Ravi Vanarasi ………
‘పుష్ప: ది రైజ్ ‘చిత్తూరు అడవుల నేపథ్యంలో, ఎర్రచందనం దుంగల అక్రమ రవాణా అనే ఒక ముడిసరుకుతో… ఇంతటి సంచలనం సృష్టిస్తుందని ఎవరూ అంచనా వేయలేదు. దర్శకుడు, రచయిత సుకుమార్ కలం నుండి, అల్లు అర్జున్ అనే ఒక మాస్ హీరో శరీర భాషలోకి, దేవి శ్రీ ప్రసాద్ సంగీత దర్శకుడి బీట్స్ లోకి, సినిమాటోగ్రాఫర్ మిరోస్లావ్ క్యూబా బ్రోజెక్ లెన్స్ లోకి ఆ కథ ప్రవేశించింది. ఆ కథే ‘పుష్ప: ది రైజ్
సినిమా విడుదలైన తర్వాత, అది కేవలం ఒక సినిమాగా మిగలలేదు; అది ఒక అగ్నిపర్వతంలా విస్ఫోటనం చెందింది.చిత్తూరు యాసలో, ఎటువంటి అడ్డు ఆపు లేకుండా, భుజం కిందికి పెట్టి, చేతిని ముక్కు కింద పెట్టుకుని, ఒక కూలీ నడిచివస్తుంటే, ఆ నడక, ఆ శబ్దం కేవలం థియేటర్ల డాల్బీ సౌండ్కి మాత్రమే పరిమితం కాలేదు.
అది కాశ్మీర్ పర్వతాల నుండి కన్యాకుమారి సముద్ర తీరం వరకు…గుజరాత్ మైదానాల నుండి నాగాలాండ్ కొండల వరకు…దేశమంతటా ఒక సునామీలా విస్తరించింది. జాతీయ రాజకీయ నాయకులు తమ ప్రసంగాలలో ఈ సినిమా డైలాగ్స్ను ఉపయోగించడం చూశాం. అంతర్జాతీయ క్రికెటర్లు మైదానంలో వికెట్ తీసిన తర్వాత ‘తగ్గేదే లే’ అనే హావభావంతో పండగ చేసుకున్నారు.
“తగ్గేదే లే”, “పుష్ప అంటే ఫ్లవర్ అనుకుంటివా.. ఫైర్” – ఇవి కేవలం కొన్ని డైలాగ్స్ మాత్రమే కాదు. ఇది ఒక ఆటిట్యూడ్. అదొక జీవన విధానం. ధైర్యాన్ని, బెదరని తత్వాన్ని, ఎదురుదెబ్బలు తగిలినా వెనక్కి తగ్గని మొండి పట్టుదలను సూచించే ఒక శక్తివంతమైన సాంస్కృతిక సంకేతంగా రూపాంతరం చెందింది.
‘పుష్ప: ది రైజ్ ‘ సినిమాను కేవలం ఒక యాక్షన్ ఎంటర్టైనర్ మాత్రమే అనుకుంటే .. సుకుమార్ సృష్టించిన లోతైన పాత్ర చిత్రణను విస్మరించడమే అవుతుంది. ఈ మొదటి భాగం, పుష్పరాజ్ అనే ఒక అనామకుడి, అక్రమ సంతానం అనే కళంకంతో జీవితాన్ని ప్రారంభించిన వ్యక్తి, సమాజం విధించిన ఆంక్షలను, అడ్డుగోడలను బద్దలు కొట్టి, ఎదుగుదలకు ప్రయత్నించే ఒక తిరుగుబాటు కథ.
పుష్పరాజ్ పాత్ర అత్యంత సంక్లిష్టమైనది. అతను పూర్తిగా మంచివాడు కాదు. పూర్తిగా చెడ్డవాడు కాదు. అతను గ్రే క్యారెక్టర్ వర్గానికి చెందినవాడు. అతని నేరపూరిత ప్రవృత్తి, అతని వ్యక్తిగత గౌరవం, సామాజిక గుర్తింపు కోసం పడే తపన నుండే మొదలవుతుంది. తన తల్లి కళ్ళలో గర్వం చూడటం కోసం, తనను చిన్నచూపు చూసిన సమాజం ముందు తలెత్తుకుని నిలబడటం కోసం అతను అక్రమ మార్గాన్ని ఎంచుకుంటాడు.
