Winning chances ………………………………………………….
బ్రిటన్ ప్రధాని పదవి నుంచి బోరిస్ జాన్సన్ వైదొలగుతారని తేలగానే.. ఆయన వారసుడిగా తొలుత వినిపించిన పేరు రిషి సునాక్. కానీ ప్రధాని పదవి కోసం కన్జర్వేటివ్ పార్టీలో పోటీ ముదిరే కొద్దీ సునాక్ వెనకబడుతున్నారు. బరిలో ఉన్న లిజ్ ట్రస్ ఇప్పుడు ప్రధాని పదవికి దగ్గరవుతున్నారు. పోటీ ముగింపు దశకు చేరే కొద్దీ పరిస్థితులు ఆమెకు అనుకూలంగా మారుతున్నాయి.
ఎవరీ లిజ్ ట్రస్ ?
1975లో ఆక్స్‌ఫర్డ్‌ లో వామపక్ష భావజాలం ఉన్న కుటుంబంలో లిజ్ ట్రస్ జన్మించారు. ఆమె తండ్రి లెక్కల ప్రొఫెసర్ .. తల్లి నర్స్. వారి కుటుంబం తర్వాత గ్లాస్గో కు వలస వెళ్లింది. ఆమె చిన్నప్పుడు తల్లితో కలిసి అణ్వాయుధ వ్యతిరేక ఉద్యమంలో కూడా పాల్గొంది. అప్పట్లో అమెరికా అణ్వాయుధాలను రాయల్ ఎయిర్‌ఫోర్స్ బేస్లో ఉంచాలని నిర్ణయించారు. ఆ తర్వాత రౌండేలో స్కూల్ విద్యాభ్యాసం పూర్తి చేసి.. ఆక్స్‌ఫర్డ్‌ లో చేరారు. అక్కడ ఫిలాసఫీ, పాలిటిక్స్, ఎకనామిక్స్ చదువుకున్నారు.
స్కూల్ లో చదివేటపుడు లిజ్ చురుకైన విద్యార్థిగా గుర్తింపు పొందారు. ఒకసారి నాటికలో మార్గరేట్ థాచర్ పాత్ర పోషించింది. ఆ నాటికలో భాగంగా ఉత్తుత్తి ఎన్నికలు నిర్వహించారు. దానికి ముందు అభ్యర్థులు ప్రసంగించాలి. లిజ్ కూడా అలాగే చేసింది.. కానీ, ఒక్క ఓటు కూడా లిజ్కు రాలేదు. చివరికి తన ఓటు కూడా తనకు వేసుకోలేదు. దాదాపు 39 ఏళ్ల తర్వాత అదే లిజ్ ఇప్పుడు బ్రిటన్ ప్రధాని రేసులో హాట్ ఫేవరెట్ గా నిలిచి పార్టీ సభ్యులను ఓట్లు అడుగుతోంది.
లిజ్ విద్యార్థి రాజకీయాల్లో లిబరల్ డెమోక్రాట్ల తరపున చురుగ్గా పాల్గొనే వారు. ఆ తర్వాత కొన్నేళ్లకే ఆమె కన్జర్వేటివ్ పార్టీకి మారారు. డిగ్రీ తర్వాత ఆమె అకౌంటెంట్ గా పనిచేశారు. ఆ సమయంలో ఆమె హ్యూ ఓ లియారీని పెళ్లి చేసుకొన్నారు. వీరికి ఇద్దరు సంతానం. 2001లో ఎన్నికల్లో కన్జర్వేటివ్ పార్టీ తరపున లిజ్ ట్రస్ హెమ్స్ వర్త్ నుంచి ఎన్నికల్లో పోటీ చేసి ఓడిపోయారు.
