Subramanyam Dogiparthi ……………………………
‘సత్య చిత్ర’ బ్యానర్ పై నిర్మాతలు సూర్యనారాయణ,సత్యనారాయణలు మంచి సినిమాలే తీశారు. ‘ప్రేమబంధం’ కు ముందు ‘తాసిల్దార్ గారి అమ్మాయి’ కూడా వారు తీసిందే. రెండింట్లో శోభన్ బాబు హీరో. ఎన్టీఆర్ తో అడవిరాముడు తీయకముందు ఈ ‘ప్రేమ బంధం’ తీశారు.
ఆ తర్వాత అడవి నేపథ్యంలో మరో సినిమా తీయాలని అనుకున్నారు. శోభన్ బాబే హీరో. అయితే ఆయన ఎందుకో చేయనున్నారు. ఆ కథ రకరకాలుగా రూపాంతరం చెంది ‘అడవిరాముడు’ గా తెరకెక్కి సూపర్ హిట్ అయింది.
ఇక ప్రేమ బంధం విషయానికొస్తే … ఈ సినిమాలో నాకు బాగా ఇష్టమయింది జయమాలిని జావళి . అద్భుతమైన సాహిత్యం , సంగీతం . వీటికి ధీటుగా జయమాలిని నృత్యం . జయమాలిని చేత , మంజు భార్గవి చేత కళావర్షాన్ని కురిపించారు కళాతపస్వి కె విశ్వనాథ్ .
” అంజలిదే గొనుమా ప్రియతమా మంజుల బృందా నికుంజ నిరంజనా ” . తెలుగీకరించబడిన సంస్కృతం. ఈ గీతానికి మధురమైన సంగీతాన్ని అందించిన కె వి మహదేవన్ని , పాడిన సుశీలమ్మని స్మరించుకోవాలి .NTR ఆరాధన సినిమా తో పోటీ పడి విశ్వనాథ్ గారి ఈ ‘ప్రేమబంధం’ సినిమా ఆడలేకపోయిందని చాలామంది చెపుతుంటారు.
ఆ పోటీ లేకపోయున్నా కమర్షియల్ గా సక్సెస్ అయి ఉండేది కాదేమో !! నిస్సందేహంగా చక్కటి సినిమా. ఆరాధన పోటీ లేకపోతే ఇంకొంచెం బాగా ఆడి ఉండేదేమో ! ఈ సినిమాలో గుర్తుండిపోయే పాత్రలు సత్యనారాయణ-షావుకారు జానకిలదే.. ఆఇద్దరి పాత్రలు బాగుంటాయి. ఇద్దరూ పోటీ పడి నటించారు. వాణిశ్రీ తన నటనను చూపించే స్కోప్ ఉన్నపాత్ర కాదని నా అభిప్రాయం. తన పాత్రను వాణిశ్రీ సమర్ధవంతంగానే చేసింది.
శోభన్ బాబు చలాకీగా నటించారు . జయప్రద తనకొచ్చిన అవకాశాన్ని బాగానే ఉపయోగించుకుంది. ఇతర పాత్రల్లో దేవదాస్ కనకాల , సాక్షి రంగారావు , గిరిజ , రావు గోపాలరావు , మాడా ప్రభృతులు నటించారు.రావు గోపాలరావు సాఫ్ట్ విలనిజం ఈ సినిమాతోనే మొదలయిందేమో ! రివర్స్ విలనిజం . బాధితుల దగ్గర నుండే డబ్బులు వసూలు చేసే విలనిజం.
అంజలిదే గొనుమా పాట తర్వాత మెచ్చుకోవలసింది సి నారాయణరెడ్డి వ్రాసిన ఎక్కడున్నాను నేనెక్కడున్నాను పాట . బాలసుబ్రమణ్యం , రామకృష్ణ , సుశీలమ్మలు పాడారు . ఈ పాటలో తాయారమ్మ బంగారయ్యలు గొప్పగా నటించారు. అమ్మమ్మా అల్లరి పిడుగమ్మా , ఏ జన్మకైనా ఇలాగే ఉందామా , పువ్వులా నవ్వితే మువ్వలా మోగితే పాటలు శ్రావ్యంగా ఉంటాయి . సాహిత్యపరంగా సి నారాయణరెడ్డి వ్రాసిన పువ్వులా నవ్వితే పాట బాగుంటుంది.
ఇంకో పాట చేరేదెటుకో తెలిసి చేరువకాలేమని తెలిసి అనే వేటూరి వారి పాట బాగుంటుంది. ఆ వేటూరి వారే తర్వాత కాలంలో అ అంటే అమలాపురం , ఆరేసుకోపోయి పారేసుకున్నాను హరీ వంటి పాటలు రాశారు. కవుల కత్తులకు రెండు వైపులా పదును ఉంటాయి. వాళ్ళ మూడుని బట్టి , ముడుపులను బట్టి సాహిత్యం కురుస్తుందేమో !
ఈ సినిమా కధా రచయిత్రి జయలక్ష్మి అని టైటిల్సులో వేసారు. మరి ఇది ఏదయినా నవలా లేక పెద్ద కధా అనేది తెలియదు. గొల్లపూడి మంచి సంభాషణలు అందించారు. సినిమా యూట్యూబులో ఉంది . చూడబులే . శోభన్ బాబు , వాణిశ్రీ , సత్యనారాయణ , షావుకారు జానకి అభిమానులు తప్పక చూడవచ్చు ఇంతకుముందు చూడనట్లయితే.
దురదృష్టం ఏమిటంటే జయమాలిని జావళి వీడియో లేదు . కేవలం ఆడియో మాత్రమే ఉంది . సినిమా రంగంతో సంబంధం ఉన్న వారు ఎవరయినా ఆ వీడియోని యూట్యూబులోకి ఎక్కిస్తే కళాభిమానులకు పసందుని కలగచేసినవారు అవుతారు . లేదా టివిలో వచ్చినప్పుడు ఆ జావళిని చూడండి .