వంకర నడక ఇది పక్షవాతం వల్ల వచ్చింది కాదు. ఇది అతనిలోని అహంకారం, సామాజిక అసహనం, తను మోస్తున్న కూలీ జీవితపు భారానికి ప్రతీక. మాస్ హీరో అంటే కేవలం సిక్స్ ప్యాక్, పర్ఫెక్ట్ లుక్ ఉండాల్సిన అవసరం లేదని, లోపల ఉన్న మొండితనం కూడా హీరోయిజమే అని నిరూపించింది.
అతను ‘నన్ను తొక్కేసిన వాడిని తొక్కి పైకి వస్తాను’ అనే ఒక సోషియో-ఎకనామిక్ మొబిలిటీ సిద్ధాంతాన్ని బలంగా నమ్ముతాడు. ఒక కూలీ స్థాయి నుండి సిండికేట్ లీడర్ స్థాయికి ఎదగడం, కేవలం శారీరక బలం లేదా తెలివితేటలు మాత్రమే కాదు, అది సామాజిక నిర్మాణాన్ని ధైర్యంగా ప్రశ్నించడం.
శేషాచలం అడవులు కేవలం ఒక లొకేషన్ మాత్రమే కాదు, అదొక సమాంతర ప్రపంచం. ఇక్కడ చట్టం, న్యాయం అనేవి లేవు. ఇక్కడ కేవలం ‘అధికారం’ మాత్రమే శాసిస్తుంది. ఈ అడవుల్లో పుష్పరాజ్ లాంటి నిమ్న వర్గపు కూలీలు, కొండారెడ్డి, మంగళం శ్రీను లాంటి మధ్యస్థాయి దళారులు, చివర్లో హుమిరెడ్డి సిద్దప్ప నాయుడు లాంటి ఉన్నత స్థాయి రాజకీయ నాయకుడు… వీరందరి మధ్య జరిగే ఘర్షణ, ఒక మైక్రో-కోస్మిక్ సోషల్ స్ట్రక్చర్ను ప్రతిబింబిస్తుంది.
ఎర్రచందనం దుంగలు ఇవి కేవలం విలువైన కలప మాత్రమే కాదు, అవి అధికారానికి, సంపదకి ప్రతీకలు. ఆ దుంగలను ఎవరు నియంత్రిస్తే, వారు ఆ సమాంతర ప్రపంచాన్ని నియంత్రించినట్టే.
ఈ చిత్రం సుమారు ₹360 కోట్ల నుండి ₹393.5 కోట్ల గ్రాస్ వసూలు చేసింది..2021లో అత్యధిక వసూళ్లు చేసిన భారతీయ చిత్రంగా నిలిచింది.. అత్యధిక వసూళ్లు చేసిన తెలుగు చిత్రాలలో ఒకటిగా స్థానం సంపాదించింది.-
పుష్ప 2: ది రూల్’ మొదటి భాగం పునాది వేస్తే, ‘పుష్ప 2: ది రూల్’ ఆ పునాదిపై ఒక అత్యంత ఎత్తైన, సువిశాలమైన సామ్రాజ్యాన్ని నిర్మించిన కథ. ఈ భాగం కేవలం నేర సామ్రాజ్యం గురించి మాత్రమే కాదు, ఇది అధికారం, రాజకీయాలు, ప్రతిఘటన, ఆధిపత్య పోరాటం గురించి మరింత లోతుగా విశ్లేషిస్తుంది.
