Chadar Trek
హోరెత్తించే శబ్దాలతో పై నుంచి కిందకు దూకే జలపాతాలను మనం చూసి ఉంటాం. కానీ గడ్డ కట్టి పోయిన జలపాతాలు కూడా ఈ ఇలపై ఉన్నాయి. వాటిని చాలామంది చూసి ఉండరు.వాటి గురించి వినివుండరు. ఇవి మన ఇండియాలోనే ఉన్నాయి. వాటిని చూడాలంటే లడక్ వెళ్ళాలి. లేహ్ నుంచి మొదలయ్యే జన్ స్కార్ నది మీదుగా సాగే ‘చాదర్ ట్రెక్’ లో పాల్గొంటే ఈ గడ్డ కట్టిన జలపాతాలను చూడ వచ్చు.
చాదర్ ట్రెక్ శీతాకాలంలో చేసే ట్రెక్.. లడఖ్‌లో ఘనీభవించిన జన్ స్కార్ నది అందాలను ఆవిష్కరిస్తుంది. ఆహ్లాదపరిచే ప్రకృతి దృశ్యాలు, సవాలుతో కూడిన పరిస్థితులకు చాదర్ ట్రెక్ ప్రసిద్ధి గాంచింది. సాహస ప్రియులకు అరుదైన అనుభవాలను అందిస్తుంది.
హిమాలయాల మధ్యలో చేసే చాదర్ ట్రెక్ కేవలం ఒక ప్రయాణం మాత్రమే కాదు, మంచు, మంచు ఘనీభవించిన అద్భుతమైన అందాలను ఆస్వాదించే ఆకర్షణీయమైన సాహసయాత్ర. శీతాకాలంలో జన్ స్కార్ లోయను చేరుకోవడానికి స్థానికులు సాంప్రదాయకంగా ట్రెక్ చేస్తుంటారు. పర్యాటకులను కూడా అనుమతిస్తారు. ముందుగా ట్రెక్ నిర్వాహకులను సంప్రదించి .. వారి సహకారంతో ట్రెక్ లో పాల్గొనాలి
ఈ చాదర్ ట్రెక్ మూడు రోజులు సాగుతుంది. వాతావరణం అనుకూలించక పోతే మరింత సమయం పట్టవచ్చు. ఈ ట్రెక్ లో మూడు చోట్ల క్యాంపులుంటాయి. మొదటి క్యాంప్ లో ‘తిలాడ్ సుమడో’ ప్రదేశం వస్తుంది. ఇక రెండో క్యాంప్ ‘నెరాక్ ‘జలపాతం దగ్గర్లో ఉంటుంది. ఇక్కడే మనం గడ్డకట్టిన జలపాతాన్ని చూడవచ్చు.
కొండ పైనుంచి కిందకు దూకుతున్న జలధారలు ప్రవహిస్తున్న దశలోనే ఘనీభవిస్తాయి. ఆ దృశ్యం అద్భుతంగా ఉంటుంది. ఈ జలపాతంపేరు నెరాక్. ఆప్రాంతాన్నికూడా అదే పేరుతో పిలుస్తారు. గడ్డకట్టిన జన్ స్కార్ నది మీదుగా నడుచుకుంటూ వెళ్లి ఆ ఘనీభవించిన జలపాతాన్నిచూడటం ఓ థ్రిల్లింగ్ అనుభవం. ఈ జలపాతాన్ని చూడాలంటే జనవరి, ఫిబ్రవరి మాసాల్లో వెళ్ళాలి. ఎండాకాలపు రోజుల్లో వెళితే పై నుంచి మంచు కరిగి కిందికి జాలువారే జలధారలను చూడొచ్చు. మొత్తం ట్రెక్ లో పాల్గొనాలి.
అక్కడికి దగ్గర్లోనే నెరాక్ గ్రామం కూడా ఉంది. అక్కడ రెండు కొండల నడుమ ఒక చెక్క వంతెనను అమర్చారు.ఇది పాత చెక్క వంతెన, ఒకేసారి నలుగురు కంటే ఎక్కువ మంది వెళితే కూలిపోయేలా ఉంటుంది. గైడ్స్ అందరిని అనుమతించరు. ఆ వంతెన పైనుంచి చూస్తే నెరాక్ జలపాతం మరింత అందంగా కనిపిస్తుంది.
లోతైన లోయలు .. చుట్టూ పెద్ద కొండలు .. చల్లటి గాలులతో ఈ చాదర్ ట్రెక్ మార్గం అందం గా..అద్భుతంగా ఉంటుందని పర్యాటకులు చెబుతుంటారు. కానీ అక్కడికి వెళ్లడం అందరికి సాధ్యం కాదు. రిస్క్ చాలా ఉంటుంది. ఆ వాతావరణాన్ని తట్టుకునే వారే వెళ్ళాలి. ఒక్కోసారి ఉష్ణోగ్రతలు -25 లేదా అంతకంటే తక్కువకు పడిపోతుంటాయి. .
ఈట్రెక్కింగ్లో పాల్గొనాలంటే అనుమతులు అవసరం.కొన్ని టూరిజంసంస్థలు ఈ ట్రెక్కింగ్ ప్యాకేజీలు ఆఫర్ చేస్తున్నాయి. 
సంస్థలే అవసరమైన అనుమతులు తీసుకుంటారు.సాధారణంగా, ట్రెక్కింగ్ మార్గంలో టెంట్లు లేదా గుహలలో వసతి కల్పిస్తారు.ట్రెక్ సమయంలో అల్పాహారం,భోజనం,రాత్రి భోజనం అందిస్తారు.టీ,సూప్ వంటి వేడి పానీయాలు కూడా ఇస్తారు. ఈ చాదర్ ట్రెక్ ప్యాకేజి సుమారు 17 వేల వరకు ఉండొచ్చు .
