Ravi Vanarasi ……………………………
ప్రాచీన గ్రీస్ దేశం, దాని మహోన్నత చరిత్ర, పురాణాలు, తత్వశాస్త్రానికి పెట్టింది పేరు. అయితే, ఈ భూమిపై మానవ నిర్మిత అద్భుతాలు కూడా ఎన్నో ఉన్నాయి, వాటిలో ఒకటి కోరింత్ కాలువ (Corinth Canal). దీన్ని వండర్ ఆఫ్ గ్రీస్ అంటారు.గ్రీస్‌లోని ఈ కాలువ కేవలం ఒక జలమార్గం మాత్రమే కాదు. ఇది మానవ సంకల్పానికి, ఇంజనీరింగ్ నైపుణ్యానికి, ప్రకృతి సవాళ్లను అధిగమించిన విజయానికి సజీవ సాక్ష్యం.
ఈ కాలువ ఇయోనియన్ సముద్రాన్ని.. ఏజియన్ సముద్రంతో కలుపుతూ, పెలోపొన్నేస్ ద్వీపకల్పం చుట్టూ సుమారు 325 కిలోమీటర్ల సుదీర్ఘ ప్రయాణాన్నితప్పించి,నౌకలకు విలువైన సమయాన్ని ఆదా చేస్తుంది.
చరిత్రలో కోరింత్ కాలువ.. వేల సంవత్సరాల కల! ప్రాచీన గ్రీకుల కాలం నుంచే ఈ ఆలోచనలున్నాయి. పెలోపొన్నేస్ ద్వీపకల్పం … ఇస్త్ముస్ ఆఫ్ కోరింత్ (Isthmus of Corinth) వద్ద భూభాగాన్ని తవ్వించి, రెండు సముద్రాలను కలపాలని అనేక మంది చక్రవర్తులు, పాలకులు కలలు కన్నారు.
కోరింత్ నియంత పెరియాండర్, మొట్టమొదటిసారిగా ఒక కాలువను నిర్మించాలనే ఆలోచన చేశాడు. అయితే, అప్పటి సాంకేతిక పరిజ్ఞానం, ఆర్థిక స్థోమత ఈ భారీ ప్రాజెక్టుకు సరిపోకపోవడంతో, అతను ‘డియోల్కోస్’ (Diolkos) అనే ఒక రాతి మార్గాన్ని నిర్మించాడు. దీని ద్వారా చిన్న నౌకలను ఒక వైపు నుండి మరొక వైపుకు లాగేవారు.
ఈ ప్రాచీన మార్గం అవశేషాలు ఈనాటికి కాలువకు దగ్గరలో చూడవచ్చు. అలెగ్జాండర్ ది గ్రేట్, డెమెట్రియస్ పోలియోర్సిటెస్, జూలియస్ సీజర్ వంటి గొప్ప నాయకులందరూ కోరింత్ కాలువ నిర్మాణానికి ప్రయత్నించారు. దాని గురించి ఆలోచించారు. కానీ ఏ ఒక్కరూ కూడా తమ లక్ష్యాన్ని చేరుకోలేకపోయారు.
రోమన్ చక్రవర్తి నీరో ఈ కాలువ నిర్మాణానికి అత్యంత సమీపంలోకి వచ్చాడు. అతను స్వయంగా మొదటి తవ్వకాన్ని ప్రారంభించి, తన సైనికులతో, వేలాది మంది బానిసలతో పని చేయించాడు. అయినప్పటికీ, రాజకీయ అస్థిరత, ఆర్థిక సమస్యల కారణంగా కేవలం కొన్ని వందల మీటర్ల పని పూర్తయ్యాక ఈ ప్రాజెక్ట్ నిలిచిపోయింది.
ఆధునిక సాంకేతిక పరిజ్ఞానం అందుబాటులోకి వచ్చేవరకు వేల సంవత్సరాల కల అలానే మిగిలి పోయింది,.కోరింత్ కాలువ ఆధునిక నిర్మాణం1881లో ప్రారంభమై, దాదాపు 12 సంవత్సరాల అవిశ్రాంత కృషి తర్వాత 1893లో పూర్తయింది. ఈ ఫెర్డినాండ్ డి లెస్సెప్స్ (Suez Canal రూపకర్త) స్ఫూర్తి తో కాలువ నిర్మాణం జరిగింది. వాస్తవ నిర్మాణం ఇస్త్ముస్ ఆఫ్ కోరింత్ కంపెనీకి చెందిన హంగేరియన్ ఇంజనీర్లు ఇస్త్వాన్ టిర్ర్, బెలా గెర్స్టర్ పర్యవేక్షణలో జరిగింది.
ఇస్త్ముస్ రాతి భూభాగాన్ని దాదాపు 80 మీటర్ల లోతు వరకు తవ్వడం అనేది భారీ సవాల్. ఎలాంటి ఆధునిక యంత్రాలు లేని ఆ రోజుల్లో, వేలాది మంది కార్మికులు, చేతి పరికరాలు,పేలుడు పదార్థాలను ఉపయోగించి ఈ పనిని పూర్తి చేశారు. కాలువ గోడలు చాలా నిటారుగా ఉన్నందున, కొండచరియలు విరిగిపడకుండా వాటిని బలోపేతం చేయడానికి ప్రత్యేక శ్రద్ధ తీసుకున్నారు.
