అక్కడ ప్రధాన ఆకర్షణ మారుతీ విగ్రహమే !!

Big Statue of Hanuman………..

అక్కడి మాల్ రోడ్‌లో నడుస్తున్న ఎవరికైనా ఆ క్షణం బాగా గుర్తుంటుంది… మీరు వేడి వేడి టీ తాగుతూ, పైన్ చెట్లతో నిండిన కొండలను చూస్తున్నప్పుడు, అకస్మాత్తుగా మీ కళ్లు ఒక అద్భుతమైన దృశ్యాన్ని చూసి ఆగిపోతాయి. కొండ శిఖరాల పైన, మేఘాలను చీల్చుకుంటూ కనిపిస్తున్న ఒక భారీ నారింజ రంగు విగ్రహం కనిపిస్తుంది.  

అది కేవలం ఒక శిల్పం మాత్రమే కాదు. 108 అడుగుల ఎత్తు ఉన్న ఈ జఖు ఆలయ హనుమాన్ విగ్రహం, ఈ హిల్ స్టేషన్ (సిమ్లా)కే ఒక ప్రధాన చిహ్నం గా మారింది. జఖు కొండ సముద్ర మట్టానికి దాదాపు 8,000 అడుగుల ఎత్తులో ఉండి, సిమ్లాలోనే అత్యంత ఎత్తైన ప్రాంతంగా వెలుగొందుతోంది.

రామాయణం ప్రకారం, లక్ష్మణుడి ప్రాణాలను రక్షించే సంజీవని మూలిక కోసం వెతుకుతూ వెళ్తున్న సమయంలో హనుమంతుడు ఇక్కడ ఆగాడు. ఆయన భారీ కాయం వల్ల ఆ కొండ కొంచెం కిందకు నొక్కుకుపోయి, ఒక చదునైన ఉపరితలం ఏర్పడిందని, అదే పవిత్ర స్థలంగా మారిందని స్థానికులు చెబుతారు.

భక్తులు ఇక్కడ ఒక చిన్న హనుమాన్ ఆలయాన్ని నిర్మించి శతాబ్దాలుగా పూజిస్తున్నారు. అయితే 2010లో, ఈ ఆలయ ప్రాంగణంలో 108 అడుగుల భారీ హనుమాన్ విగ్రహాన్ని ప్రతిష్టించడంతో, ఈ ఆధ్యాత్మిక కేంద్రం ఒక ప్రత్యేక గుర్తింపును పొందింది.

108 సంఖ్య వెనుక ఉన్న రహస్యం
ఈ విగ్రహం ఎత్తు 108 అడుగులు ఉండటం వెనుక ఒక ఆధ్యాత్మిక కారణం ఉంది. హిందూ మతం, బౌద్ధమతం, ఖగోళ శాస్త్రంలో కూడా 108 అత్యంత పవిత్రమైన సంఖ్య శాస్త్రవేత్తల పరిశీలన ప్రకారం, భూమికి, సూర్యుడికి మధ్య ఉన్న దూరం సూర్యుని వ్యాసం (Diameter) కంటే సుమారు 108 రెట్లు ఉంటుంది.

అదే విధంగా, భూమికి, చంద్రుడికి మధ్య దూరం కూడా చంద్రుని వ్యాసం కంటే సుమారు 108 రెట్లు ఉంటుంది. అందుకే 108 సంఖ్యకు హిందూ సంప్రదాయంలో అంత ప్రాముఖ్యత ఉంది.యోగ సంప్రదాయాల ప్రకారం, మన శరీరంలో 108 ముఖ్యమైన శక్తి కేంద్రాలు (నాడులు) ఉన్నాయి.జపమాలలో 108 పూసలు ఉంటాయి.  

ఈ విగ్రహాన్ని 108 అడుగుల ఎత్తులో నిర్మించడం ద్వారా, కేవలం వైభవాన్ని చూపడమే కాకుండా ఆధ్యాత్మిక సంపూర్ణతను చాటిచెప్పాలని మేధావులు భావించారు.

భారతదేశంలోనే ఇది అత్యంత ఎత్తైన హనుమాన్ విగ్రహమా? సందర్శకులు తరచుగా అడిగే ప్రశ్న ఇది. దీనికి సమాధానం ఏమిటంటే….విగ్రహం ఎత్తు 108 అడుగులు (33 మీటర్లు) కాగా,జఖు కొండ సముద్ర మట్టానికి 8,050–8,500 అడుగుల ఎత్తులో ఉంది.

ఆంధ్రప్రదేశ్‌లోని పరిటాల ఆంజనేయ స్వామి విగ్రహం (135 అడుగులు) వంటి పెద్ద విగ్రహాలు ఉన్నప్పటికీ, జఖు హనుమంతుడి ప్రత్యేకత ఏమిటంటే అది ఉన్న “ఎత్తు”. హిమాలయాల గుండెల్లో, ఇంతటి ఎత్తులో నిర్మించబడిన విగ్రహం మరెక్కడా లేదు.

