Ravi Vanarasi……………………
దట్టమైన పత్తి పొలాల మధ్య, అట్లాంటాకు దూరంగా ఉన్న ఒక చిన్న పట్టణంలో, చీకటిని చీల్చుకుంటూ ఒక దీపం వెలుగుతోంది. ఆ దీపం ఒక రసాయన శాస్త్రవేత్త ప్రయోగశాలలో కాదు, దుఃఖంలో మునిగిన తండ్రి గుండెలో వెలుగుతున్న ఆశ. అతని పేరు లూన్స్‌ఫోర్డ్ రిచర్డ్సన్.
అది 19వ శతాబ్దం చివరి భాగం. ఉత్తర కరోలినాలో మంచు కురిసే రాత్రులలో, చాలా మంది పిల్లలు దగ్గు, జ్వరం, శ్వాస ఆడక బాధపడుతున్నారు. అలాంటి వారిలో రిచర్డ్సన్ కుమారుడు కూడా ఒకడు.”నాన్న… నా ఛాతి చాలా నొప్పిగా ఉంది,” అని ఒక సన్నని గొంతు నుంచి వినిపించింది. పాలిపోయిన ముఖంతో, వెచ్చని దుప్పటిలో వణికిపోతున్న తన కొడుకును చూసి రిచర్డ్సన్ గుండె తల్లడిల్లింది.
డాక్టర్లు చెప్పిన కషాయాలు, ఆకులు, పువ్వులతో చేసిన మందులు, ఏవి కూడా ఆ చిన్నారికి ఉపశమనం ఇవ్వలేకపోయాయి. ఒక తండ్రిగా తన బిడ్డ పడుతున్న బాధను చూసి నిస్సహాయంగా ఉండిపోవడం కంటే పెద్ద నరకం మరొకటి ఉండదు.ఆ రాత్రి లూన్స్‌ఫోర్డ్ రిచర్డ్సన్ ఒక రసాయన శాస్త్రవేత్తగా కాదు, ఒక పరుగు పందెంలో పాల్గొనే తండ్రిలా మారాడు.
మంచుతో గడ్డకట్టిన రాత్రిలో, ఆ చిన్న గదిలో, అతను కాలంతో పోటీపడ్డాడు. తన కొడుకుకు ఊపిరి అందాలి, సుఖంగా నిద్రపోవాలి అనే ఒకే ఒక్క లక్ష్యంతో, అతను తన ప్రయోగాలను మొదలుపెట్టాడు. క్యాంఫర్, మెంథాల్, యూకలిప్టస్ వంటి రసాయనాలతో అతను ప్రయోగాలు చేశాడు. అవి అతని దృష్టిలో కేవలం రసాయనాలు కాదు,
ఒక తండ్రి ఆవేదన, ఒక బిడ్డకు ప్రశాంతతను అందించే ఒక ప్రార్థన. ప్రతి చుక్క, ప్రతి కలయిక, ఒక నిశ్శబ్దమైన అభ్యర్థన. “నా బిడ్డ సుఖంగా నిద్రపోవాలి. నా బిడ్డ ఊపిరి తీసుకోవాలి.”కొన్ని గంటల నిశ్శబ్ద పరిశోధన తర్వాత, ఒక చిక్కటి లేపనం ఆ చిన్న పాత్రలో రూపుదిద్దుకుంది. అది ఒక అద్భుతంలా కనిపించింది.
ఆ లేపనాన్ని తన కుమారుడి ఛాతి మీద సున్నితంగా రుద్దాడు. ఆ వెచ్చని స్పర్శ, ఆ ఘాటైన వాసన… కొద్దిసేపటికే ఆ చిన్నారి నిశ్శబ్దంగా నిద్రలోకి జారుకున్నాడు. ఆ నిద్రలో కేవలం ఒక చిన్నారి ఉపశమనం మాత్రమే కాదు, ఒక తండ్రి గుండెలో ఆశ చిగురించడం కూడా ఉంది. తన కొడుకు కోసం పుట్టిన ఆ మందును, అతను ‘విక్స్’ అని పిలిచాడు. విక్స్ అంటే ‘విజయం’ (victory) అని అర్థం.
