఏర్పాట్లు చేశారు.  సిక్విజోర్‌లోని ‘సాన్ జువాన్’ ప్రాంతంలో ఉన్నప్రైవేట్ సంరక్షణ కేంద్రం ప్రస్తుతం ఈ వింతను చూడటానికి ఉత్తమమైన ప్రదేశం.ఇక్కడ పర్యాటకుల కోసం ప్రత్యేకమైన వీక్షణ ప్లాట్‌ఫారమ్‌లను ఏర్పాటు చేశారు.

రాత్రి 6:30 నుండి 7:30 గంటల మధ్య ఇక్కడికి వెళ్తే మోలావ్ చెట్ల కొమ్మలపై వేలాది మిణుగురు పురుగులు క్రిస్మస్ లైట్ల వలే ఏకకాలంలో మెరుస్తూ చేసే మాయాజాలాన్ని చూడవచ్చు. ద్వీపంలో పర్యాటకం పెరిగి రోడ్లు, రిసార్ట్‌ల వద్ద విపరీతంగా పెరిగిన ఆర్టిఫిషియల్ లైటింగ్  వల్ల ఈ పురుగులు ఒకదానికొకటి సంకేతాలు పంపుకోలేక వాటి సంఖ్య తగ్గుతోంది.హోటళ్లు, భవనాల నిర్మాణం కోసం మోలావ్ వృక్షాలను నరికివేయడం వల్ల వీటి సహజ ఆవాసాలు దెబ్బతిన్నాయి.
 
ఫిలిప్పీన్స్ ప్రజలు ఇప్పటికీ సిక్విజోర్‌ను ఒక మాయా ద్వీపంగా భావిస్తారు. ఇక్కడ చేతబడులు జరుగుతాయని, మంత్రగాళ్లు, మంత్రగత్తెలు ఉన్నారని స్థానికులు నమ్ముతారు. ఈ ద్వీపంలోని కొండ గ్రామాలలో మూలికలు, వేర్లతో సంప్రదాయ వైద్యం చేసే ‘మనా నంబాల్’ అనే వైద్యులు ఉన్నారు.

వీరు తయారుచేసే “ప్రేమ ద్రావణాలు” (Love Potions/Gayuma) నొప్పులను నయం చేసే నూనెలు చాలా ప్రసిద్ధి. ప్రతి సంవత్సరం ఇక్కడ ‘హీలింగ్ ఫెస్టివల్’ కూడా జరుగుతుంది. ఈ ద్వీపంలో దొరికే సాంప్రదాయ మందులు, మూలికా ద్రావణాల వెనుక చాలా పెద్ద ప్రక్రియ ఉంటుంది. దీనిని వారు చాలా పవిత్రంగా భావిస్తారు.

ఇక్కడి సాంప్రదాయ వైద్యులు  పండుగ రోజులైన ‘గుడ్ ఫ్రైడే’ సమయం లో కొండ కోనల్లోకి వెళ్లి ప్రత్యేకమైన వందలాది చెట్ల వేర్లు, ఆకులు, బెరడులను సేకరిస్తారు. ఆ సమయంలోనే వీటికి శక్తులు వస్తాయని వారి నమ్మకం.

బోలో-బోలో అనే ఒక ప్రత్యేక చికిత్స కూడా చేస్తారు. ఒక గాజు గ్లాసులో నీరు, మంత్రించిన నల్లటి రాయిని వేసి, ఒక వెదురు గొట్టంతో ఆ నీటిని ఊదుతూ రోగి శరీరానికి తగిలిస్తారు. రోగి శరీరంలో ఏదైనా అనారోగ్యం లేదా కీడు ఉంటే ఆ నీరు నల్లగా లేదా బురదగా మారుతుందని, స్వచ్ఛంగా మారే వరకు ఈ ప్రక్రియ చేస్తారని చెబుతారు. 

ఇక్కడ ‘టుబొడ్ మెరైన్ శాంక్చురీ’ , ‘కామిగాయాన్’ వంటి అనేక రక్షిత సముద్ర ప్రాంతాలు ఉన్నాయి. ఇక్కడి స్పష్టమైన నీటిలో స్నార్కెలింగ్ (Snorkeling) లేదా స్కూబా డైవింగ్ చేయడం ద్వారా రంగురంగుల పగడపు దిబ్బలు (Coral Reefs), సముద్ర తాబేళ్లు (Sea Turtles)  విభిన్న జాతుల చేపలను చూడవచ్చు.

కొన్ని ప్రత్యేక వాతావరణ పరిస్థితులలో ఇక్కడి సముద్ర తీరాలలో ‘బయోల్యూమినిసెంట్ ప్లాంక్టన్’ (Bioluminescent Plankton) వల్ల రాత్రి వేళ నీరు నీలి రంగులో ప్రకాశిస్తూ అద్భుతంగా కనిపిస్తుంది.
ఇక్కడ  ప్రతి సంవత్సరం సెప్టెంబర్ నెలలో  సోలోన్ ఫెస్టివల్ నిర్వహిస్తారు. ఈ సందర్భంగా ఇక్కడి సాంప్రదాయ వివాహ పద్ధతులు, పూర్వీకుల ఆచారాలను గౌరవిస్తూ ఒక పెద్ద సాంస్కృతిక నృత్యోత్సవం జరుగుతుంది. 

‘గుడ్ ఫ్రైడే’ వారంలో దేశవ్యాప్తంగా ఉన్న సాంప్రదాయ వైద్యులంతా ఒకచోట చేరి మూలికా మందులు తయారుచేసే ప్రక్రియను పర్యాటకులు ఇక్కడ ప్రత్యక్షంగా చూడవచ్చు.దీన్నే హీలింగ్ ఫెస్టివల్  అంటారు. సిక్విజోర్‌లోని ‘సాన్ జువాన్’ ప్రాంతం పర్యాటకులకు కేంద్రస్థానం.

ఇక్కడే ఎక్కువ శాతం బీచ్ రిసార్ట్‌లు, హోటళ్లు, రెస్టారెంట్లు ఉన్నాయి. రాత్రి వేళల్లో లైవ్ మ్యూజిక్ బార్‌లు అందుబాటులో ఉంటాయి. ఒకప్పుడు చేతబడుల భయం వల్ల జనాలు సిక్విజోర్ ద్వీపానికి వెళ్ళడానికి భయపడేవారు. ప్రస్తుతం ప్రకృతి ప్రేమికులకు,సాహస యాత్రికులకు ఫిలిప్పీన్స్‌లోనే ఒక ‘మస్ట్ విజిట్’ (Must Visit) స్వర్గధామంగా రూపాంతరం చెందింది.