Ravi Vanarasi……..
పర్యావరణాన్ని కాపాడుకోవడానికి ఆ బాలిక చూపించే అకుంఠిత దీక్ష ఎందరికో స్ఫూర్తి దాయకం. శ్రీనగర్‌లోని సుప్రసిద్ధ దాల్ సరస్సు విషయంలోనూ అలాంటి అద్భుతమే జరుగుతోంది.కేవలం 14 ఏళ్ల బాలిక జన్నత్ పట్లూ అంకితభావంతో యావత్ సరస్సు భవితవ్యాన్ని మార్చేందుకు నడుం బిగించింది.
ప్రపంచంలోని చాలామంది టీనేజర్లకు ఆదివారం అంటే విశ్రాంతి, ఆటలు లేదా స్నేహితులతో గడపడం. కానీ శ్రీనగర్‌కు చెందిన జన్నత్ పట్లూ దినచర్య మాత్రం పూర్తిగా భిన్నం. ఆమె ఆదివారం ఉదయం దాల్ సరస్సు అలల మీద పడవ నడుపుతూ, నీటిలో తేలుతున్న ప్లాస్టిక్ సీసాలు, ప్యాకెట్లు, ఇతర చెత్తను ఏరివేస్తుంది.
ఈ పని ఆమె నేర్చుకున్నది కాదు, తనకు ఐదేళ్ల వయస్సు నుంచే ఇది ఆమె జీవితంలో ఒక భాగమైపోయింది. అంటే బాల్యం నుంచి సరస్సులో చెత్త ఏరడం జన్నత్ కి ఆటగా మారింది! జన్నత్ ఈ అద్భుతమైన ప్రయాణానికి ప్రేరణగా నిలిచింది ఆమె తండ్రి తారిఖ్ అహ్మద్ పట్లూ.
తారిఖ్ అహ్మద్ పట్లూ దాల్ సరస్సులో మూడో తరం హౌస్ బోట్ యజమాని, స్వచ్ఛంద పర్యావరణ కార్యకర్త. ఈ సరస్సే తమ ఇల్లు, జీవనాధారం అని నమ్మే తారిఖ్, దాల్ సరస్సు సంరక్షణకు అవిశ్రాంతంగా కృషి చేస్తున్నారు.
తండ్రి కృషిని దగ్గరగా చూసిన జన్నత్, తానూ ఆ మహాకార్యంలో భాగం కావాలని నిర్ణయించుకుంది. చిన్నారి హృదయంలో కలిగిన ఆ సంకల్పమే, ఆమెను సరస్సును కాపాడే ‘గ్రీన్ వారియర్’గా మార్చింది. తన వారాంతపు విరామాన్ని సరస్సును రక్షించే మహా యజ్ఞంగా మార్చుకుంది.
ఒకప్పుడు ‘కాశ్మీర్ ఆభరణం’గా ప్రసిద్ధి చెందిన దాల్ సరస్సు ఈనాడు తీవ్ర కాలుష్యం, పూడిక సమస్యలను ఎదుర్కొంటోంది. పర్యాటక రంగం, వ్యవసాయం, చుట్టుపక్కల నివాసాల నుండి వచ్చే మురుగునీరు,ప్లాస్టిక్ వ్యర్థాల కారణంగా సరస్సు పర్యావరణ వ్యవస్థ ప్రమాదంలో పడింది.
సరస్సు విస్తీర్ణం గణనీయంగా తగ్గిపోవడం, నీటి నాణ్యత క్షీణించడం వంటి సమస్యలు ఈ ప్రాంత జీవవైవిధ్యానికే సవాలు విసురుతున్నాయి.ఈ కష్టకాలంలో జన్నత్ పట్లూ వ్యక్తిగత కృషి చిన్నదైనా, దాని ప్రభావం చాలా పెద్దది. ఆమె ఏరివేసిన ప్రతి ప్లాస్టిక్ సీసా, ప్రతి ప్యాకెట్ సరస్సుకు కొత్త ఊపిరి పోసింది.
ఆమె నిరంతర శ్రమతో దాల్ సరస్సులోని కొన్ని భాగాలు స్పష్టంగా పరిశుభ్రమయ్యాయి, ఇది సరస్సు పర్యావరణాన్ని మెరుగుపరచడంలో చెప్పుకోదగిన మార్పు.జన్నత్ కృషి కేవలం సరస్సు తీరానికి మాత్రమే పరిమితం కాలేదు.ఆమె అంకితభావం, పర్యావరణం పట్ల ఆమెకున్న ప్రేమ దేశం దృష్టిని ఆకర్షించాయి.
జన్నత్ పట్లూ స్ఫూర్తిదాయక కథనం దేశంలోని అనేక పాఠశాలల పాఠ్యప్రణాళికలలో చోటు సంపాదించుకుంది.తద్వారా, రాబోయే తరాలకు పర్యావరణ పరిరక్షణ ప్రాముఖ్యతను ఆమె ద్వారా బోధిస్తున్నారు. దేశ అత్యున్నత నాయకుడి నుండి కూడా ఆమె ప్రశంసలు అందుకున్నారు, ఇది ఆమె పనికి లభించిన గొప్ప గుర్తింపు.
జన్నత్ కృషి కేవలం చెత్తను ఏరడం మాత్రమే కాదు. అది ఒక సందేశం. ‘ఒకే వ్యక్తి కూడా ప్రపంచాన్ని మార్చగలడు’ అనే నమ్మకానికి ఆమె ఒక సజీవ నిదర్శనం. ఆమె నిస్వార్థ సేవను చూసిన అనేక మంది స్థానికులు, పర్యాటకులు ఈ ప్లాస్టిక్ వ్యర్థాల సేకరణ కార్యక్రమంలో ఆమెతో చేతులు కలిపారు. ఆమె ఉద్యమం ఇప్పుడు చిన్న పిల్లల నుండి పెద్దల వరకు అందరిలోనూ పర్యావరణ స్పృహను పెంచుతోంది.
ప్రతి పౌరుడు తమ చుట్టూ ఉన్న పర్యావరణాన్ని తమ బాధ్యతగా భావిస్తే, ఎలాంటి మహా సరస్సులు లేదా నదులైనా తిరిగి పూర్వ వైభవాన్ని పొందగలవని ఆమె నిరూపించారు. దాల్ సరస్సుకు జన్నత్ అందించిన సేవ, భవిష్యత్తు తరాలకు ఒక అద్భుతమైన వారసత్వం.
