Subramanyam Dogiparthi…………….
‘ఝాన్సీ రాణి’ …. నటుడు రాజేంద్ర ప్రసాద్ నెగటివ్ పాత్రలో నటించిన చిత్రమిది . ప్రముఖ రచయిత సత్యానంద్ దర్శకత్వం వహించిన ఏకైక సినిమా. భానుప్రియ లీడ్ రోల్ లో నటించారు. 1988 జూన్లో వచ్చిన ఈ ‘ఝాన్సీ రాణి’ సినిమాకు పాపులర్ రచయిత మల్లాది వెంకట కృష్ణ మూర్తి రాసిన ‘మిస్టర్ వి’నవల ఆధారం. ప్రముఖ వారపత్రికలో సీరియల్ గా వచ్చిన ఈ నవల అప్పట్లో పాఠకులను బాగా అలరించింది.
ఎన్నో హిట్ సినిమాలను నిర్మించిన మిద్దె రామారావు నిర్మాత . సినిమా కూడా బాగానే ఉంటుంది . మరెందుకనో కమర్షియల్గా సక్సెస్ కాలేదు . రాజేంద్రప్రసాద్ నెగటివ్ పాత్రలో నటించటాన్ని ప్రేక్షకులు రిసీవ్ చేసుకోలేకపోయారు అని ఒకటి రెండు ఇంటర్వ్యూలలో సత్యానంద్ గారు చెప్పుకొచ్చారు.
నాకయితే ఏం అనిపించిందంటే మన తెలుగు వారికి డిటెక్టివ్ , పరిశోధనాత్మక సినిమాలు ఓ పట్టాన రుచించవు అని . క్రైం , యా క్షన్ సినిమాలను బాగా ఆదరిస్తారు కానీ పరిశోధనాత్మక సినిమాలను ఆదరించరు .అందువలన కూడా ఈ సినిమా ఆర్ధికంగా సక్సెస్ కాలేదు అనేది నా అభిప్రాయం .
నవలను సినిమా కథగా మలచుకుని స్క్రీన్ ప్లేని తయారు చేసుకున్నారు సత్యానంద్ . డైలాగులను కూడా ఆయనే వ్రాసారు .కధ ఏంటంటే … ఝాన్సీరాణి అనే యువతి LIC లో ఉద్యోగం చేసుకుంటూ దినకర్ అనే లాయర్ని ప్రేమిస్తూ ఉంటుంది . పేరుకు తగ్గట్లుగా ఎవరు తప్పు చేసినా నిర్భయంగా ఎదుర్కునే యువతి . Whistle blower . తన అక్కను పెళ్ళి చేసుకుని వెంటనే ప్రమాదంలో చనిపోతాడు ఆమె భర్త . అది ప్రమాదం కాదని అతను అమ్మాయిలను పెళ్ళిళ్ళు చేసుకుని వదిలేసే మోసగాడని CID ఆఫీసర్ ఝాన్సీకి చెపుతాడు .
ఆ మోసగాడిని పట్టుకోవాలని పెద్ద పరిశోధన చేస్తూ ఉంటుంది. ఆమెకు ప్రియుడైన ఆ యంగ్ లాయర్ దివాకర్ సాయపడుతుంటాడు . ఆ మోసగాడు V అనే అక్షరంతో ప్రారంభం అయ్యే వివిధ పేర్లతో ఎలాంటి సాక్ష్యాలు లేకుండా ఆడపిల్లలను పెళ్ళిళ్ళు చేసుకుంటూ ఉంటాడు . అతని లిస్టులో ఝాన్సీ కూడా ఉంటుంది . సెకండ్ హాఫ్లో ఆ మోసగాడు రాజేంద్రప్రసాదే అని ప్రేక్షకులకు తెలిసిపోతుంది .
అక్కడ నుంచి ఝాన్సీని తుదముట్టించేందుకు ప్రయత్నాలు చేస్తూ ఉంటాడు . ఝాన్సీ తప్పించుకుంటూ ఉంటుంది . ఈ క్రమంలో V చిత్రాన్ని అతన్ని చూసిన ఏకైక సాక్షి ద్వారా గీయించి ఆశ్చర్యపోతుంది . తన స్నేహితురాలిని పెళ్లి చేసుకోబోయే V ని పోలీసులకు అప్పగిస్తుంది . అతన్ని చంపే ప్రయత్నం చేసినందుకు ఝాన్సీని అరెస్ట్ చేసి కోర్టులో బోను ఎక్కిస్తారు .