మరోసారి 2005 ఎన్నికల్లో కాల్డర్ వ్యాలీలో పోటీ చేసి ఓటమి పాలయ్యారు. ఆ తర్వాత తొలిసారి ఆగ్నేయ లండన్లోని గ్రీన్ విచ్ నుంచి కౌన్సిలర్ గా విజయం సాధించారు. 2008లో రైట్ ఆఫ్ సెంటర్ రిఫార్మ్ థింక్ ట్యాంక్ లో డిప్యూటీ డైరెక్టర్ గా చేరారు. కన్జర్వేటివ్ పార్టీ నేత డేవిడ్ కేమరూన్ 2010లో జరిగిన ఎన్నికలకు ఆమెను అభ్యర్థిగా ఎంపిక చేశారు.
ఆ ఎన్నికల్లో ఆమె నార్ఫాక్ నుంచి పోటీ చేసి 13,000 వేల ఓట్లతో గెలిచారు. కొన్నాళ్ళు విద్యాశాఖ మంత్రిగా పని చేశారు. 2012లో ఆమె వ్యక్తిగత జీవితంపై విమర్శలు రావడంతో పదవి నుంచి తప్పించే ప్రయత్నాలు జరిగాయి. అవేవి ఫలించలేదు. ఈ క్రమంలో పాఠశాల సంస్కరణలపై డిప్యూటీ పీఎం తో ఆమె గొడవపడ్డారు.
2014 నాటికి ఆమెను ప్రధాని కేమరూన్ తన కేబినేట్ లోకి తీసుకొని.. పర్యావరణ శాఖ సెక్రటరీగా నియమించారు. ఆమె బ్రెగ్జిట్ వ్యతిరేకి..బ్రిటన్ చరిత్రలో జరిగిన అత్యంత కీలకమైన బ్రెగ్జిట్ ను ఆమె తీవ్రంగా వ్యతిరేకించారు. ఐరోపా సమాఖ్యలో కొనసాగడానికే ఆమె మొగ్గు చూపారు. బ్రెగ్జిట్ వల్ల వ్యాపారాల్లో మరింత జాప్యం చోటు చేసుకొంటుందని అభిప్రాయపడ్డారు. కానీ, బ్రెగ్జిట్ కు బ్రిటన్లో ఆమోద ముద్రపడటంతో మనసు మార్చుకొన్నారు.
2019లో బోరిస్ జాన్సన్ ప్రధాని అయ్యాక ఇంటర్నేషనల్ ట్రేడ్ సెక్రటరీగా బాధ్యతలు స్వీకరించారు. మరో రెండేళ్లకే బ్రిటన్ విదేశాంగశాఖ సెక్రటరీగా బాధ్యతలు తీసుకున్నారు. బోరిస్ ప్రధాని పదవి నుంచి వైదొలగుతున్నట్లు ప్రకటించడంతో లిజ్ ట్రస్ పేరు తెరపైకి వచ్చింది. రిషి పై జాన్సన్ గుర్రుగా ఉండటంతో.. ట్రస్ కి తెరవెనుక మద్దతునిస్తున్నారు. ఫలితంగా ఆమె రేసులో ముందుకొచ్చారు.
దాదాపు 1,60,000 మంది సభ్యులున్న కన్జర్వేటివ్ పార్టీలో మద్దతు కోసం ఆమె శతవిధాలా యత్నిస్తున్నారు. బ్రిటన్ మాజీ ప్రధాని మార్గరేట్ థాచర్ వలే కనిపించేందుకు ప్రయత్నిస్తున్నారు. ఈ శైలిని బ్రిటన్ మీడియా గుర్తించింది.
లిజ్ ట్రస్ తన ప్రచారంలో పెద్ద ఎత్తున ప్రజలకు తాయిలాలను ఇవ్వడాన్నే హైలెట్ చేస్తున్నారు. మొత్తం 30 బిలియన్ పౌండ్ల పన్ను రాయితీలను ఇస్తామనే హామీని ప్రధానంగా ప్రచారం చేస్తున్నారు. బోరిస్ జాన్సన్ తెర వెనుక నుంచి లిజ్ గెలుపు కోసం గట్టి ప్రయత్నాలు చేస్తున్నారని బ్రిటన్ మీడియా చెబుతోంది.
