Ravi Vanarasi ……………….
రెండురోజుల క్రితం జమ్మూ కాశ్మీర్‌లోని ప్రసిద్ధ పర్యాటక కేంద్రమైన పహల్గామ్ సమీపంలోని బైసారన్ పచ్చిక బయళ్లలో జరిగిన కిరాతక ఉగ్రదాడి దేశవ్యాప్తంగా తీవ్ర దిగ్భ్రాంతిని కలిగించింది. అమాయక పర్యాటకులు, విదేశీయులు, స్థానికులతో సహా అనేకమంది ప్రాణాలు కోల్పోయారు.
ఈ దుర్ఘటన ఉగ్రవాదాన్ని ఎదుర్కోవడంలో కౌంటర్ ఇంటెలిజెన్స్ పాత్ర ప్రాముఖ్యతను తెరపైకి తెచ్చింది. లష్కరే తోయిబా (Lashkar-e-Taiba) అనుబంధ సంస్థ ‘ది రెసిస్టెన్స్ ఫ్రంట్’ (The Resistance Front – TRF) ఈ దాడికి బాధ్యత ప్రకటించుకుంది. ఇటువంటి దాడులను నిరోధించడానికి, భవిష్యత్తులో ఇటువంటి సంఘటనలు జరగకుండా చూసుకోవడానికి కౌంటర్ ఇంటెలిజెన్స్ యంత్రాంగాన్ని బలోపేతం చేయడం అత్యవసరమని నిపుణులు చెబుతున్నారు. .
కౌంటర్ ఇంటెలిజెన్స్ అనేది ఒక దేశం లేదా సంస్థ భద్రతకు హాని కలిగించే విదేశీ శక్తులు లేదా సంస్థల గూఢచర్య కార్యకలాపాలు, విధ్వంసక చర్యలు, ఇతర రహస్య కార్యకలాపాలను గుర్తించి నిరోధించడమే. కౌంటర్ ఇంటెలిజెన్స్ ప్రధానంగా ఉగ్రవాద సంస్థల ప్రణాళికలను .. కార్యకలాపాలను ఫండింగ్‌ను, నెట్‌వర్క్‌లను అంచనా వేస్తూ …వాటిని నిర్వీర్యం చేయడంపై దృష్టి సారిస్తుంది.
పహల్గామ్ దాడి, కౌంటర్ ఇంటెలిజెన్స్ యంత్రాంగంలో కొన్ని లోపాలను ఎత్తి చూపింది. ఇంత పెద్ద సంఖ్యలో పర్యాటకులు ఉన్న ఒక సున్నితమైన ప్రాంతంలో దాడి జరగడం ఇంటెలిజెన్స్ వైఫల్యం అనే విమర్శలకు తావిచ్చింది. కౌంటర్ ఇంటెలిజెన్స్ కోణం నుండి ఈ దాడిని విశ్లేషిస్తే:
ముందస్తు సమాచారం లేకపోవడం .. దాడికి సంబంధించి నిర్దిష్ట ముందస్తు సమాచారం లేకపోవడం ఒక ప్రధాన సమస్య.
ఇది ఉగ్రవాదుల ప్రణాళికను గుర్తించడంలో వైఫల్యాన్ని సూచిస్తుంది. ఈ దాడిలో హైబ్రిడ్ టెర్రరిస్టుల ప్రమేయం ఉండవచ్చనే అనుమానాలున్నాయి. వీరిని సంప్రదాయ నిఘా పద్ధతుల ద్వారా గుర్తించడం చాలా కష్టం. వీరి కార్యకలాపాలను అంచనా వేయడానికి, ట్రాక్ చేయడానికి మరింత అధునాతన HUMINT నెట్‌వర్క్, టెక్నాలజీ అవసరం.
దాడి జరిగిన బైసారన్ ప్రాంతం చేరుకోవడం కష్టతరమైన ప్రదేశం.. ఇది ఉగ్రవాదులకు అనుకూలించింది. ఇలాంటి కష్టతరమైన ప్రాంతాలలో నిఘా, పెట్రోలింగ్‌ను పెంచాల్సిన అవసరం ఉంది.పహల్గామ్ వంటి పర్యాటక ప్రదేశాలు ఉగ్రవాదులకు సులువుగా లక్ష్యాలుగా మారతాయి.
