అరుణాచలం వెళ్తున్నారా ? ఈ సూచనలు మీ కోసమే !!

Holy walk………………….

1. అరుణాచలం లో గిరి ప్రదక్షిణ చేసే వారు ఎక్కడ నుంచి మొదలు పెడతారో .. అక్కడికి చేరుకోవడంతోనే గిరిప్రదక్షిణ పూర్తి అవుతుంది. రాజగోపురం దగ్గరి నుంచి నడక మొదలు పెట్టి తిరిగి అక్కడికి చేరుకోవడం తో గిరిప్రదక్షిణ పూర్తి అవుతుంది అని భావించకండి. మీరు ఎక్కడినుంచి గిరి ప్రదక్షిణ మొదలు పెట్టాలని భావించినా సమీపం లోని వినాయకుని గుడిని చూసుకుని స్వామికి నమస్కరించి మొదలుపెట్టవచ్చు.మళ్ళీ అక్కడికి చేరుకొని స్వామికి నమస్కరిస్తే ప్రదక్షిణ ముగిసినట్టు అని భావించాలి. 

2. గిరిప్రదక్షిణ అనేది కచ్చితంగా రోడ్డుకు ఎడమవైపున మాత్రమే చేయాలి ” రోడ్డుకు కుడివైపు ఉండే మార్గంలో సూక్ష్మరూపంలో యోగులు ‘ సిద్ధులు ‘ దేవతలు ప్రదక్షిణలు చేస్తారట. అందువలన కుడివైపున ప్రదక్షిణ చేయరాదు. పాదరక్షలు లేకుండా నడవాలి. 

3. ఆరుణాచలం వెళ్లే ప్రతి వారు పది రూపాయల నోట్లు లేదా నాణేలు ఎక్కువ గా తీసుకుని వెళ్ళండి. ఎందుకంటే ప్రతి ఆలయంలో పది రూపాయలు దక్షిణగా వేసిన ప్రతి భక్తునికి విభూది ప్యాకెట్ లు ఖచ్చితంగా ఇస్తారు. అలాగే రూపాయి నాణేలు పట్టుకెళ్లండి. ఎనెతో కొంత అక్కడ బిచ్చగాళ్లకు వేయండి.

4. దర్శనానికి గిరిప్రదక్షిణకి వెళ్లేటప్పుడు రెండు చిన్న చిన్న డబ్బాలను తీసుకుని వెళ్ళండి . ప్రతి ఆలయంలో ఇచ్చే విభూది ఆ చిన్న డబ్బాలలో తీసుకోవచ్చు.

5. ఎముకలు అరిగి పోయిన వారు యమ లింగం దగ్గర ఇచ్చే విభూతి ఔషధంగా తీసుకుంటే దాని ఫలితం అమోఘం అని చెబుతారు.దారిలో కనబడే సిద్ధులు, సాధువులను గౌరవించాలి, వారిపై అవాంఛిత వ్యాఖ్యలు చేయకూడదు. 

6. నైఋతి లింగం దగ్గర మంత్ర సాధన చేసుకునేవారు ఖచ్చితంగా అక్కడ జపం చేసుకుంటే వెయ్యి రెట్లు ఫలితం ఉంటుంది ‘ ఏ మంత్రము లేనివారు పంచాక్షరి మంత్రాన్ని జపించుకోవచ్చు.

7. ప్రదక్షిణ మొదలుపెట్టే ముందు గాని ‘ మధ్యలో గాని ఎక్కువ ఆహారం తీసుకుని మొదలు పెట్టవద్దు ” భుక్తాయాసం వలన అడుగులు ముందుకు పడవు. ఖాళీ కడుపుతో చేసే గిరిప్రదక్షణ వేగవంతంగా ఉంటుంది.

8. సమూహంగా గిరి ప్రదక్షిణ చేసే కంటే ఏకాంతంగా చేసే గిరిప్రదక్షణ చాలా ప్రశాంతంగా… అద్భుతంగా ఉంటుంది.ప్రదక్షిణ సమయంలో వీలైతే మౌనంగా ఉండటం మంచిది, లేదా “ఓం అరుణాచల శివ” అనుకుంటూ నడవాలి. ప్రదక్షిణను వేగంగా కాకుండా ప్రశాంతంగా, భక్తితో చేయాలి, గర్భవతి స్త్రీ నడుస్తున్నట్లుగా, నెమ్మదిగా నడవాలి. 

9. గిరి ప్రదక్షిణ చేస్తున్నప్పుడు ఎక్కువసార్లు కూర్చోవడం వలన నరాలు పట్టి నడక వేగం తగ్గిపోతుంది. సాధ్యమైనంతవరకు కూర్చోకుండా నిలబడి గానీ తప్పనిసరి పరిస్థితుల్లో అయితే బెంచీపై పడుకోండి.

