సుదర్శన్ టి…………………..
అది .. జూలై 28, 1922… ఇద్దరు వైద్య సైంటిస్టులు కెనడా టొరంటోలోని Hospital for Sick Children, డయాబెటిస్ వార్డుకు వచ్చారు.వారు కొత్తగా శాస్త్రీయ పద్ధతిలో తయారు చేసిన హార్మోన్ ను పేషంట్లకు సూదిమందుగా వెయ్యడానికి వచ్చారు. ఈ హార్మోన్ ను పేషెంట్లకు వెయ్యడం చరిత్రలో ఇదే మొదటిసారి.
పేషంట్లు అందరూ చిన్న పిల్లలే, శరీరంలో షుగర్ శాతం విపరీతంగా పెరిగి కోమాలో ఉన్నారు. ఏ వైద్యమూ పనిచేయడం లేదు. పిల్లల పేరెంట్స్ తమ పిల్లల్ని ఇక్కడ అడ్మిట్ చెయ్యడం తమ కళ్ల ముందే పిల్లలు చనిపోవడం వారి శవాలను మోసుకెళ్ళడం మాత్రమే జరుగుతోంది. పిల్లలు కోమా నుండి బయటకు రావడం లేదు.
ఈ ఇద్దరు సైంటిస్టులు సూది మందు వేయడం ప్రారంభించారు. అలా వేసుకుంటూ చివరి పేషంట్ వద్దకు వచ్చేటప్పటికి సూది మందు వేసిన మొదటి పాపలో చలనం వచ్చింది అలా ఒక్కో పాప/బాబు లో చలనం మొదలయ్యింది. అంతవరకూ నిరాశ, నిస్పృహ, మౌన రోదన మాత్రమే ఎరిగిన ఆ వార్డులో ఒక్కసారిగా ఆనందం, సంతోషం, కేరింతలతో వాతావరణం హోరెత్తింది.
ఆ ఇద్దరు సైంటిస్టులే Sir Fredrick Banting, Charles Best. వీరు తయారుచేసిన ఆ సూది మందు పేరే ఇన్సులిన్ హార్మోన్. ఇన్సులిన్ లేని ఈ ప్రపంచం ఎంత భయంకరంగా ఉంటుందో ఊహించుకుంటే గుండె జల్లు మంటుంది. మానవాళి ఎన్నటికీ వీరిద్దరికీ రుణపడి ఉంటుంది