షేర్లలో మదుపు చేసి లాభాలు అర్జించాలంటే క్యాష్ ఫ్లో కంపెనీలను ఎంచుకోవాలి. అన్ని కంపెనీలలో ఫ్రీ క్యాష్ ఫ్లో ఉండదు.అసలు ఫ్రీ క్యాష్ ఫ్లో అనే పదాన్ని చాలామంది ఇన్వెస్టర్లు విని వుండరు.ఆస్తులలో ఇన్వెస్ట్మెంట్, ఎక్విప్మెంట్, ప్లాంట్ కొనుగోలు వంటివి కాపిటల్ వ్యయానికి పోగా మిగిలిన నగదునే ఫ్రీ క్యాష్ ఫ్లో అంటారు.ఇలాంటి నగదు నిల్వలు చాలా కంపెనీలలో ఉంటాయి.కొన్ని కంపెనీలలో భారీ గా వుంటాయి.వీటినే క్యాష్ రిచ్ కంపెనీలని కూడా అంటారు. భవిష్యత్ అవసరాల కోసం ఈ నగదు నిల్వలను ఉపయోగిస్తుంటారు.
కంపెని ఆర్ధిక పరిస్థితిలో మార్పు వచ్చిన సందర్భం లో ఈ నగదు నిల్వలే ఆదుకుంటాయి.అలాగే కంపెనీలు ఉన్నత స్థాయికి ఎదగాలంటే భారీ గా నిధుల అవసరం ఉంటుంది.భవిష్యత్ అవసరాల కోసమే గాక డివిడెండ్ చెల్లింపులకు నిధుల అవసరం ఉంటుంది. కేవలం క్యాష్ ఫ్లో చరిత్ర నే కాకుండా డివిడెండ్ ను కంపెనీ చెల్లిస్తుందా లేదా అనే అంశం కూడా పరిగణనలోకి తీసుకొని షేర్లలో మదుపు చేయాలి.మార్కెట్లో షేర్ ధర వృద్ధితో సంబంధం లేకుండా కంపెనీ పని తీరు ఫలితాల పై ఆధారపడి రాబడులు అందుకోవచ్చు. చాలామంది ఇన్వెస్టర్లు ఈ విషయాన్ని అంతగా పట్టించుకోరు.
షేర్ ధర పెరుగుదల పైనే దృష్టి పెడతారు.ముఖ్యంగా దీర్ఘ కాలిక వ్యూహం తో మదుపు చేసే ఇన్వెస్టర్లు క్యాష్ ఫ్లో కంపెనీలపై కన్నేయ వచ్చు.ఇటు ఫ్రీ క్యాష్ ఫ్లో ను కలిగి మరో వైపు ఆకర్షణీయమైన డివిడెండ్ ను చెల్లించే కంపెనీలు ఎన్నో ఉన్నాయి. అలాంటి వాటిని ఇన్వెస్టర్లు ఎంచుకుంటే పెట్టుబడికి రిస్క్ వుండదు .మార్కెట్లో షేర్ ధరలు హెచ్చు తగ్గులకు గురైనప్పటికీ క్యాష్ రిచ్ కంపెనీల షేర్లను ఎంచుకుంటే డివిడెండ్ పరం గా ఆదాయం పొందవచ్చు.అలాగే మార్కెట్ సెంటిమెంట్ బాగుంటే షేర్ ధరలు పెరిగిన సందర్భం లో పాక్షిక లాభాలు పొందవచ్చు.
కాబట్టి ఇన్వెస్టర్లు షేర్లను ఎంచు కొనే ముందు ఆయా కంపెనీల పూర్వ పరాలను పరిశీలించాలి. కంపెనీలు క్యాష్ రిచ్ కంపెనీలో కాదో తెలుసుకోవాలి.ఈ విషయాలు తెలుసుకోవాలంటే ఇన్వెస్టర్లు కొంత కసరత్తు చేయాలి. కంపెనీ చరిత్ర ను మొత్తం చదివితే వాస్తవాలు తెలుస్తాయి. ఆ తర్వాతే మంచి క్యాష్ రిచ్ కంపెనీ షేర్లను ఎంచుకొని మదుపు చేయాలి. ఫ్రీ క్యాష్ ఫ్లో కంపెనీలలో ఓ ఎన్ జీ సీ,ఐ ఓ సీ,హిందూస్తాన్ లీవర్,ఇన్ఫోసిస్, టీసీఎస్, హీరో హోండా, ర్యాన్ బాక్సి,గెయిల్,విప్రో,హిండాల్కో ,అశోక్ లేలాండ్ , ఎల్ అండ్ టీ, ఎన్ ఏం డీసీ, కోల్ ఇండియా, టాటా స్టీల్ వున్నాయి.
————-KNM