అయితే ఈ విజయం కేవలం వ్యాపార విజయం కాదు, ఒక తండ్రి ప్రేమకు, ఆశకు దక్కిన విజయం.మొదట్లో ఈ మందును ఎవరూ నమ్మలేదు. రిచర్డ్సన్ తన మందు డబ్బాలను పట్టుకుని ప్రతి ఇంటికి వెళ్ళేవాడు, ప్రజలు అతడిని చూసి నవ్వుకునేవారు, అవమానించేవారు. “ఒక చిక్కటి క్రీమ్ ఎలా జ్వరాన్ని, దగ్గును తగ్గిస్తుంది?” అని ప్రశ్నించేవారు. కానీ రిచర్డ్సన్ వెనక్కి తగ్గలేదు.
ప్రతి తలుపు దగ్గర, ప్రతి అనుమానం మధ్య, అతను నిలబడ్డాడు. అతని నమ్మకం కేవలం ఆ మందు మీద కాదు, ఒక తండ్రి ప్రేమ మీద. రిచర్డ్సన్ ఇలా కష్టాలు పడుతున్న సమయంలో, చరిత్రలో ఒక చీకటి అధ్యాయం మొదలైంది. 1918లో, స్పానిష్ ఫ్లూ అనే మహమ్మారి ప్రపంచాన్ని కుదిపేసింది. లక్షలాది మంది జ్వరం, దగ్గు, శ్వాసకోశ వ్యాధులతో బాధపడ్డారు. హాస్పిటళ్లు నిండిపోయాయి, మందుల దుకాణాల్లో మందులు లేవు.
ఆ సమయంలో, రిచర్డ్సన్ తయారు చేసిన విక్స్ ప్రజలకు ఒక ఆశాదీపంగా మారింది. శ్వాస ఆడక ఇబ్బంది పడుతున్న వారికి, జ్వరంతో వణికిపోతున్న వారికి, విక్స్ ఒక ఊరటగా నిలిచింది. ఒకప్పుడు ఎవరూ నమ్మని ఆ చిన్న డబ్బా, లక్షలాది ఇళ్లలో ఒక నిధిగా మారింది. షెల్ఫులు ఖాళీ అయ్యాయి. ప్రతి ఇంట్లో ఆ ఘాటైన, ఉపశమనం కలిగించే వాసన నిండిపోయింది.
ఆ మహమ్మారి సమయంలో, విక్స్ కేవలం ఒక మందు కాదు, ఒక రక్షణ కవచం గా మారింది. విక్స్‌కు ప్రపంచవ్యాప్త గుర్తింపు రాకముందే, రిచర్డ్సన్ తన మరో బిడ్డను కోల్పోయాడు. అతను తన కుమారుడి కోసం ఈ మందును తయారు చేయడం మొదలుపెట్టి, అది విజయం సాధించే లోపే, ఆ బిడ్డ అనారోగ్యంతో కన్నుమూశాడు.
ఈ విషాదం రిచర్డ్సన్ గుండెలో ఒక లోతైన గాయాన్ని మిగిల్చింది. తన స్వంత బిడ్డను కాపాడు కోలేకపోయానన్న నిస్సహాయత, ఆ బాధ, నిశ్శబ్దమైన అపరాధ భావం… ఇవే అతనిని ఈ మందును ప్రపంచానికి అందించడానికి ప్రేరేపించాయి. అతను తన కొడుకును కాపాడుకోలేకపోయినా, ఈ మందు ద్వారా ప్రపంచంలోని కోట్లాది మంది పిల్లల బాధను తగ్గించగలిగాడు.
ఈ కథ వింటున్నప్పుడు, మనం ప్రతిరోజు చూసే విక్స్ డబ్బాలో కేవలం మందు మాత్రమే కాదు, ఒక తండ్రి ప్రేమ, త్యాగం, కన్నీళ్లు కూడా ఉన్నాయి అని అర్థం అవుతుంది. ఈ మందు మనకు కేవలం శ్వాసను మాత్రమే కాదు, మానవత్వం యొక్క గాఢమైన ప్రేమను గుర్తు చేస్తుంది.
విక్స్ పేరిట మార్కెట్లో మనకు విక్స్ వేపోరబ్, విక్స్ వేపోరబ్ ఎక్స్‌ట్రా స్ట్రాంగ్,విక్స్ బేబీరబ్, ఇన్ హేలర్,విక్స్ దగ్గు చుక్కలు,నైక్విల్, డేక్విల్,విక్స్ వేపోరబ్ స్టీమ్ పాడ్స్, విక్స్ 3-ఇన్-1 లోజెంజెస్ వంటి అనేక రకాల ఉత్పత్తులు అందుబాటులో ఉన్నాయి.