అక్కడ V లాయర్ అతన్నినిర్దోషి అని వాదన చేస్తాడు.. ఝాన్సీ ‘ఝాన్సీ లక్ష్మీబాయి’ అయిపోయి కోర్టులోనే V ని షూట్ చేసి చంపేస్తుంది ఏడు సంవత్సరాలు కఠిన కారాగార శిక్ష పడుతుంది . ఆమె తిరిగి వచ్చేదాకా ఎదురు చూస్తూ ఉంటానని ఆమె ప్రియుడు చెప్పడంతో సినిమా ముగుస్తుంది. సత్యానంద్ కథను పకడ్బందీగానే తెర కెక్కించారు.
ఝాన్సీరాణిగా భానుప్రియ , V గా రాజేంద్రప్రసాద్ చాలా బాగా నటించారు. మోసగాడిగా రాజేంద్రప్రసాద్ మెప్పించే రీతిలోనే నటించారు. సాధారణంగా కామెడీ, కుటుంబ కథా చిత్రాలకు ప్రసిద్ధి చెందిన రాజేంద్ర ప్రసాద్, ఈ చిత్రంలో తనదైన శైలి నటనకు పూర్తి భిన్నంగా ఒక క్రూరమైన, నెగటివ్ షేడ్స్ ఉన్న పాత్రను పోషించడం ప్రేక్షకులను ఆశ్చర్యపరిచింది.ప్రేక్షకులు ఆయన్ని అలాంటి పాత్రలో మొదటిసారి చూశారు.
లవర్ దివాకర్ గా దగ్గుబాటి రాజా , ఝాన్సీ అక్కగా రాజ్యలక్ష్మి నటించారు . ఇతర ప్రధాన పాత్రల్లో కోట శ్రీనివాసరావు , పూర్ణిమ , బాలాజి , సాక్షి రంగారావు , ముచ్చెర్ల అరుణ , సుత్తి జంట , కాంతారావు , జగ్గయ్య , అన్నపూర్ణ , శుభలేఖ సుధాకర్ , శ్రీలక్ష్మి , పి జె శర్మ , బెనర్జీ , రాధాకుమారి , హేమసుందర్ , ప్రభృతులు నటించారు .
చక్రవర్తి చాలా శ్రావ్యమైన బేక్ గ్రౌండ్ మ్యూజిక్కుతో పాటు పాటలకు మంచి సంగీతాన్ని అందించారు . పాటలన్నీ వేటూరి వారే వ్రాసారు . బాగా వ్రాసారు . దగ్గుబాటి రాజా , భానుప్రియల మీద రెండు డ్యూయెట్లు ఉంటాయి . రేపో మాపో పెళ్ళంట , అతివ కోపం అంటూ సాగుతాయి ఆ రెండు పాటలు . మరో పాట రాజేంద్రప్రసాద్ , భానుప్రియల మీద ఉంటుంది . ప్రణయానికి పుట్టినరోజు పరువానికి పండుగ రోజు . చాలా బాగా చిత్రీకరించారు దర్శకుడు సత్యానంద్ .
బాలసుబ్రమణ్యం , జానకమ్మ , సుశీలమ్మ , మనోలు పాడారు .సినిమా వ్యాపారపరంగా విజయం సాధించిందా లేదా అనేది ప్రేక్షకులకు పెద్దగా అవసరం లేని అంశం . నా ఉద్దేశంలో సినిమా చూడబులా కాదా అనేదే ముఖ్యం . ఆ కోణంలో ఈ సినిమా చూడబులే .
డైరెక్టర్ గారు నటీమణులు భానుప్రియ , రాజ్యలక్ష్మి , అరుణ , పూర్ణిమలను అందంగా చూపారు . రాజేంద్రప్రసాద్ నటన ఎంగేజింగుగా ఉంటుంది . పాటలు బాగానే ఉన్నాయి . సినిమా యూట్యూబులో ఉంది . చూడబులే . ఇంతకుముందు చూడనట్లయితే వాచ్ లిస్టులో పెట్టేసేయండి .