‘పుష్ప1’ లో పుష్పరాజ్ ఒక దళారి స్థాయికి ఎదిగితే, ‘ది రూల్’ లో అతను ఒక వ్యవస్థగా రూపాంతరం చెందుతాడు. అతని అధికారం కేవలం అడవులకే పరిమితం కాదు, అది పట్టణాలలోకి, రాజకీయాలలోకి విస్తరిస్తుంది. పుష్పరాజ్ పోరాటం కేవలం యాక్షన్ సీక్వెన్స్ల ద్వారా మాత్రమే కాక, మైండ్ గేమ్లు, రాజకీయ ఎత్తుగడలు, మానసిక యుద్ధాల ద్వారా కూడా జరుగుతుంది.
‘పుష్ప 2’ లోని ఒక కీలక అంశం దైవత్వం. పుష్పరాజ్, దైవత్వం పొందిన ఒక అణచివేతదారుగా మారతాడా? లేక తన ప్రజలందరినీ కాపాడే ఒక రాబిన్ హుడ్ గా మిగులుతాడా? అతని చిత్రం పోస్టర్లు, విగ్రహాలు, పాటలు… ఇవన్నీ కూడా అతను కేవలం ఒక నేరస్తుడిగా కాక, ఒక ప్రజల నాయకుడుగా రూపాంతరం చెందుతున్న విధానాన్ని వివరిస్తాయి.
ఒక సామాన్యమైన నేరస్తుడిని ప్రజలు తమ నాయకుడిగా, దేవుడిగా కొలవడం అనేది, సమాజంలో ఉన్న చట్టబద్ధమైన వ్యవస్థపై వారికి ఎంత నమ్మకం లేదో, దానిని ప్రశ్నించేంత శక్తివంతమైన సామాజిక విశ్లేషణ. అణచివేతకు గురైన వారికి, చట్టాన్ని ధిక్కరించి నిలబడిన ప్రతి వ్యక్తి ఒక హీరోనే.
“తగ్గేదే లే” అనే మాట కేవలం ఒక సినిమా డైలాగ్ గా మిగిలిపోలేదు. ఇది వ్యక్తిగత జీవితంలో సవాళ్లు ఎదురైనప్పుడు, సమాజం అణచివేసినప్పుడు, ఆత్మగౌరవాన్ని కోల్పోతున్నప్పుడు… ప్రతి ఒక్కరూ తమ లోపల అనుకునే ఒక అంతర్గత ధైర్య ప్రకటన.
పుష్ప’ విజయం కేవలం కథ, పాత్రలకే పరిమితం కాలేదు. ఇది సాంకేతికంగా, సంగీతపరంగా, గ్లోబల్ మార్కెట్లో భారతీయ సినిమా స్థానాన్ని మార్చిన ఒక విప్లవం.ఆ కథలోని భావోద్వేగాలు, పోరాటం, తిరుగుబాటు లాంటి యూనివర్సల్ థీమ్స్ కారణంగా, భాష, ప్రాంతం అనే అడ్డుగోడలు పూర్తిగా కూలిపోయాయి.
ఉత్తరాది ప్రేక్షకులు, తెలుగు సినిమా హీరోకి, డైలాగ్స్కి, స్టైల్కి ఎంతగా కనెక్ట్ అయ్యారంటే, అది భారతీయ సినిమా చరిత్రలోనే ఒక మైలురాయి. ఇది భాషా పరమైన అడ్డుగోడలను కూల్చి, భారతీయ చలనచిత్ర పరిశ్రమను ఒకే తాటిపైకి తీసుకురావడానికి సహాయపడింది.
ఈ చిత్రం ప్రపంచవ్యాప్తంగా సుమారు ₹1740 కోట్ల నుండి ₹1800 కోట్ల గ్రాస్ వసూలు చేసింది..దేశంలోనే అత్యధిక వసూళ్లు సాధించిన హిందీ డబ్బింగ్ చిత్రంగా నిలిచింది.. హిందీ వెర్షన్ నుండి మాత్రమే ₹812 కోట్లకు పైగా నెట్ వసూలు చేసింది.. ‘బాహుబలి 2’ రికార్డులను అధిగమించి, అత్యధిక వసూళ్లు సాధించిన భారతీయ చిత్రాలలో ఒకటిగా స్థానం పొందింది.