10. కొబ్బరికాయలు పట్టుకొని దర్శనానికి వెళ్లే వారు ‘ అరుణాచలేశ్వరుని దర్శనం అనంతరం బయటకు వచ్చిన తర్వాత ఎడమవైపు మూలన స్వామి వారి ఉత్సవ విగ్రహాలు ఉంటాయి. అక్కడ మీరు ఇచ్చిన కొబ్బరికాయలు కొట్టి గోత్ర నామాలు చదివి విభూతి ప్రసాదంగా ఇస్తారు.

11. ఆలయ ప్రాంగణంలోకి మనం అడుగుపెట్టిన తర్వాత ఎడమవైపున సుబ్రహ్మణ్యేశ్వర స్వామి ఆలయం ఉంటుంది. దర్శనం చేసుకోండి.

12. కొంచెం ముందుకు వెళ్ళిన తర్వాత పెద్దపెద్ద పిల్లర్లతో అతి పెద్ద మండపం ఉంటుంది ‘ఆ మండపంపైకి వెళ్లి కొంచెం ముందుకు వెళితే పాతాళ లింగం ఉంటుంది. రమణ మహర్షి వారు అక్కడే తపస్సు చేసారు.

13. రాజ గోపురానికి కుడివైపున ఒక పెద్ద స్టేజ్ లాగా ఉంటుంది. అది అరుణాచలేశ్వరుడి ఆస్థాన ఏనుగు బృందావనం.

14. ఉత్తరం వైపు ఉండే ప్రధాన గోపురం నుంచి ఒకసారి వెళ్లి రావాలని శాస్త్రం ‘ అది ఇది మహా భక్తురాలైన అమ్మాణి అమ్మన్‌ కట్టించిన గోపురం.

15. రెండవ ప్రాకారానికి ఎడమవైపున అతిపెద్ద కాలభైరవుని విగ్రహం ఉన్న ఆలయం ఉంటుంది. తప్పకుండా దర్శనం చేసుకోండి.

16. అదే ప్రాంగణంలో కుడివైపున మారేడు చెట్టు ఉంది దాని క్రింద రాతితో చెక్కిన అతి పెద్ద త్రిశూలం ఉంటుంది.నమస్కరించుకోండి.

17. అమ్మవారి ఆలయంలో కూడా పది రూపాయల దక్షిణగా వేస్తే అమ్మవారి కుంకుమ ప్రసాదం ఇస్తారు.

18. అగ్ని లింగానికి ‘ రమణ మహర్షి ఆశ్రమానికి మధ్యలో దక్షిణామూర్తి ఆలయం ఉంటుంది. చాలా పెద్ద విగ్రహం ‘ అత్యంత శక్తివంతమైన విగ్రహం ‘ అరుణాచల శివుడిని దక్షిణామూర్తి స్వరూపంగా కొలుస్తారు. ఒకవేళ మీరు గురువారం రోజున అక్కడ ఉంటే ఖచ్చితంగా దీపం వెలిగించండి. అక్కడ శెనగల దండ అమ్ముతారు. మీ ఇంట్లో ఎంతమంది కుటుంబ సభ్యులు ఉంటే అన్ని శెనగల దండలను స్వామివారికి సమర్పించండి. అది స్వామి వారికి వేస్తారు.

19. శివసన్నిధి రోడ్ లో కొంచెం ముందుకు వెళ్లి కుడివైపు తిరిగితే రామ్ సూరత్ బాబా ఆశ్రమం ఉంది.. చాలా చాలా బాగుంటుంది. అక్కడి వాతావరణం అంత ప్రశాంతంగా ఉంటుంది. రమణ మహర్షి వారి ఆశ్రమంలోకి వలె ఇక్కడ కూడా చాలా పాజిటివ్ వైబ్రేషన్స్ ఉంటాయి. ఇక్కడ ఉదయం టిఫిన్ ‘ మధ్యాహ్నం భోజనం ఉచితంగా పెడతారు. విదేశీయులు కూడా సామాన్యులతో పాటు లైన్ లో ఉండి ప్రసాదం స్వీకరిస్తారు. ఒకసారి అక్కడి ప్రసాదం స్వీకరించండి.

20. ఆడి అన్నామలైకి దగ్గరలో అర్ధనారీశ్వర టెంపుల్ వెనుక మన తెలుగు వారి ఆశ్రమం ‘అన్నపూర్ణ దేవి ఆశ్రమం’ ఉంది. ఇక్కడ భోజనం ఒక్కసారైనా కచ్చితంగా తిని తీరవలసిందే ‘ అన్నపూర్ణమ్మ ప్రసాదం కదా అద్భుతంగా ఉంటుంది. మన తెలుగు వారిది కదా ఆదరణ ఎక్కువ!

ఓం అరుణాచల శివ