ఈ నిర్మాణం అప్పట్లో ప్రపంచంలోనే అత్యంత సంక్లిష్టమైనది. ఇది ఖర్చుతో కూడుకున్న భారీ ఇంజనీరింగ్ ప్రాజెక్టులలో ఒకటిగా పరిగణించబడింది. కోరింత్ కాలువ పొడవు సుమారు 6.4 కిలోమీటర్లు (4 మైళ్ళు). ఈ చిన్న దూరం నౌకలకు వందల కిలోమీటర్ల ప్రయాణాన్ని ఆదా చేస్తుంది. వెడల్పు.. కేవలం 21 మీటర్లు (69 అడుగులు). ఇదే ఈ కాలువ ప్రధాన పరిమితి.
ప్రపంచంలోని అతి పెద్ద నౌకలు, ముఖ్యంగా కంటైనర్ నౌకలు, భారీ క్రూయిజ్ షిప్‌లు, ఈ కాలువ గుండా ప్రయాణించలేవు. కాలువ లోతు దాదాపు 8 మీటర్లు (26 అడుగులు).. ఎత్తు కాలువ గోడలు నీటి స్థాయి నుండి 80 మీటర్ల (260 అడుగులు) ఎత్తు వరకు నిటారుగా పైకి లేస్తాయి. ఈ నిటారు గోడలు కాలువకు ఒక అద్భుతమైన రూపాన్ని ఇచ్చాయి.
ప్రారంభంలో ఈ కాలువ గ్రీస్ … ఐరోపా మధ్య వాణిజ్యాన్ని గణనీయంగా మెరుగుపరుస్తుందని భావించారు. ఇది ఏథెన్స్ నౌకాశ్రయానికి అందుబాటు లో ఉండటంతో గ్రీక్ ఆర్థిక వ్యవస్థకు ఊపునిస్తుందని ఆశించారు. అయితే 20వ శతాబ్దంలో నౌకల పరిమాణం విపరీతంగా పెరగడంతో, కోరింత్ కాలువ తన వాణిజ్య ప్రాముఖ్యతను కోల్పోయింది.
ఇది ప్రధానంగా చిన్న నౌకలు, పడవలు, పర్యాటక నౌకలకు ఉపయోగపడుతుంది. అయినప్పటికీ, ఇది ఇప్పటికీ గ్రీస్ లోని అత్యంత ముఖ్యమైన మౌలిక సదుపాయాలలో ఒకటిగా నిలిచింది.ప్రస్తుతం కోరింత్ కాలువ ఒక ప్రముఖ పర్యాటక ఆకర్షణగా మారింది. దీని అద్భుతమైన నిర్మాణ శైలి, నిటారుగా లేచిన గోడలు, చిన్న పడవలు ఆ ఇరుకైన మార్గంలో ప్రయాణించే దృశ్యం సందర్శకులను మంత్రముగ్ధులను చేస్తుంది.
కాలువ పైన అనేక వీక్షణ స్థలాలు ఉన్నాయి, ఇక్కడ నుండి సందర్శకులు కాలువ పూర్తి దృశ్యాన్ని ఆస్వాదించవచ్చు. ప్రత్యేకించి, కాలువకు ఇరువైపులా ఉన్నవంతెనల నుండి చూస్తే, దాని లోతు, వెడల్పు, పక్కనున్న నిటారు రాతి గోడల సౌందర్యం స్పష్టంగా కనిపిస్తుంది.
పర్యాటకులు కాలువ గుండా చిన్నబోట్లలో ప్రయాణించవచ్చు. ఈ బోట్లు కాలువ గోడలకు అత్యంత దగ్గరగా ప్రయాణిస్తాయి. ఇంజనీరింగ్ అద్భుతాన్ని,చారిత్రక ప్రాముఖ్యతను ప్రత్యక్షంగా తెలుసుకోవడానికి ఒక అద్భుతమైన అవకాశం.సాహస ప్రియుల కోసం, కాలువ వంతెన నుండి బంగీ జంపింగ్ సౌకర్యం కూడా ఉంది. 80 మీటర్ల ఎత్తు నుండి కాలువ లోపలికి దూకడం ఒక జీవితకాలపు అనుభవం.
కాలువ సమీపంలోనే ప్రాచీన డియోల్కోస్ మార్గం తాలూకు అవశేషాలు ఉన్నాయి. కాలువ ఆలోచన ఎంత ప్రాచీనమైనదో పర్యాటకులకు అవగతమవుతుంది. కోరింత్ కాలువను సందర్శించడం అంటే కేవలం ఒక జలమార్గాన్ని చూడటం మాత్రమే కాదు. ఇది మానవ ఇంజనీరింగ్ ప్రతిభను, పట్టుదలను సూచిస్తుంది.
కోరింత్ కాలువ దాని వాణిజ్య గరిష్ట స్థాయిని దాటి ఉండవచ్చు, కానీ దాని చారిత్రక, సాంస్కృతిక, పర్యాటక ప్రాముఖ్యత ఇప్పటికీ చెక్కుచెదరలేదు. ఇది గ్రీస్ చిహ్నం గా .. ప్రాచీన కలలు… ఆధునిక విజయాల మధ్య వారధిగా నిలిచింది. గ్రీస్ సందర్శించే ప్రతి ఒక్కరూ తప్పక చూడవలసిన ప్రదేశం ఇది.