రోప్‌వేలో వెళ్తున్నప్పుడు పైన్ అడవులపై నుండి అకస్మాత్తుగా మేఘాల మధ్య నుండి హనుమంతుడు కనిపించడం ఒక దివ్య దర్శనంలా అనిపిస్తుంది.సిమ్లాలోని రిడ్జ్ ప్రాంతం నుండి చూస్తే, సూర్యోదయం, సూర్యాస్తమయ సమయాల్లో ఈ విగ్రహం బంగారు కాంతితో మెరుస్తూ కనిపిస్తుంది.

మాల్ రోడ్ లో షాపింగ్ చేస్తున్నప్పుడు లేదా నడుస్తున్నప్పుడు ఒక్కసారి పైకి చూస్తే, భవనాల పై నుండి హనుమంతుడు మనల్ని గమనిస్తున్నట్లుగా కనిపిస్తారు.

ట్రెక్కింగ్ దారుల గుండా ఆలయానికి అడవి మార్గంలో వెళ్తున్నప్పుడు చెట్ల మధ్య నుండి ఈ భారీ విగ్రహం క్రమక్రమంగా కనిపించడం వారిలో ఉత్సాహాన్ని నింపుతుంది.

సిమ్లాలోని ఈ జఖు ఆలయం చేరుకోవడానికి మూడు ప్రధాన మార్గాలు ఉన్నాయి. వీటిలో ఒకటి ఎంచుకోవచ్చు.
1. జఖు రోప్‌వే (Jakhu Ropeway) – అత్యంత వేగవంతమైన మార్గం ..ఇది పర్యాటకులకు అత్యంత ఇష్టమైన మార్గం. సిమ్లాలోని ‘రిడ్జ్’ (The Ridge) సమీపంలో ఉన్న బాబూ ఘాట్ నుండి రోప్‌వే ప్రారంభమవుతుంది. కేవలం 5 నుండి 6 నిమిషాల్లో కొండపైకి చేరుకోవచ్చు. ప్రయాణంలో హిమాలయాల లోయలు,  దేవదార్ అడవుల అందాలను ఆకాశం నుండి చూడవచ్చు.ఒక వ్యక్తికి రానుపోను సుమారు ₹500 – ₹600 వరకు ఉంటుంది 

2. కాలినడకన (Trekking) – సాహస ప్రియుల కోసం…. సిమ్లా మాల్ రోడ్ లేదా చర్చి సమీపంలోని రిడ్జ్ నుండి ఆలయానికి వెళ్లే దారి ఉంటుంది. సుమారు 2 కిలోమీటర్ల దూరం ఉంటుంది. కొండ నిటారుగా ఉండటం వల్ల ఆరోగ్యవంతులకు 30 నుండి 45 నిమిషాలు పడుతుంది. దారి పొడవునా బెంచీలు ఉంటాయి, అలసిపోతే విశ్రాంతి తీసుకోవచ్చు. మార్గమధ్యంలో  కోతులు ఎక్కువగా ఉంటాయి, జాగ్రత్త!

3 టాక్సీ లేదా సొంత వాహనం ద్వారా…. మీరు నడవలేకపోతే, సిమ్లా ప్రధాన నగరం నుండి టాక్సీని అద్దెకు తీసుకోవచ్చు. టాక్సీలు మిమ్మల్ని ఆలయ ప్రవేశ ద్వారం వరకు తీసుకెళ్తాయి. ఇక్కడ కోతులు చాలా తెలివైనవి. మీ చేతిలో ఉన్న మొబైల్ ఫోన్లు, కళ్లద్దాలు , పర్సులు, ఆహార పదార్థాలను లాక్కెళ్తాయి.

వాటిని బ్యాగులో భద్రంగా ఉంచుకోవడం ఉత్తమం. కొండ ఎక్కేటప్పుడు కోతుల నుండి రక్షణగా ఉండటానికి కింద చిన్న కర్రలు అద్దెకు దొరుకుతాయి (సుమారు ₹10-20). వాటిని చేతిలో ఉంచుకుంటే కోతులు దగ్గరకు రావు. ఉదయం 8:00 నుండి సాయంత్రం 6:00 వరకు ఆలయం తెరిచి ఉంటుంది. సూర్యాస్తమయ సమయంలో విగ్రహం చాలా అందంగా కనిపిస్తుంది.

సిమ్లాలోని జఖు ఆలయం దగ్గర్లోని మాల్ రోడ్ ప్రతి ప్రాంతం లో బస చేయడానికి వసతి సౌకర్యాలు అందుబాటులో ఉన్నాయి.సిమ్లా వెళ్ళినపుడు గుర్తుంచుకుని ఈ హనుమాన్ విగ్రహాన్ని దర్శించండి.