ఇక్కడ సమాచార సేకరణ, భద్రతా ఏర్పాట్లను పటిష్టం చేయాలి. స్థానిక హోటళ్లు, గైడ్‌లు, ఇతర సర్వీస్ ప్రొవైడర్ల నుండి HUMINT సేకరించడం ముఖ్యం. ఉగ్రవాదులు ఎన్‌క్రిప్టెడ్ కమ్యూనికేషన్ (Encrypted Communication) పద్ధతులను ఉపయోగించడం లేదా ముఖాముఖి సమావేశాలపై ఆధారపడటం SIGINT సేకరణకు సవాల్ గా మారుతుంది.
పహల్గామ్ వంటి దాడులు పునరావృతం కాకుండా నిరోధించడానికి, కౌంటర్ ఇంటెలిజెన్స్ యంత్రాంగాన్ని అనేక విధాలుగా బలోపేతం చేయాలి.. స్థానిక ప్రజలతో బలమైన సంబంధాలు ఏర్పరచుకోవడం, విశ్వసనీయ సమాచార వనరులను అభివృద్ధి చేయడం అత్యంత ముఖ్యం. స్థానిక సమాచారం హైబ్రిడ్ టెర్రరిస్టులను, వారి స్లీపర్ సెల్స్‌ను గుర్తించడంలో కీలక పాత్ర పోషిస్తుంది.
రియల్-టైమ్ సర్వైలెన్స్ కోసం డ్రోన్లు (Drones), హై-రిజల్యూషన్ శాటిలైట్ ఇమేజరీ (High-Resolution Satellite Imagery), ఆర్టిఫిషియల్ ఇంటెలిజెన్స్ (Artificial Intelligence – AI) ఆధారిత డేటా విశ్లేషణ (Data Analysis) సైబర్ సర్వైలెన్స్ (Cyber Surveillance) వంటి ఆధునిక టెక్నాలజీలను విస్తృతంగా ఉపయోగించాలి.
వీటితో పాటు సెంట్రల్ ఇంటెలిజెన్స్ ఏజెన్సీలు, ఆర్మీ , సీఆర్‌పీఎఫ్, జమ్మూ కాశ్మీర్ పోలీస్ మధ్య నిరంతర సమాచార పంపిణీ ఉండాలి.కార్యాచరణ సమన్వయం ఉండాలి. ఉమ్మడి కమాండ్ సెంటర్లు ఏర్పాటు చేయడం ప్రయోజనకరం అవుతుంది.ఉగ్రవాద సంస్థలకు నిధులు ఎలా అందుతున్నాయో గుర్తించి .. ఆ ఫండింగ్ మార్గాలను అడ్డుకోవడం అత్యంత కీలకం.
టెర్రర్ ఫైనాన్సింగ్ పై నిఘా ఉంచడానికి ప్రత్యేక యూనిట్లను ఏర్పాటు చేయాలి. యువత ఉగ్రవాదం వైపు ఆకర్షితులు కాకుండా చూడాలి.కమ్యూనిటీ ఆధారిత కౌంటర్-రాడికలైజేషన్ కార్యక్రమాలను ప్రోత్సహించాలి.తప్పుడు ప్రచారాన్ని ఎదుర్కోవడానికి వ్యూహాత్మక కమ్యూనికేషన్ విధానాలను ఉపయోగించాలి.
పర్యాటక ప్రదేశాలు, రవాణా కేంద్రాలు, ఇతర ముఖ్యమైన ప్రదేశాల వద్ద భద్రతా ఏర్పాట్లు, నిఘాను పటిష్టం చేయాలి. యాక్సెస్ కంట్రోల్,నిఘా కెమెరాలు ఏర్పాటు చేయాలి.సరిహద్దుల వెంబడి నిఘాను పెంచి, ఫారెన్ టెర్రరిస్ట్ ఫైటర్లు కాశ్మీర్‌లోకి చొరబడకుండా నిరోధించాలి. బయోమెట్రిక్ డేటా .. ఇతర ఐడెంటిఫికేషన్ టెక్నాలజీలను ఉపయోగించాలి.
దాడి జరిగిన తర్వాత సమగ్ర దర్యాప్తు జరిపి, నిందితులను గుర్తించడం, వారి నెట్‌వర్క్‌లను ఛేదించడం, భవిష్యత్ దాడులను నిరోధించడానికి పాఠాలు నేర్చుకోవడం ముఖ్యం.
పార్ట్ 2 చదవండి . https://tharjani.in/results-will-only-come-if-the-intelligence-system-is-strengthened/
